ភ្នំពេញ៖ ក្នុងសារជាសំឡេង ផ្ញើជូន​គណៈរដ្ឋមន្ត្រី នាយប់ថ្ងៃទី២៧ ខែកញ្ញា ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រី បានប្រកាសថា មកដល់ពេលនេះ គោលការណ៍ ដែលត្រូវអនុវត្តក្នុងការយកពន្ធលើប្រាក់ចំណេញ ឬចំណេញមូលធន គឺរាជរដ្ឋាភិបាល មិនទាន់សម្រេច​នៅឡើយទេ​។

សម្តេចធិបតី ហ៊ុន ម៉ាណែត បានលើកឡើងថា នៅក្នុងខែវិច្ឆិកាខាងមុខនេះ សម្តេច នឹងធ្វើវេទិការវាងរាជរដ្ឋាភិបាល និងវិស័យ​ឯកជន ដើម្បីស្តាប់នូវការលំបាក និងសំណូមពររបស់វិស័យឯកជន ហើយរាជរដ្ឋាភិបាល នឹងត្រៀមដាក់ចេញវិធានការ ក្នុងការជួយ​គាំទ្រ និងដោះស្រាយសម្រាប់វិស័យឯកជន។ ក្នុងនោះ ក៏មានពាក់ព័ន្ធនឹងពន្ធដារនេះផងដែរ​។

ក្នុងសារជាសំឡេងដដែល សម្តេចធិបតី ហ៊ុន ម៉ាណែត បានបញ្ជាក់ថា តាំងពីបង្កើត​រាជរដ្ឋាភិបាលថ្មី កាលពីថ្ងៃទី២២ ខែកញ្ញា ឆ្នាំ២០២៣ រហូតដល់ពេលនេះ មិនមានការបង្កើត​ពន្ធថ្មី ឬក៏បង្កើនអត្រាពន្ធ ដើម្បីដាក់បន្ទុក​លើវិស័យឯកជន ឬក៏លើប្រជាពលរដ្ឋនោះទេ​។

សម្តេចធិបតី ហ៊ុន ម៉ាណែត បានបញ្ជាក់ថា «ពន្ធនេះ មិនមែនជាពន្ធប្រភេទថ្មី ដែលត្រូវបាន​បង្កើតឡើងទេ​ ហើយកន្លងទៅ យើងបានពន្យារក្នុងការអនុវត្តរយៈពេល ៣ឆ្នាំកន្លងមកហើយ រហូតដល់ដើមឆ្នាំ២០២៤ ដូចដែលតាមអ្វីដែលឯកឧត្តមអគ្គនាយកនៃអគ្គនាយកដ្ឋានពន្ធដារ បានថ្លែងនៅក្នុងបទសម្ភាស នោះគឺគ្រោងនឹងអនុវត្ត នៅដើមឆ្នាំ២០២៤ ក្នុងករណី មិនមានការ​ប្រែប្រួល។ ​ចំពោះការអនុវត្តជាក់ស្តែង ខ្ញុំសូមបញ្ជាក់ថា គោលការណ៍ចុងក្រោយ ដែលត្រូវ​អនុវត្តនោះ គឺមិនទាន់មានការសម្រេចរបស់រាជរដ្ឋាភិបាល​ទេ ដែលត្រូវអនុវត្ត ឆ្នាំ២០២៤ ឬកែសម្រួល​យ៉ាងណា»។

សម្តេចធិបតី ហ៊ុន ម៉ាណែត បន្ថែមថា «កិច្ចការងារនេះ គឺ​ខ្ញុំ​បានប្រគល់ភារកិច្ចជូន​ឯកឧត្តមអគ្គបណ្ឌិត​សភាចារ្យ អូន ព័ន្ធមុនីរ័ត្ន តាំងពីថ្ងៃប្រជុំដំបូងនៃគណៈរដ្ឋមន្ត្រីដំបូង ថ្ងៃទី២៤ ខែ៨ ឆ្នាំ២០២៣ ដែលខ្ញុំគ្រោងធ្វើ​វេទិកា​រាជរដ្ឋាភិបាល និងវិស័យ​ឯកជន នៅខែ១១ខាងមុខនេះ ដែលនឹងត្រូវពិនិត្យទៅលើកញ្ចប់វិធានការមួយចំនួន ដើម្បីជួយទៅដល់វិស័យ​ឯកជន ដែលជាចលករមួយសំខាន់​សម្រាប់សេដ្ឋកិច្ចរបស់យើង ហើយក្នុងនោះ ខ្ញុំបានប្រគល់​ភារកិច្ចជូនឯកឧត្តមអគ្គបណ្ឌិត​សភាចារ្យ អូន ព័ន្ធមុនីរ័ត្ន​ និងក្រុមការងារ ដើម្បីធ្វើការពិគ្រោះ​យោបល់ជាបន្តបន្ទាប់គ្រប់ភាគីពាក់ព័ន្ធ នៅក្នុងវិស័យឯកជន ដើម្បីស្តាប់នូវសំណូមពរ​ផ្សេងៗពីវិស័យឯកជន ដើម្បីយើងយកមកពិចារណា ហើយ​រៀបចំជាកញ្ចប់វិធានការ​ជួយទៅដល់វិស័យ​ឯកជន ក៏ដូចជាការលើកទឹកចិត្តផ្សេងៗ ដែលក្នុងនោះ ក៏មានការជជែកគ្នាអំពី​បញ្ហាពន្ធអាករ បញ្ហាលើកទឹកចិត្តផ្សេងៗផងដែរ ដែលគ្រោងនឹងប្រកាស នៅពេលដែលខ្ញុំជួប​ជាមួយវិស័យ​ឯកជន នៅខែ១១ ខាងមុខនេះ​»។

សូមរម្លឹកថា ការចេញមកបញ្ជាក់របស់សម្តេចធិបតី ហ៊ុន ម៉ាណែត ខាងលើនេះ គឺខណៈដែលមាន​ការលើកឡើងច្រើន ក្នុងរយៈពេលប៉ុន្មានថ្ងៃមកនេះ ពីសំណាក់មហាជនទូទៅ ដោយសារតែ​អគ្គនាយកពន្ធដារ បានប្រកាសពីការយកពន្ធលើប្រាក់ចំណេញ ឬពន្ធចំណេញមូលធន​។

ក្នុងនោះ អគ្គយកដ្ឋាន​ពន្ធដារ ​ក៏បានចេញសេចក្តី​បំភ្លឺ ចុះថ្ងៃទី២៦​ ខែកញ្ញា ឆ្នាំ២០២៣ ដោយលើកឡើងថា ចំពោះការយកពន្ធ​លើចំណេញមូលធន គឺមិនមែនជាប្រភេទពន្ធ​ ដែលទើប​តែបង្កើតថ្មីនោះទេ​។ សម្រាប់នីតិបុគ្គល ពន្ធនេះ ត្រូវបានដាក់​ឱ្យអនុវត្ត​ចាប់តាំងពីឆ្នាំ១៩៩៤ មកម្លេះ។ ជាក់ស្តែង​ ក្រុមហ៊ុន និងសហគ្រាសនានា បានបង់ពន្ធ​លើប្រាក់ចំណូល ដែលរួមបញ្ចូលទាំងចំណេញមូលធន មិនតែប៉ុណ្ណោះ សហគ្រាស ដែលប្រកបអាជីវកម្ម លើវិស័យអចលនទ្រព្យ ក៏បានបង់ពន្ធនេះដែរ។

អគ្គនាយកដ្ឋាន​ពន្ធដារ ក៏បានបន្ថែមថា​ ក្រសួងសេដ្ឋកិច្ច និងហិរញ្ញវត្ថុ បានរៀបចំលិខិតបទដ្ឋាន​គតិយុត្តិ បែបបទ និងនីតិវិធីនៃការប្រមូលពន្ធលើចំណេញមូលធន សម្រាប់រូបវន្តបុគ្គលរួចរាល់ តាំងពីឆ្នាំ២០២០ ដោយផ្នែកលើគោលការណ៍ទន់ភ្លន់ សាមញ្ញ ជាមួយនឹងការអនុគ្រោះក្នុងកម្រិតខ្ពស់ ប្រសិនបើធៀបនឹងការអនុវត្តនៅបណ្តាប្រទេសអភិវឌ្ឍន៍ និងកំពុងអភិវឌ្ឍន៍ក្នុងតំបន់ និងសាកលលោក។ ប៉ុន្តែជាការគិតគូរចំពោះផលប៉ះពាល់នានា បណ្តាលពី​ការរីករាលដាលជំងឺកូវីដ រាជរដ្ឋាភិបាល បានសម្រេចពន្យារពេលអនុវត្តពន្ធលើចំណេញមូលធន សម្រាប់រូបវន្តបុគ្គល ជាបន្តបន្ទាប់ ចំនួន ៣លើករួចមកហើយ ដោយចុងក្រោយ កំណត់យករយៈពេលអនុវត្ត ចាប់ពីថ្ងៃទី១ ខែមករា ឆ្នាំ២០២៤ សម្រាប់ទ្រព្យ​ជាមូលធន ៥ផ្នែក រួមមាន ភតិសន្យា ទ្រព្យវិនិយោគ កេរ្តិ៍ឈ្មោះអាជីវកម្ម កម្មសិទ្ធិបញ្ញា និងរូបិយវត្ថុបរទេស​។

ដោយឡែក ពន្ធលើចំណេញមូលធន​សម្រាប់ផ្នែកអចលនទ្រព្យ ដែលមហាជនលើកឡើងថា រដ្ឋនឹងគិតពន្ធ ២០% លើប្រាក់ចំណេញលក់ដី និងផ្ទះនោះ ត្រូវបានអគ្គនាយកដ្ឋានពន្ធដារ បញ្ជាក់ថា រាជរដ្ឋាភិបាល បានសម្រេច​ពន្យារការចាប់ផ្តើមអនុវត្ត រហូតដល់ដំណាច់ឆ្នាំ២០២៤ ដើម្បីជាចំណែក​ដ៏សំខាន់មួយ ចូលរួមគាំទ្រ​បន្ថែមដល់​វិស័យ​អចលនទ្រព្យ៕