- ភ្នំពេញ
មេដឹកនាំកម្ពុជា បានប្រកាសយ៉ាងច្បាស់ៗថា គ្រប់សកម្មភាពអភិវឌ្ឍន៍ជាតិទាំងអស់ គឺត្រូវតែអនុវត្តតាមទ្រឹស្ដី «គិតធំ ធ្វើតូច»។ ដូច្នេះ យើងសង្ឃឹមថា
មេដឹកនាំកម្ពុជា បានប្រកាសយ៉ាងច្បាស់ៗថា គ្រប់សកម្មភាពអភិវឌ្ឍន៍ជាតិទាំងអស់ គឺត្រូវតែអនុវត្តតាមទ្រឹស្ដី «គិតធំ ធ្វើតូច»។ ដូច្នេះ យើងសង្ឃឹមថា គ្រប់ស្ថាប័នរដ្ឋ អាជ្ញាធរគ្រប់លំដាប់ថ្នាក់ នឹងយល់នូវគោលការណ៍នេះ ហើយអនុវត្តអោយមានប្រសិទ្ធភាព ។
នេះមិនមែនជាគោលការណ៍ធម្មតាទេ គឺជានីតិវិធីដឹកនាំថ្មីមួយ ដែលសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហើបអំពីយុទ្ធសាស្ត្រការងារថ្មីរបស់សម្តេចបែបនេះ ជាបន្តបន្ទាប់នៅក្នុងវេទិកាសាធារណៈមួយចំនួនកន្លងមក ដោយនៅក្នុងនោះ មន្ត្រីខ្លះចាប់អារម្មណ៍ ប៉ុន្តែមន្ត្រីខ្លះទៀតហាក់ឆកល្វែង ប៉ុន្តែនៅពេលចូលរួមជាអធិបតីនៃទិវាគ្រូបង្រៀនលើកទី២៦ នៅវិទ្យាស្ថានបច្ចេកវិទ្យាកម្ពុជា កាលពីថ្ងៃទី០៥ ខែតុលា ឆ្នាំ២០២៣ សម្តេចបានបញ្ជាក់យ៉ាងច្បាស់ៗតែម្តង ។
សម្តេចធិបតី ហ៊ុន ម៉ាណែត បានថ្លែងបញ្ជាក់ថា យុទ្ធសាស្ត្ររបស់សម្តេច គឺឈរលើទ្រឹស្ដី «គិតធំ ធ្វើតូច» ក្នុងន័យនេះ សម្ដេចបានបញ្ជាក់ថា ជាក្របខណ្ឌគោលនយោបាយ រាជរដ្ឋាភិបាលត្រូវតែគិតឱ្យបានគ្រប់ជ្រុងជ្រោយ ប៉ុន្តែការអនុវត្តជាក់ស្ដែង រាជរដ្ឋាភិបាលត្រូវតែជ្រើសរើសគន្លឹះជាអាទិភាព ដើម្បីដាក់ចេញការអនុវត្តឱ្យបានចំទិសដៅប្រកបដោយភាពល្អិតល្អន់។
សម្តេចធិបតី ហ៊ុន ម៉ាណែត បានសង្កត់ធ្ងន់ថា ដូចជាករណីកំណែទម្រង់វិស័យអប់រំជាដើម គឺត្រូវគិតនៅក្នុងកម្រិតម៉ាក្រូ ប៉ុន្តែការអនុវត្តជាក់ស្តែង គឺត្រូវដេញពីកម្រិតមីក្រូមកវិញ ពោលគឺ ត្រូវតែធានាថា គ្រប់សាលារៀនរដ្ឋទាំងអស់ ត្រូវតែមានស្តង់ដា គុណភាព និង គុណធម៌ ដែល អាចទទួលយកបាន ។
សម្តេចធិបតី ក៏បានបញ្ជាក់បន្ថែមថា ជាក់ស្តែង ដូចជាករណីរកទីផ្សារអង្ករជាដើម សម្តេចបានលើកទឹកចិត្ត និងជំរុញអោយធ្វើការងារនេះ មិនមែននៅថ្នាក់កម្រិតជាតិទេ គឺត្រូវចុះទៅស្វែងយល់ទីផ្សារ និងតម្រូវការនៅថ្នាក់មូលដ្ឋាន ។
សម្តេចធិបតី ក៏បានបន្តទៀតថា ករណីនាំអង្ករទៅចិន គឺជាចំណុចមួយដែលគួរតែរិះគិត ពីព្រោះចិនធំ ហើយច្បាស់ណាស់ តម្រូវការអង្ករអាចខុសគ្នាទៅតាមតំបន់ ដូច្នេះការចរចាលក់អង្ករ គួរតែធ្វើនៅតាមគោលដៅ ដើម្បីជំរុញការនាំចេញអោយចំតម្រូវការ ។
ដោយឡែកចំពោះយុទ្ធសាស្ត្រនៃការទាក់ទាញទេសចរណ៍ ក៏គួរតែធ្វើទៅតាមគោលដៅ តាមសក្តានុពលនៃខេត្តនីមួយៗ ជាពិសេសគឺនៅរាជធានីភ្នំពេញ នៅខេត្តសៀមរាប និងខេត្តព្រះសីហនុ ជាដើម។
រឿងទាក់ទាញវិនិយោគពីបរទេសក៏ដូចគ្នា ដោយកាលពីប៉ុន្មានថ្ងៃមុននេះ សម្តេចធិបតី ហ៊ុន ម៉ាណែត ធ្លាប់បានមានប្រសាសន៍ ហើយក៏បានលើកទឹកចិត្តអោយអាជ្ញាធរថ្នាក់ខេត្តនាំគ្នា ប្រឡងប្រណាំងរឿងទាក់ទាញវិនិយោគទុន ដោយសារតែខេត្តនីមួយៗ គឺមានមូលដ្ឋាន និងសក្តានុពលខុសៗគ្នា ។
ផ្អែកតាមអនុសាសន៍នេះ យើងសង្ឃឹមថា ប្រតិបត្តិករ និងទីភ្នាក់ងារប្រតិបត្តិរបស់រដ្ឋទាំងអស់ នឹងគិតគូរឲ្យបានគ្រប់ជ្រុងជ្រោយ ហើយយកមកអនុវត្តឱ្យបានប្រសើរ ដើម្បីយើងទាំងអស់គ្នា។
យុទ្ធសាស្ត្រ «គិតធំ ធ្វើតូច» នេះ អាចថ្មីសម្រាប់កម្ពុជា ប៉ុន្តែនៅក្នុងបរិបទនៃវិទ្យាសាស្ត្រ សេដ្ឋកិច្ច គឺវាគឺជាគំរូ ឬម៉ូដែលនៃការអនុវត្តការងារ និងអាជីវកម្មដែលស៊ីគ្នានឹងទ្រឹស្តី «Think Macro, Act Micro»។ ក្រុមអ្នកជំនាញ បានលើកឡើងថា នៅក្នុងកម្រិត ម៉ាក្រូ រាល់ផែនការ គឺដាច់ខាតត្រូវតែគិតអោយធំទូលាយ ដោយមានទាំងការធ្វើផែនការតាម សេណារីយូការងារ, ការកំណត់អត្តសញ្ញានៃផែនការសកម្មភាព ក៏ដូចជាការធ្វើផែនការ ប្រតិបត្តិជារួម ប៉ុន្តែនៅកម្រិតមីក្រូ គឺចាំបាច់ត្រូវតែគិតទាំងថរិកា និងទំនួលខុសត្រូវរបស់បុគ្គលិក ពោលគឺតាំងពីបញ្ហាតូចតាចឡើង។
នៅពេលដែលគេច្របាច់ផែនការទាំងពីរនេះបញ្ចូលគ្នា វាគឺជាគំរូអាជីវកម្ម ឬផែនការ សកម្មភាពមួយ ដែលមានប្រសិទ្ធភាពខ្ពស់ ដោយសារតែការធ្វើផែនការកម្រិតម៉ាក្រូនេះ គឺបានជួយឲ្យអ្នកអនុវត្តទទួលបានរួចហើយនូវចំណុចគោលដៅធំៗដែលយើងចង់បានដាក់នៅលើតុស្រាប់ ហើយដល់ពេលដែលយើងអនុវត្ត នៅកម្រិតចាប់ពីតូចឡើងមក វានឹងជួយយើងអោយយល់ពីឬសគល់នៃការអនុវត្ត, វិធីសាស្ត្រអនុវត្ត និងប្រតិបត្តិការងារ មានប្រសិទ្ធភាព ដាក់ចំនូវបញ្ហា ដូច្នេះគោលដៅនឹងអាចសម្រេចបាន ហើយក៏អាចនឹងដាក់ចេញបាននូវផែនទីបង្ហាញផ្លូវចំបញ្ហា ដើម្បីដោះស្រាយបញ្ហានៅពេលអនាគតបាន ហើយអាចឈានទៅសម្រេចជោគជ័យ។
នៅពេលនាយករដ្ឋមន្ត្រី បាននិយាយពីយុទ្ធសាស្ត្រ «គិតធំ ធ្វើតូច» នេះហើយ មន្ត្រីទាំងតូចទាំងធំ និងគ្រប់វិស័យ មិនត្រូវខ្ជិលនៅស្ងៀមបានទេ ពួកគេត្រូវតែសកម្ម ហើយធ្វើអោយ សម្រេចយុទ្ធសាស្ត្រនេះ ទើបប្រទេសអាចកាន់តែជឿនលឿន ហើយប្រជាជននឹងកាន់តែមានជីវិតកាន់តែល្អប្រសើរ៕
សរសេរដោយ ៖ ហេង ចេស្តារ
កែសម្រួលដោយ ៖ ប្រេ វីន
ចែករំលែកព័តមាននេះ