ទីបំផុត! ប្រធានសភាអាមេរិកត្រូវបានដកហូតតំណែង
សហរដ្ឋអាមេរិក ៖ នេះជាលើកដំបូងហើយក្នុងប្រវត្តិសាស្ត្រនៃសភាអាមេរិក ដែលប្រមុខសភាជាអ្នក
សហរដ្ឋអាមេរិក ៖ នេះជាលើកដំបូងហើយក្នុងប្រវត្តិសាស្ត្រនៃសភាអាមេរិក ដែលប្រមុខសភាជាអ្នកសាធារណរដ្ឋម្នាក់លោកKEVIN MCCARTHY ត្រូវបានដកហូតតំណែងកាលពីថ្ងៃទី៣តុលា ដោយសារជម្លោះផ្ទៃក្នុងគណបក្សលោក។ គួររំលឹកថា សមាជិកសភាម្នាក់ដាក់ញត្តិដកតំណែងប្រធានសភាអាមេរិក
បន្ទាប់ពីការជជែកដេញដោលគ្នាតឹងតែងរវាងបណ្ដាសមាជិកសភាអភិរក្សនិយម សមាជិកសភា២១៦រូបបានបោះឆ្នោតគាំទ្រការដកតំណែងប្រធានសភា ក្នុងនោះមានអ្នកសាធារណរដ្ឋ៨រូប ទាល់នឹងសំឡេងប្រឆាំង២១០។ ភ្លាមៗក្រោយលទ្ធផលនៃការបោះឆ្នោតលើញត្តិទាមទារឲ្យដកតំណែងប្រធានសភា ដាក់ដោយសមាជិកសភារដ្ឋផ្លរីដា ជាអ្នកនិយមតឹង មកពីគណបក្សសាធារណរដ្ឋលោក KEVIN MCCARTHY នៅតែញញឹមដោយបណ្ដាសមាជិកសភានៃគណបក្សលោក បាននាំគ្នាចោមរោមឱបនិងចាប់ដៃលោក។
ការបោះឆ្នោតដកតំណែងប្រធានសភានេះបានបើកដំណាក់កាលវិលក្បុងមួយក្នុងសភាអាមេរិក ដោយអ្នកជំនួសតំណែងប្រធានសភា ត្រូវជ្រើសរើសនាសប្ដាហ៍ខាងមុខ។ លោក KEVIN MCCARTHYប្រកាសរួចហើយកាលពីយប់ថ្ងៃទី៣តុលាថា លោកមិនឈរឈ្មោះសម្រាប់តំណែងប្រធានសភាទៀតឡើយក៏ទោះបីបែបបទសភាអនុញ្ញាតក្ដី។
ញត្តិទាមទារដកតំណែងលោក KEVIN MCCARTHYដាក់ដោយលោកMATT GAETZ ដែលជាមនុស្សជិតដិតនឹងលោកដូណាល់ត្រាំ ក្នុងចំណោមសមាជិកសភាស្និទ្ធអតីតប្រធានាធិបតីរូបនេះ២០នាក់ក្នុងសភា។ ញត្តិត្រូវបានដាក់ក៏ព្រោះតែប្រធានសភារូបនេះ ក្នុងនាទីចុងក្រោយជាអ្នកសម្របសម្រួល ឲ្យមានការបោះឆ្នោតគាំទ្រវិធានការឲ្យរដ្ឋាភិបាលសហព័ន្ធគេចផុតពីការផ្ដាច់ហិរញ្ញវត្ថុ៕
ចែករំលែកព័តមាននេះ