ទីតាំងរោងចក្រ ឬរោងសិប្បកម្មមួយកន្លែង ដែលពីមុនធ្លាប់ផលិតដំណាប់ស្វាយ ក្រោយមកបានវិវត្តន៍ខ្លួនទៅជាក្លិបកម្សាន្តខារ៉ាអូខេ មហាសប្បាយ មហារលាយ ក្នុងនោះផងដែរ ត្រូវបានប្រភពសមត្ថកិច្ចមូលដ្ឋានលួ.ចបង្ហើបថា
ខេត្តកំពង់ស្ពឺ ៖ ទីតាំងរោងចក្រ ឬរោងសិប្បកម្មមួយកន្លែង ដែលពីមុនធ្លាប់ផលិតដំណាប់ស្វាយ ក្រោយមកបានវិវត្តន៍ខ្លួនទៅជាក្លិបកម្សាន្តខារ៉ាអូខេ មហាសប្បាយ មហារលាយ ក្នុងនោះផងដែរ ត្រូវបានប្រភពសមត្ថកិច្ចមូលដ្ឋានលួ.ចបង្ហើបថា «ទីតាំងផលិតដំណាប់ស្វាយពីមុននោះ តាមបណ្ដោយផ្លូវជាតិលេខ៣ ពីភ្នំពេញទៅកំពត ចន្លោះគីឡូម៉ែត្រ៣២ និង៣៣ ស្ថិតនៅក្នុងឃុំអង្គពពេល ស្រុកគងពិសី ខេត្តកំពង់ស្ពឺ។ ពេលនេះក្លាយទៅជាក្លិបកម្សាន្ត និង (KTV) មានបង្ក.ប់ទៅដោយល្បែ.ងស៊ីសងគ្រប់ប្រភេទនោះ មិនដែលឃើញមានសមត្ថកិច្ចជំនាញចុះទៅធ្វើការពិនិត្យ និងបង្ក្រាបទាល់តែសោះ ដូចត្រូវដងត្រូវផ្លែគ្នា។ និយាយរួមតាំងពីសមត្ថកិច្ចថ្នាក់ក្រោម រហូតដល់លើតែម្តង។ ចំពោះអ្នកកាសែតអត់ហ៊ានទៅក្បែរទេ ពួកគេមានឆ្មាំបម្រើកា.ចៗណាស់ ។ លួចថតបានតែពីចម្ងាយនូវរថយន្តភ្ញៀវតែប៉ុណ្ណោះ។
យោងតាមប្រភពពីក្រុមអ្នករត់តាក់ស៊ី បានខ្សឹបប្រាប់ឱ្យដឹងថា ទីតាំងខាងលើ តាមដែលជនជាតិចិន ជិះតាក់ស៊ីពួកគាត់និយាយថា ពួកគេមិនត្រឹមតែមកច្រៀងខារ៉ាអូខេប៉ុណ្ណោះទេ គោលបំណងធំបំផុត គឺមកលេងល្បែ.ងគ្រប់ប្រភេទតែម្តង។
ក្រុមអ្នករត់តាក់ស៊ី ដែលដឹកជនជាតិចិនមកទីនេះ បាននិយាយតៗគ្នាថា ជនជាតិចិនភាគច្រើនធ្វើដំណើរមកពីតាមបណ្តាខេត្ត ដូចជា ៖ ខេត្តសៀមរាប កំពង់សោម និងកំពតជាដើម។ល។ ពេលធ្វើដំណើរមក ម្នាក់ៗមានលុយពេញៗហោប៉ៅ ប៉ុន្តែពេលត្រឡប់ទៅវិញ សូម្បីតែលុយហូបបាយក៏គ្មានផង។
ក្រុមអ្នករត់តាក់ស៊ីដដែល បានបន្តទៀតថា ពួកគាត់ដឹកជនជាតិចិនយូរៗទៅ ពេលណាគេលេងល្បែ.ងឈ្នះ ក៏បានថ្លៃឈ្នួលតាក់ស៊ីតាមនឹងទៅ ប៉ុន្តែបើលេងល្បែ.ងចា.ញ់វិញ ជួនកាល ខ្ចីលុយអ្នករត់តាក់ស៊ីក៏មានដែរ។
ដោយឡែកក្រុមសន្តិសុខ ដែលយាមកាមនៅខ្លោងទ្វារ ក៏បានប្រាប់ផងដែរថា ពួកគាត់ត្រូវបានខាងរោងចក្រជួលឱ្យយាម និងដាក់បទបញ្ជាយ៉ាងដាច់ណាត់ ហាមមិនឱ្យមានសមត្ថកិច្ច និងជនជាតិខ្មែរណាមួយ ជាពិសេសអ្នកកាសែតចូលទៅក្នុងរោងចក្រជាដាច់ខាត មុននឹងចូលត្រូវទំនាក់ទំនងជាមួយអ្នកគ្រប់គ្រងជាមុនសិន មកលេងល្បែ.ង ឬមកថត។
ជាក់ស្តែង កាលពីពេលកន្លងទៅថ្មីៗ ក៏មានសមត្ថកិច្ចមួយក្រុម បានចុះទៅធ្វើការសួរនាំ ពេលនោះខាងសន្តិសុខបានឆ្លងយោបល់ទៅអ្នកគ្រប់គ្រងក្នុងរោងចក្រនោះ ដែលបច្ចុប្បន្នជាក្លិបកម្សាន្តនោះ ប៉ុន្តែត្រូវបានបដិសេធ និងបានដេញឱ្យចាកចេញពីមុខរោងចក្រថែមទៀតផង។
ចំណែកប្រភពព័ត៌មានពីសមត្ថកិច្ចមួយរូប ប្រចាំការនៅក្នុងស្រុកគងពិសី ក៏បានបង្ហើបផងដែរថា កាលពីពេលកន្លងទៅថ្មីៗនេះ ពិតជាមានក្រុមការងារចុះទៅស្នើសុំធ្វើការត្រួតពិនិត្យមែន ប៉ុន្តែមិនត្រូវបានខាងរោងចក្រឱ្យចូលនោះទេ ទីតាំងដែលសង្ស័យមានបង្កប់ល្បែ.ងស៊ីសងគ្រប់ប្រភេទនេះ តាមដឹង គឺក្រុមជនជាតិចិនបានសែនព្រេនជូនអ្នកតាធំៗអស់ហើយ បើគ្មានការសែនព្រេនទេនោះ ច្បាស់ជាអ្នកតាទាំងអស់នោះ ប្រើអាគាំងឱ្យចុះទៅកកូរកកាយបាត់ទៅហើយ។ និយាយជារួម ការបណ្តែតបណ្តោយឱ្យមានការបើកល្បែ.ងស៊ីសងគ្រប់ប្រភេទខុសច្បាប់បែបនេះ មានការត្រូវរ៉ូវជាប្រព័ន្ធអស់ទៅហើយ ទើបមានភ្លើងខៀវឱ្យដំណើរការបានបែបនេះ។
ជាមួយគ្នានេះដែរ មន្ត្រីនគរបាលប៉ុស្តិ៍មួយរូប ក៏បានព្រលយពាក្យនិយាយបែបលែបខាយថា កញ្ចុះ ច្រវ៉ា ដូចគាត់នេះ មិនហ៊ានទៅក្បែរគេនោះទេ ព្រោះចំណីៗធំគេបោះទៅឱ្យត្រីរ៉ស់ ត្រីឆ្តោ អស់ទៅហើយ ល្មមៗហ៊ានតែទៅក្បែរ ត្រឡប់មកវិញច្បាស់ជាត្រូវមាត់ថ្នាក់លើជាក់ជាមិនខានឡើយ។
នេះជាព័ត៌មានដែលយើងទទួលបានពីបណ្តាញប្រជាពលរដ្ឋល្អ យើងនឹងស្វែងរកព័ត៌មានជាក់លាក់មកបង្ហាញជូនមហាជន ក៏ដូចជាថ្នាក់ដឹកនាំឱ្យបានជ្រាបកាន់តែច្បាស់ ចៀសវាងកុំឱ្យមានការចោទប្រកាន់ថា អ្នកសារព័ត៌មានលំអៀង។ ហើយចំពោះព័ត៌មានជាក់លាក់ គឺមានតែសមត្ថកិច្ច និងស្ថាប័នពាក់ព័ន្ធចុះទៅត្រួតពិនិត្យ និងធ្វើការបង្ក្រាបបង្ហាញមហាជនឱ្យបានជ្រាបតែប៉ុណ្ណោះ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ