ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រកាស ជូនដំណឹងដល់​ម្ចាស់ ឬនាយកសហគ្រាស គ្រឹះស្ថាន​ទាំងអស់ ដែល​ស្ថិតក្នុងដែន​អនុវត្តនៃច្បាប់ ស្តីពី ការងារ ​ឱ្យបានជ្រាបថា លោក លោកស្រី ជាម្ចាស់ ឬនាយកសហគ្រាស គ្រឹះស្ថាន​ ត្រូវអនុញ្ញាត​ឱ្យ​កម្មករនិយោជិតទាំងអស់របស់ខ្លួន ឈប់សម្រាកដោយមានប្រាក់ឈ្នួល​ នាឱកាស​ពិធីបុណ្យ​ភ្ជុំបិណ្ឌខាងមុខនេះ ក្នុងរយៈពេល ៣ថ្ងៃ គឺថ្ងៃទី១៣-១៤ និងថ្ងៃទី១៥ ខែតុលា ឆ្នាំ២០២៣​។ ក្នុងរយៈពេល ៣ថ្ងៃឈប់សម្រាកពីការងារនេះ ថ្ងៃទី១៤-១៥តុលា គឺចំថ្ងៃសៅរ៍-ថ្ងៃអាទិត្យ ដែលមិនមានលើកថ្ងៃឈប់សម្រាកនោះឡើយ។​

សេចក្តីប្រកាសរបស់ក្រសួងការងារ បន្តថា ចំពោះសហគ្រាស គ្រឹះស្ថានទាំងឡាយណា ដែលកម្មវត្ថុអាជីវកម្ម​ មានចរិតលក្ខណៈសកល ត្រូវប្រព្រឹត្តទៅជាប្រចាំ និងមិនអាចបញ្ឈប់​សកម្មភាព​បាន ហើយការឈប់សម្រាក​បុណ្យនៃកម្មករនិយោជិតទាំងអស់ ព្រមគ្នា ក្នុងពេលតែមួយ នាំឱ្យខូច​ប្រយោជន៍ដល់សាធារណជន ឬក៏ធ្វើឱ្យ​ខូច​ដំណើរការ​របស់សហគ្រាស គ្រឹះស្ថាន នោះម្ចាស់​​ ឬនាយក​សហគ្រាស គ្រឹះស្ថានត្រូវរៀបចំ​បែងចែកឱ្យកម្មករ​និយោជិត បានឈប់សម្រាក​ទៅតាម​ថ្ងៃបុណ្យ​នីមួយៗ ដោយផ្លាស់វេនគ្នា​។

ក្រសួងការងារ បានបញ្ជាក់ថា កម្មករនិយោជិត ដែលធ្វើការថ្ងៃឈប់​បុណ្យភ្ជុំបិណ្ឌនេះ មានសិទ្ធិទទួល​នូវប្រាក់បំណាច់បន្ថែម ដែល​មានចំនួនស្មើនឹង​ប្រាក់ឈ្នួល​ថ្ងៃធ្វើការធម្មតា។ ម្ចាស់ ឬនាយក​សហគ្រាស គ្រឹះស្ថាន ត្រូវរៀបចំបញ្ជីឈ្មោះកម្មករនិយោជិត ដែលត្រូវផ្លាស់ប្តូរគ្នាឈប់សម្រាក តាមកាលបរិច្ឆេទនីមួយៗខាងលើ និងរក្សាទុកជាប្រចាំ​សម្រាប់ការត្រួតពិនិត្យរបស់អធិការ​​ការងារ​។

ក្រសួងការងារ និងបណ្តុះបណ្តាលវិជ្ជាជីវៈ ក៏បានបន្ថែមថា ក្នុងករណី​មានការព្រមព្រៀង​គ្នារវាង​កម្មករនិយោជិតសាមី និងនិយោជក ឬមានចែងក្នុងបទបញ្ជាផ្ទៃ​ក្នុងរបស់​សហគ្រាស គ្រឹះស្ថាន​ ឬអនុសញ្ញារួម ការឈប់​សម្រាករបស់កម្មករ​និយោជិត អាចអនុវត្តនៅពេលណាមួយផ្សេងទៀត ដែល​ខុសពីថ្ងៃឈប់សម្រាកបុណ្យ ដូចមានកំណត់ក្នុងប្រកាស ស្តីពី ការឈប់បុណ្យ ដែលមានប្រាក់ឈ្នួលប្រចាំឆ្នាំ២០២៣៕