Apple កំណត់អំពីបញ្ហា បណ្ដាលឱ្យស៊េរី iPhone 15 ឡើងកម្តៅខ្លាំង
សហរដ្ឋអាមេរិក ៖ ក្រុមហ៊ុន Apple កាលពីថ្ងៃទី៣០ ខែកញ្ញា ឆ្នាំ២០២៣ កន្លងទៅ បានប្រកាសថា
សហរដ្ឋអាមេរិក ៖ ក្រុមហ៊ុន Apple កាលពីថ្ងៃទី៣០ ខែកញ្ញា ឆ្នាំ២០២៣ កន្លងទៅ បានប្រកាសថា
សហរដ្ឋអាមេរិក ៖ ក្រុមហ៊ុន Apple កាលពីថ្ងៃទី៣០ ខែកញ្ញា ឆ្នាំ២០២៣ កន្លងទៅ បានប្រកាសថា ខ្លួនបានរកឃើញបញ្ហាមួយចំនួន ដែលបណ្តាលឱ្យទូរស័ព្ទ iPhone 15 ដែលស៊េរីចុងក្រោយបំផុតរបស់ខ្លួន ឡើងក្តៅជាងការរំពឹងទុក រួមទាំងបញ្ហាកម្មវិធីដំណើរការនៅក្នុង iOS 17 ដែលនឹងត្រូវជួសជុលក្នុងការធ្វើបច្ចុប្បន្នភាព (Update) នាពេលខាងមុខ។
បន្ទាប់ពីមានការត្អូញត្អែរយ៉ាងច្រើនពីអ្នកប្រើប្រាស់ថា iPhone ស៊េរីចុងក្រោយបំផុតឡើងកំដៅខ្លាំង អំឡុងពេលប្រើប្រាស់ និងពេលសាកថ្មនោះ កាលពីពេលថ្មីៗនេះ Apple ដែលជាក្រុមហ៊ុនបច្ចេកវិទ្យាពហុជាតិដ៏ធំបំផុតរបស់សហរដ្ឋអាមេរិក បានបញ្ជាក់ថា iPhone ស៊េរីថ្មីរបស់ខ្លួន អាចក្តៅខ្លាំងក្នុងរយៈពេល ២-៣ ថ្ងៃដំបូង បន្ទាប់ពីដំឡើង (Setting Up) ឬការស្តារប្រតិបត្តិការឡើងវិញ (Restoring) ។
ក្រុមហ៊ុនបន្ថែមទៀតថា បញ្ហាមួយផ្សេងទៀតពាក់ព័ន្ធនឹងការធ្វើបច្ចុប្បន្នភាពថ្មីៗ មួយចំនួន ចំពោះកម្មវិធីភាគីទី៣ (Third-party Apps) ដែលបណ្តាលឱ្យទូរស័ព្ទផ្ទុកលើសទម្ងន់ប្រព័ន្ធប្រតិបត្តិការ។ នៅត្រង់ចំណុចនេះ ក្រុមហ៊ុនបានបញ្ជាក់ថា ខ្លួនកំពុងធ្វើការជាមួយនឹងអ្នកបង្កើតកម្មវិធីលើការជួសជុល ដែលកំពុងដំណើរការ។ កម្មវិធីភាគីទី៣ ដែលបានបង្កបញ្ហារួមមានហ្គេម Asphalt 9 កម្មវិធី Instagram និងកម្មវិធី Uber ខណៈដែលកម្មវិធី Instagram បានដោះស្រាយបញ្ហាជាមួយកម្មវិធីរបស់ខ្លួនរួចហើយ កាលពីថ្ងៃទី២៧ ខែកញ្ញា កន្លងទៅ។ បន្ថែមលើសពីនេះទៀត ការជួសជុលកំហុស iOS 17 នាពេលខាងមុខ នឹងមិនកាត់បន្ថយដំណើរការ ដើម្បីដោះស្រាយបញ្ហាឡើងកម្តៅរបស់ iPhone នោះទេ។
ក្រុមហ៊ុនដែលមានទីស្នាក់ការកណ្តាលនៅក្នុងទីក្រុង Cupertino រដ្ឋកាលីហ្វ័រញ៉ាមួយនេះ បានគូសបញ្ជាក់ថា iPhone 15 Pro និង Pro Max មិនទទួលរងការឡើងកំដៅខ្លាំង ដោយសារតែការរចនារបស់វានោះទេ (Design) ផ្ទុយទៅវិញសំបកទីតានីញ៉ូមថ្មី នាំឱ្យការសាយភាយកំដៅមានភាពប្រសើរឡើង បើប្រៀបធៀបទៅនឹងម៉ូដែលពីមុន ដែលត្រូវបានរចនាឡើងពីដែកអ៊ីណុក។ បញ្ហានេះមិនមែនជាហានិភ័យសុវត្ថិភាព ឬបង្កគ្រោះថ្នាក់ដល់អ្នកប្រើប្រាស់នោះទេ ហើយនឹងមិនប៉ះពាល់ដល់ដំណើរការប្រើប្រាស់រយៈពេលវែងរបស់ iPhone ផងដែរ៕ (ប្រភពពី Reuters)
ចែករំលែកព័តមាននេះ