ខេត្តសៀមរាប៖ គ្រឹះស្ថានអង្គរ ដែលជាក្រុមហ៊ុនរដ្ឋ បានប្រកាសថា ក្នុងខែកញ្ញា ឆ្នាំ២០២៣ ចំនួនភ្ញៀវទេសចរបរទេស បានទិញបណ្ណចូលទស្សនារមណីយដ្ឋានអង្គរ នៅខេត្តសៀមរាប មានចំនួន ៤១០៤៨នាក់ ដោយទទួលបានចំណូល ១ ៨៦៣​ ៤៦៦ដុល្លារ។ ពោលគឺចំនួន​អ្នកទេសចរ​បរទេស ចូលទស្សនារមណីយដ្ឋានអង្គរ បានកើនឡើង ៧៤,០៦% ធៀបនឹងខែកញ្ញា ឆ្នាំ២០២២ ហើយចំណូល បានកើន ១០៣,០៨% ធៀបនឹងខែកញ្ញា ឆ្នាំ២០២២។​

របាយការណ៍របស់​គ្រឹះស្ថានអង្គរ ក៏បានបង្ហាញថា រយៈពេល ៩ខែ ក្នុងឆ្នាំ២០២៣ នេះ ចំនួនភ្ញៀវទេសចរបរទេស ដែលបានចូលទស្សនារមណីយដ្ឋានអង្គរ មានចំនួន ៥៣៩ ៥៦១​នាក់ ដោយទទួលបានចំណូលសរុប ២៤ ៩៥៥ ៣៩៧​ដុល្លារ​។ ទាំងចំនួនអ្នកទេសចរបរទេស និងចំណូល​ ក្នុងរយៈពេល ៩ខែ ក្នុងឆ្នាំ២០២៣ គឺកើនឡើងជាង ៣០០% បើប្រៀបធៀបនឹង ៩ខែ ក្នុងឆ្នាំ២០២២​។

ក្រៅពីនេះ គ្រឹះស្ថានអង្គរ ក៏បានប្រកាសពីចំណូលពីការលក់​បណ្ណ នៅប្រាសាទកោះកែរ ឬប្រាសាទកោះកេរ នៅក្នុងខេត្តព្រះវិហារ សម្រាប់ខែកញ្ញា ឆ្នាំ២០២៣ មានចំនួន ៦៣៥នាក់ ដែលទទួលបានចំណូល ៩៥២៥​ដុល្លារ​។ ក្នុងនោះ សរុបចំណូល​លក់បណ្ណ នៅប្រាសាទកោះកែរ រយៈពេល ៩ខែ ក្នុងឆ្នាំ២០២៣ មានចំនួន ៨៨៣០នាក់ ទទួលបានចំណូល ១៣២ ៤៥០ដុល្លារ​។

ទន្ទឹមនឹងនេះ គ្រឹះស្ថានអង្គរ ក៏បានប្រកាសពីការលក់សំបុត្រទូក នៅតំបន់ទេសចរណ៍កំពង់ផែ​ចុងឃ្នៀស នៅខេត្តសៀមរាប នៅក្នុងខែកញ្ញា មានចំនួន ២៧៩៥៧​ដុល្លារ​។ បើសរុបចំណូល​លក់សំបុត្រទូក រយៈពេល ៩ខែ ក្នុងឆ្នាំ២០២៣ នេះ មានចំនួន ៣៩៥ ៩៣៩​ដុល្លារ៕