ខេត្តបាត់ដំបង ៖ ទូកប្រណាំងដែលជាប្រភេទទូកងវែងជាងគេលំដាប់អន្តរជាតិមានចំណុះរហូតដល់ជាង៧០នាក់ មានរហស្សនាម «នរិន្ទរង្សី ពិជ័យចិត្របុត្រ» ប្រចាំវត្តឯករង្សី នៅក្នុងស្រុកឯកភ្នំ ដែលមានប្រវត្តិមិនធ្លាប់ចាញ់ម្ដងសោះ ពេលនេះ…
ខេត្តបាត់ដំបង ៖ ទូកប្រណាំងដែលជាប្រភេទទូកងវែងជាងគេលំដាប់អន្តរជាតិមានចំណុះរហូតដល់ជាង៧០នាក់ មានរហស្សនាម «នរិន្ទរង្សី ពិជ័យចិត្របុត្រ» ប្រចាំវត្តឯករង្សី នៅក្នុងស្រុកឯកភ្នំ ដែលមានប្រវត្តិមិនធ្លាប់ចាញ់ម្ដងសោះ ពេលនេះ កំពុងរងការខូចខាតដោយសារដើមឈើរលំសង្កត់លើ ដែលគេមិនទាន់ហ៊ានសន្និដ្ឋានបានថា តើទូកប្រណាំងខ្នាតអន្តរជាតិដ៏ខ្លាំងក្លាមួយនេះ នឹងអាចចូលរួមប្រកួតក្នុងពិធីបុណ្យ«អកអំបុក បណ្ដែតប្រទីប សំពះព្រះខែ» ដែលប្រារព្វធ្វើនៅចុងខែតុលាខាងមុខនេះបានដែរ ឬយ៉ាងណានោះទេ ?
អាក់ខោនហ្វេសប៊ុករបស់វត្តឯករង្សី ឈ្មោះ «នរិន្ទរង្សី ពិជ័យចិត្របុត្រ» បានបង្ហោះរូបភាពប៉ុន្មានប្លង់ជាសាធារណៈជូនដល់ចំណុះទូកទាំងអស់ និងមហាជនឲ្យបានជ្រាបដែលនិយាយពីទូកប្រណាំងដ៏ខ្លាំងមួយនេះ រងគ្រោះដោយសារដើមពង្ររលំសង្កត់លើ់ ។ កោះសន្តិភាពមិនអាចទំនាក់ទំនងសុំការបំភ្លឺបន្ថែម ពីព្រះតេជគុណចៅអធិការវត្តឯករង្សី ព្រះនាម ចោម ចិត្រ បានទេនៅព្រឹកថ្ងៃទី០៣ តុលា ជុំវិញការខូចខាតទូកងដីល្បីល្បាញនេះ។
ប៉ុន្តែបើយោងការអត្ថាធិប្បាយអមដោយរូបភាពប៉ុន្មានប្លង់ផង នៅក្នុងអាក់ខោនហ្វេសប៊ុក«នរិន្ទរង្សី ពិជ័យចិត្របុត្រ» បានសរសេរថា «យប់មិញម៉ោងជិត១២ ភ្លៀងនិងខ្យល់ខ្លាំង បានរលំដើមពង្រសង្កត់ទូកង នរិន្ទរង្សី ពិជ័យចិត្របុត្រហើយ។ មិនទាន់ដឹងស្ថានភាពខូចខាតប៉ុនណាទេ ពេលនេះ កំពុងសង្គ្រោះបឋម សូមចំណុះទូកនិងអ្នកស្រលាញ់គាំទ្រជ្រាប» ។
គ្មានប្រវត្តិចាញ់ម្ដងណាសោះ ទូកងប្រចាំវត្តឯករង្សី ស្ថិតក្នុងស្រុកឯកភ្នំ មានប្រវែង៣៤ម៉ែត្រ និង មានចំណុះ៧៥នាក់។ ទូកងដែលមានរហស្សនាម «នរិន្ទរង្សី ពិជ័យចិត្របុត្រ» តែងចូលរួមប្រកូតប្រជែងមិនដែលខកខានម្ដងណាទេ នៅក្នុងពីធីបុណ្យ «អុំទូក អកអំបុក បណ្ដែតប្រទីប សំពះព្រះខែ» ដែលជាពិធីបុណ្យប្រពៃណីខ្មែរដ៏ធំនិងដ៏ពេញនិយមបំផុត ហើយទូកខ្នាតអន្តរជាតិមួយនេះ តែងទទូលបានជ័យជំនះគ្រប់កម្មវិធីប្រណាំង រហូតធ្វើឲ្យគូរប្រជែងខ្លះខ្លបខ្លាចទៀតផង។
សូមកត់សម្គាលថា ភ្លៀងដែលលាយឡំដោយខ្យល់បោកបក់ខ្លាំងផង បានចាប់ផ្ដើមធ្លាក់ខ្លាំង ចាប់តាំងពីព្រលប់ថ្ងៃទី០២ តុលា រហូតដល់ព្រឹកថ្ងៃទី០៣ តុលា ទើបធូរស្បើយ។ ស្ទើរទូទាំងខេត្តបាត់ដំបង បានរងនូវសម្ពាធទាបនេះ ធ្វើឲ្យជន់លិចស្ទើរគ្រប់ទីកន្លែង ។ ទោះយ៉ាងណា ពាក់ព័ន្ធនឹងករណីដើមពង្ររលំសង្កត់លើទូកង ប្រចាំវត្តឯករង្សីខាងលើនេះ បើតាមប្រភពព័ត៌មាន ពីកីឡកចំណុះទូកខ្នាតអន្តរជាតិមួយនេះ បានឲ្យដឹងដែរថា តាមការពិនិត្យជាក់ស្ដែង ដើមឈើដែលរលំលើទូក ហាក់មិនខូចខាតធ្ងន់ធ្ងរទេ អាចជួសជុលប្រើប្រាស់វិញបាន ។
ពេលនេះ ជាងកំពុងធ្វើការជួសជុលហើយ និងសង្ឃឹមថា ទូកងលំដាប់អន្តរជាតិ «នរិន្ទរង្សី ពិជ័យចិត្របុត្រ» នឹងមានវត្តមានក្នុងពិធីបុណ្យ «អុំទូក អកអំបុក បណ្ដែតប្រទីប សំពះព្រះខែ» ដែលនឹងប្រារព្វធ្វើនៅចុងខែតុលាខាងមុខនេះ មិនខកខានឡើយ ៕
ចែករំលែកព័តមាននេះ