សត្វសុនខរបស់លោកចូ បៃដិន ត្រូវបណ្តេញចេញពីសេតវិមាន ក្រោយខាំបុគ្គលិក និងមន្ត្រីជាបន្តបន្ទាប់
សហរដ្ឋអាមេរិក ៖ សុនខរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ដែល
សហរដ្ឋអាមេរិក ៖ សុនខរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) ដែលមានឈ្មោះថា «Commander» លែងមានវត្តមាននៅក្នុងបរិវេណសេតវិមានតទៅទៀតហើយ បន្ទាប់ពីឧប្បត្តិហេតុខាំបុគ្គលិកសេតវិមាន រួមនឹងមន្ត្រីសេវាសម្ងាត់អាមេរិកជាបន្តបន្ទាប់។ នេះបើយោងតាមអ្នកនាំពាក្យរបស់លោកស្រី Jill Biden ស្ត្រីទី១របស់សហរដ្ឋអាមេរិក បានបញ្ជាក់ប្រាប់កាលពីល្ងាចថ្ងៃទី៤ ខែតុលា កន្លងទៅ។
លោកស្រី Elizabeth Alexander បាននិយាយថា «លោក បៃដិន និងភរិយារបស់គាត់យកចិត្តទុកដាក់យ៉ាងខ្លាំងអំពីសុវត្ថិភាពរបស់បុគ្គលិកសេតវិមាន និងអ្នកដែលការពារពួកគាត់ជារៀងរាល់ថ្ងៃ»។
ទោះយ៉ាងណាក៏ដោយ លោកស្រី Alexander មិនបានបញ្ជាក់ថា Commander ត្រូវបានបញ្ជូនទៅទីណានោះទេ ខណៈសុនខពូជ German shepherd អាយុ២ឆ្នាំមួយក្បាលនេះ ត្រូវបានគេឃើញចុងក្រោយបំផុត កាលពីថ្ងៃសៅរ៍សប្តាហ៍ នៅលើយ៉រនៃសេតវិមាន។
សេចក្តីថ្លែងការណ៍របស់លោកស្រី Elizabeth Alexander ធ្វើឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីលោកស្រី Karine Jean-Pierre លេខាធិការសារព័ត៌មាននៃសេតវិមាន ត្រូវបានចោទសួរក្នុងសន្និសីទប្រចាំថ្ងៃកាលពីថ្ងៃទី០៤ ខែតុលា កន្លងទៅ អំពីការចោទប្រកាន់ថ្មីថា សុនខលោក បៃដិន បានខាំបុគ្គលិកសេតវិមាន។
លោក Anthony Guglielmi ប្រធានផ្នែកទំនាក់ទំនងសេវាសម្ងាត់សហរដ្ឋអាមេរិក បាននិយាយថា Commander បានជាប់ពាក់ព័ន្ធនឹងការខាំជាបន្តបន្ទាប់លើបុគ្គលិកសេតវិមាន ខណៈដែលថ្មីៗនេះ បានកើតឡើងកាលពីថ្ងៃទី២៥ ខែកញ្ញា កន្លងទៅ បន្ទាប់ពីមន្ត្រីសេវាសម្ងាត់ម្នាក់ ត្រូវបានខាំនៅសេតវិមានយប់នោះ ហើយត្រូវបានព្យាបាលភ្លាមៗ ដោយបុគ្គលិកពេទ្យ។ Commander ក៏ជាប់ពាក់ព័ន្ធការខាំបុគ្គលិកសេវាសម្ងាត់យ៉ាងហោចណាស់១០ដងផ្សេងទៀត នៅចន្លោះខែតុលា ឆ្នាំ២០២២ ដល់ខែមករា ឆ្នាំ២០២៣។
សូមជម្រាបថា Commander គឺជាសុនខទី២របស់លោក បៃដិន នៅឯសេតវិមាន ដែលមានអាកប្បកិរិយាឈ្លានពាន រួមទាំងខាំបុគ្គលិកសេវាសម្ងាត់ និងបុគ្គលិកសេតវិមាន ខណៈដែលសុនខទី១ ដែលជាពូជ German Shepherd ដែលមានឈ្មោះ Major ក៏ត្រូវបានបញ្ជូនឱ្យទៅរស់នៅជាមួយមិត្តវានៅរដ្ឋដេឡាវែ (Delaware) បន្ទាប់ពីកើតមានឧប្បត្តិហេតុស្រដៀងគ្នានេះ។ Commander គឺជាអំណោយសម្រាប់លោក បៃដិន កាលពីខែធ្នូ ឆ្នាំ ២០២១ ពីប្អូនប្រុសគាត់គឺលោក James Brian Biden៕ (ប្រភពពី AFP)
ចែករំលែកព័តមាននេះ