- ភ្នំពេញ
ការប្រកាសពីការពង្រឹងគុណភាពអប់រំតាមសាលារដ្ឋ របស់សម្តេចនាយករដ្ឋមន្ត្រី នៅថ្ងៃទិវា គ្រូបង្រៀនពិភពលោក ៦តុលា បានធ្វើឱ្យមានការសាទរពីប្រជាពលរដ្ឋ។
ការប្រកាសពីការពង្រឹងគុណភាពអប់រំតាមសាលារដ្ឋ របស់សម្តេចនាយករដ្ឋមន្ត្រី នៅថ្ងៃទិវា គ្រូបង្រៀនពិភពលោក ៦តុលា បានធ្វើឱ្យមានការសាទរពីប្រជាពលរដ្ឋ។
ការប្រកាសពីការពង្រឹងគុណភាពអប់រំតាមសាលារដ្ឋ របស់សម្តេចនាយករដ្ឋមន្ត្រី នៅថ្ងៃទិវា គ្រូបង្រៀនពិភពលោក ៦តុលា បានធ្វើឱ្យមានការសាទរពីប្រជាពលរដ្ឋ។
សាលារដ្ឋមានគុណភាព នឹងមានន័យថា កូនអ្នកក្រអាចទទួលបានការអប់រំប្រកបដោយគុណភាព ដូចកូនអ្នកមានដែរ។ ដូច្នេះ វានឹងធ្វើអោយកូនអ្នកក្រ មានចំណេះដឹងគ្រប់គ្រាន់ សម្រាប់រំដោះខ្លួនពួកគេចេញពីភាពក្រីក្រ។
កន្លងមក មានការការគិតថា សាលារដ្ឋមានគុណភាពមិនល្អ ដូចជាសាលាឯកជនឡើយ។ពលរដ្ឋជាទូទៅចង់ឱ្យកូនរបស់ខ្លួនបានសិក្សានៅសាលាល្អ មានគុណភាព។ ដោយសារការគិតរបស់ពលរដ្ឋជាទូទៅបែបនេះហើយ បានជាបច្ចុប្បន្ននេះ គេសង្កេតឃើញថា សាលាឯកជនកំពុងតែរីកដុះដាល ហើយពលរដ្ឋមួយចំនួនបានបញ្ជូនកូនទៅសិក្សានៅសាលាឯកជន។
ទោះបីជាជម្រើសយកកូនទៅសិក្សានៅសាលាឯកជន មានហេតុផលជាច្រើន ដូចជា ៖ ឪពុកម្តាយរវល់គ្មានពេលគ្រប់គ្រាន់ជូនកូនទៅសាលា កត្តាសុវត្ថិភាពជាដើមនោះក្តី តែនៅក្នុងនោះក៏មានបញ្ហាគុណភាពសិក្សានេះដែរ។ ការបញ្ជូនកូនទៅសិក្សានៅសាលាឯកជន ឪពុកម្តាយជាច្រើននាក់មានជំនឿចិត្តថា នៅទីនោះគុណភាពអប់រំ ល្អជាងសាលារដ្ឋ។
នៅកម្ពុជា សាលាឯកជន មានតម្លៃផ្សេងៗគ្នាទៅតាមគុណភាពសិក្សា បើជាសាលាមានកម្រិតស្តង់ដារអន្តរជាតិ តម្លៃខ្ពស់ មិនចាញ់ការសិក្សានៅក្នុងប្រទេសជឿនលឿននោះទេ។ ការសិក្សានៅសាលាល្អនៅភ្នំពេញ ក្នុងកម្រិតបធ្យមសិក្សាអាចមានតម្លៃពី២ពាន់ដុល្លារ រហូតដល់ ១ម៉ឺនដុល្លារឯណោះក្នុងមួយឆ្នាំ។
នៅក្នុងសុន្ទរកថាអបអរសាទរទិវាគ្រូបង្រៀន ក្រោមប្រធានបទថា «គ្រូបង្រៀនជាសសរស្តម្ភ នៃកំណែទម្រង់សាលារៀនឆ្ពោះទៅរកឧត្តមភាព» សម្តេចធិបតី ហ៊ុន ម៉ាណែត នាយករដ្ឋមន្ត្រី បានលើកឡើងថា ការវិនិយោគលើការសិក្សារបស់កូនៗ ជាការលះបង់របស់ឪពុកម្តាយគ្រប់រូប។ ឪពុកម្តាយតែងតែចង់ឱ្យកូនរៀននៅសាលាល្អ មានគុណភាព បើទោះបីជាសាលានោះនៅឆ្ងាយពីផ្ទះក្តី ក៏ឪពុកម្តាយត្រូវចំណាយពេលវេលា និងថវិកា ដើម្បីបញ្ជូនកូនបានទៅរៀននៅទីនោះដែរ។
ប្រព័ន្ធអប់រំនៅកម្ពុជា ត្រូវគេមើលឃើញថា បានកំពុងធ្វើកំណែទម្រង់គួរឱ្យកត់សម្គាល់ នៅក្នុងរយៈពេលចុងក្រោយនេះ។ ការអប់រំ បានជះឥទ្ធិពលដល់វិស័យផ្សេងៗទៀត ព្រោះវិស័យអប់រំ គឺជាក្បាលម៉ាស៊ីនក្នុងការផលិតធនធានមនុស្ស ដើម្បីទៅបម្រើនូវគ្រប់វិស័យ។ ទោះយ៉ាងណា គេបានមើលឃើញថា ការធ្វើកំណែទម្រង់ប្រព័ន្ធអប់រំ មិនមែនជាការងាយស្រួលនោះទេ ព្រោះវាត្រូវការពេលវេលាយូរ និងធនធានច្រើន។
មានគន្លឹះជាច្រើន ដើម្បីឱ្យការពង្រឹងគុណភាពអប់រំ អាចដំណើរការទៅបាន។ ហេដ្ឋាចរនាសម្ព័ន្ធបម្រើដល់ការសិក្សា មានសាលារៀន សម្ភារៈសិក្សា ឧបករណ៍ពិសោធន៍ រួមនឹងជីវភាពលោកគ្រូ អ្នកគ្រូផង ជារឿងដែលមិនអាចរំលងនោះទេ។ គេបានដឹងថា ដោយសារប្រាក់បៀវត្សរ៍ មិនគ្រប់គ្រាន់ បានធ្វើឱ្យបង្រៀនជាច្រើនស្វែងរកចំណូលតាមរវិធី និងមុខរបរផ្សេង ដែលធ្វើឱ្យតម្លៃវិជ្ជាជីវៈរបស់ពួកគាត់ធ្លាក់ចុះ ឬការបង្រៀនរបស់គាត់គ្មានគុណភាព។
លោកគ្រូ អ្នកគ្រូ មួយចំនួន មិនបានចំណាយពេលវេលាក្នុងការស្រាវជ្រាវមេរៀនយកមក បង្រៀនសិស្សនោះទេ។ ការបង្រៀនរបស់ពួកគាត់ ធ្វើតាមឯកសារចាស់ដដែលៗ បង្រៀនឱ្យតែគ្រប់ម៉ោង ដោយមិនបានគិតទៅដល់គុណភាព។
រាជរដ្ឋាភិបាលអាណត្តិទី៧ បន្តអនុវត្តគោលនយោបាយជាអាទិភាពលើវិស័យអប់រំ ។ សម្តេចធិបតី ហ៊ុន ម៉ាណែត បានគូសបញ្ជាក់ថា វិស័យអប់រំ ដំណាក់កាលនេះ គឺជាដំណាក់កាលពង្រឹងវិស័យអប់រំ។ ដូច្នេះ ត្រូវយកសសរស្ដម្ភណាមួយ ក្នុងនោះមានដូចជា ៖ ការពង្រឹងមូលដ្ឋាន នៃការសិក្សារបស់សិស្ស ចាប់តាំងពីថ្នាក់មត្ដេយ្យរហូតដល់ថ្នាក់ទី១២ ឬមធ្យមសិក្សាតែម្ដង ដែលការអប់រំនេះ ត្រូវផ្ដោតលើលទ្ធផលចំនួន២ គឺសមត្ថភាព និងឥរិយាបថ (Soft Skill)។
នាយករដ្ឋមន្ត្រី បានណែនាំដល់ក្រសួងអប់រំ យុវជន និងកីឡា ត្រូវពិនិត្យឱ្យបានម៉ត់ចត់ ចំពោះការជ្រើសរើសនាយកសាលា ពីព្រោះនាយកសាលា គឺមានសារៈសំខាន់ណាស់ក្នុង ការដឹកនាំលើការបណ្ដុះបណ្ដាលធនធានមនុស្ស ចាប់តាំងពីថ្នាក់មត្តេយ្យរហូតដល់មធ្យមសិក្សា។ គ្រូបង្រៀនត្រូវមានទាំងចំណេះដឹង និងគុណធម៌ សីលធម៌ ដែលជាគំរូ និងជាមូលដ្ឋានគ្រឹះក្នុងការបណ្ដុះបណ្ដាល ចែករំលែកចំណេះដឹងទៅដល់សិស្សានុសិស្ស និងយុវជនជំនាន់ក្រោយ ជាពិសេសជាការពង្រឹង និងបណ្ដុះបណ្ដាលធនធនមនុស្សល្អសម្រាប់ប្រទេសកម្ពុជា។
សម្តេចធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលកំពុងបន្តគិតគូរ និងយកចិត្ត ទុកដាក់លើការដំឡើងប្រាក់បៀវត្ស និងអត្ថប្រយោជន៍ដល់គ្រូបង្រៀននៅទូទាំងប្រទេស។ បច្ចុប្បន្ននេះ គ្រូបង្រៀនក្របខណ្ឌ (ក) ទទួលបានប្រាក់បៀវត្សក្នុងរង្វង់ជិត១លានរៀល៕
សរសេរ ៖ ដោយ សារ៉ាន់
កែសម្រួលដោយ ៖ ប្រេ វីន
ចែករំលែកព័តមាននេះ