បន្ទាប់ពីទទួលរងនូវទឹកភ្លៀងជោកជាំជាច្រើនថ្ងៃជាប់ៗគ្នា រហូតមកដល់ថ្ងៃទី០៥ ខែតុលា ឆ្នាំ២០២៣នេះ គេសង្កេតឃើញប្រជាកសិករមួយចំនួន រស់នៅក្នុងក្រុងប៉ៃលិន ខេត្តប៉ៃលិនបានបង្ខំចិត្តជួលកម្មករឱ្យចូលទៅប្រមូលផលមើមដំឡូងមីនៅក្នុងដីចម្ការរបស់ខ្លួន ខណ:ដែល
ខេត្តប៉ៃលិន ៖ បន្ទាប់ពីទទួលរងនូវទឹកភ្លៀងជោកជាំជាច្រើនថ្ងៃជាប់ៗគ្នា រហូតមកដល់ថ្ងៃទី០៥ ខែតុលា ឆ្នាំ២០២៣នេះ គេសង្កេតឃើញប្រជាកសិករមួយចំនួន រស់នៅក្នុងក្រុងប៉ៃលិន ខេត្តប៉ៃលិនបានបង្ខំចិត្តជួលកម្មករឱ្យចូលទៅប្រមូលផលមើមដំឡូងមីនៅក្នុងដីចម្ការរបស់ខ្លួន ខណ:ដែលមើមដំឡូងខ្លះមិនទាន់គ្រប់ខែ ខ្លះទៀតជិតគ្រប់ខែ ព្រោះកំពុងទទួលរងការរលួយខូចខាតអស់ជាបណ្តើរៗដោយសារតែមានទឹកដក់ក្នុងចម្ការរបស់ខ្លួន ។
បើតាមការរៀបរាប់ពីកសិករម្នាក់ឈ្មោះ វ៉ាន់ សុខ ភេទប្រុស អាយុ៥២ឆ្នាំ រស់នៅក្នុងភូមិអូរខ្ទីង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានឱ្យភា្នក់ងារសារព័ត៌មានយើងដឹងទាំងក្តីបារម្ភយ៉ាងខ្លាំងថា ៖ គាត់បានដាំដំឡូងមីចំនួន៥ហិកតា នៅលើដីចម្ការរបស់ខ្លួនមួយចំនួន និងជួលគេមួយចំនួនទៀត គឺដាំចាប់តាំងពីដើមខែកុម្ភ: ឆ្នាំ២០២៣ មកម្ល៉េះ ដោយក្រោយពីការដាំដំណាំនេះ ទទួលរងការខូចខាតអស់ជាច្រើនលើកច្រើនសារ ព្រោះតែផ្ទៃមេឃបានរាំងភ្លៀងរយ:ពេលយូរ បណ្តាលឱ្យងាប់ ។
លុះពេលដំណាំរបស់ខ្លួនចាប់ផ្តើមដុះលូតលាស់បានល្អ ស្រាប់តែរហូតមកដល់ពេលនេះ ផ្ទៃមេឃក៏ចាប់ផ្តើមធ្លាក់ភ្លៀងឥតស្រាកស្រាន្ត បណ្តាលឱ្យដក់ទឹកពេញផ្ទៃចម្ការ ធ្វើឱ្យមើមដំឡូងមីរបស់ខ្លួន ដែលជិតប្រមូលផលទៅហើយ ទទួលរងការស្អុយរលួយជាបណ្តើរៗ បើសិនជាមិនប្រមូលផលឱ្យទាន់ពេលវេលា គឺអាចនឹងខូចខាតទាំងអស់តែម្តង ។
គាត់បញ្ជាក់ទាំងទឹកមុខក្រៀមស្រពោនទៀតថា ទោះបីជាយ៉ាងណា មើមដំឡូងមីនៅត្រង់កន្លែងខ្លះ ចាប់ផ្តើមស្អុយរលួយអស់ហើយ ណាមួយនៅក្នុងដីចម្ការជ្រៅៗ លំបាកក្នុងការដឹកយកចេញ ព្រោះនៅឆ្ងាយពីផ្លូវ ទោះបីជាគោយន្តកន្ត្រៃ ឬត្រាក់ទ័រ ក៏មិនអាចបើកចូលទៅដឹកមើមដំឡូងមីទាំងនេះបានដែរ ព្រោះដីសើមដក់ទឹកអាចនឹងជាប់ផុងថែមទៀត ។ មានតែរើសដាក់ក្នុងកញ្ឆេ រួចលីចេញទៅថ្នល់ជាតិម្តងបន្តិចៗ ដែលការប្រមូលផលនេះ មិនទាន់សភាពការនោះទេ។ ចំណែកនៅតាមស្តង់នីមួយៗថៅកែទិញមើមដំឡូងមីត្រឹមតែ១គីឡូក្រាម តម្លៃ២.១បាត (ប្រាក់ថៃ) ជាង២០០រៀលប៉ុណ្ណោះ ហើយក៏កាត់ថ្លៃស្អុយខូចខាត ដោយមើមដំឡូងមីទម្ងន់១តោន គេកាត់ភ្នែកជញ្ជីង រហូតដល់២០០គីឡូក្រាមឯណោះ។
ទោះបីជាមេឃកំពុងធ្លាក់ភ្លៀង ក៏ពួកគាត់មិនឈប់បង្អង់ដែរ គឺនាំកម្មករប្រមូលផលទាំងមានទឹកត្រឹមជង្គង់ ហើយនៅថ្ងៃនេះ ទើបតែប្រមូលផលបានជាង១តោនប៉ុណ្ណោះ ខណ:ដែលមើមដំឡូងមីកំពុងលិចលង់ដោយសារទឹកភ្លៀងអស់រយ:ពេលជិតកន្លះខែពេញផ្ទៃចំការតែម្តង ។
សូមបញ្ជាក់ថា រហូតមកដល់ពេលនេះ មើមដំឡូងមីប្រជាពលរដ្ឋទាំងនៅតំបន់ទំនាប ក៏ដូចជាកន្លែងខ្ពស់ៗទូទាំងខេត្តប៉ៃលិន ក៏ទទួលរងការរលួយអស់ជាច្រើនផងដែរ ខណ:ភ្លៀងធ្លាក់ជោកជាំខ្លាំងពេក បណ្តាលឱ្យទឹកដក់នៅក្នុងដីចំការ ឬសើមជាប់ជានិច្ច ។ ដូច្នេះ ទោះបីជាមើមដំឡូងមីមិនទាន់គ្រប់ខែត្រូវប្រមូល ក៏នាំគ្នាប្រមូលទាំងបង្ខំចិត្ត យកទៅលក់បានថវិកាសម្រាប់សងជំពាក់បំណុលគេ និងផ្គត់ផ្គង់ជីវភាពប្រចាំថ្ងៃផងដែរ ៕
ចែករំលែកព័តមាននេះ