រាជធានីភ្នំពេញ ៖ អនុវត្តតាមបទបញ្ជាផ្ទាល់របស់ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ។ ក្រោមការដឹកនាំកម្លាំងបង្ក្រាបផ្ទាល់ពីលោកឧត្តមសេនីយ៍ត្រី គល់ យី…
រាជធានីភ្នំពេញ ៖ អនុវត្តតាមបទបញ្ជាផ្ទាល់របស់ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ។ ក្រោមការដឹកនាំកម្លាំងបង្ក្រាបផ្ទាល់ពីលោកឧត្តមសេនីយ៍ត្រី គល់ យី ស្នងការរង ទទួលផែនការងារប្រឆាំងគ្រឿងញៀន បើកប្រតិបត្តិការស្រាវជ្រាវ និងបង្ក្រាបករណីជួញដូរដោយខុសច្បាប់ នូវសារធាតុញៀននេះ បានធ្វើឡើងកាលពីវេលាម៉ោង១២និង៣០នាទីរំលងអាធ្រាតថ្ងៃទី២៦ ខែកញ្ញា ឆ្នាំ២០២៣ ចំនួន៤ទីតាំង ក្នុងរាជធានីភ្នំពេញ ។
លោកវរសេនីយ៍ទោ មៀច ឈួនស៊ីម៉ូលីន នាយការិយាល័យនគរបាលប្រឆាំងគ្រឿងញៀន ប្រាប់ឲ្យដឹងថា ក្នុងប្រតិបត្តិការបង្ក្រាបនេះកម្លាំងសមត្ថកិច្ច បានឃាត់ខ្លួនជនសង្ស័យសរុបបានចំនួន០៥នាក់ ក្នុងនោះស្រីម្នាក់ រួមមាន ៖
ទី១-ឈ្មោះ ជ័យ ឆៃយ៉ា ភេទប្រុស អាយុ៣៩ឆ្នាំ
ទី២-ឈ្មោះ ចាន់ លីម៉ឹង ហៅ វីត ភេទប្រុស អាយុ៣៤ឆ្នាំ
ទី៣-ឈ្មោះ យឹម ម៉ារីណែត ភេទស្រី អាយុ៤០ឆ្នាំ
ទី៤-ឈ្មោះ អ៊ុក សំអន ហៅ យ៉ាំង ភេទប្រុស អាយុ៣៨ឆ្នាំ
និងទី៥-ឈ្មោះ វ៉ាន់ រ៉ាឌី ភេទប្រុស អាយុ៣៦ឆ្នាំ ។
សមត្ថកិច្ច ចាប់បាននិងដកហូតវត្ថុតាង រួមមាន៖ ថ្នាំញៀនម្សៅកញ្ចប់ ប្រភេទ MDMA សរុបចំនួន ៨៩កញ្ចប់ ទំងន់ ៩៣៥ក្រាម។ ឧបករណ៍កែច្នៃ ផលិតគ្រឿងញៀន មួយចំនួន និងសារធាតុផ្សំ សរុបទំងន់ ២២គីឡូក្រាម ។
សមត្ថកិច្ច បានបញ្ចាក់ថា គោលដៅទាំង៤ ដែលសមត្ថកិច្ចបានបង្ក្រាបនោះ រួមមាន ៖
គោលដៅទី១៖ នៅចំណុចមុខផ្ទះគ្មានលេខ ផ្លូវ១៧៩ ភូមិក្តីតាកុយ សង្កាត់វាលស្បូវ ខណ្ឌច្បារអំពៅ ឃាត់ខ្លួនជនសង្ស័យ០២នាក់ និងដកហូតបាន ថ្នាំញៀនរូបផ្លែឈើ ចំនួន ២០កញ្ចប់ ។
គោលដៅទី២៖ នៅចំណុចផ្ទះលេខ៧៩ ផ្លូវ០៤បេ ភូមិកណ្ដាល សង្កាត់រលួស ខណ្ឌដង្កោ ឃាត់ខ្លួនជនសង្ស័យម្នាក់ រួមនឹងថ្នាំញៀនចំនួន៦៦កញ្ចប់ ។
គោលដៅទី៣៖ នៅចំណុចបន្ទប់ជួល ភូមិស្វាយតាអុក១ សង្កាត់វាលស្បូវ ខណ្ឌច្បារអំពៅ ឃាត់ខ្លួនជនសង្ស័យចំនួន០២នាក់ រួមនឹងថ្នាំញៀន ចំនួន០៣កញ្ចប់ និងសារធាតុផ្សំទំងន់ ៥គីឡូក្រាម ។
គោលដៅទី៤៖ នៅចំណុចបន្ទប់ជួល ផ្លូវ៣៥៥ ភូមិតាង៉ូវ សង្កាត់និរោធន៍ ខណ្ឌច្បារអំពៅ ដែលក្រុមបក្ខពួកជនសង្ស័យជួលសម្រាប់ទុកកែច្នៃផលិតគ្រឿងញៀន ដោយដកហូតវត្ថុតាង ឧបករណ៍កែច្នៃមួយចំនួន និងសារធាតុផ្សំទំងន់ ១៧គីឡូក្រាម ។
បច្ចុប្បន្ន ជនសង្ស័យ និងវត្ថុតាង ត្រូវបានបញ្ជូនមកកាន់ការិយាល័យប្រឆាំងគ្រឿងញៀន ដើម្បីចាត់ការតាមនីតិវិធី ៕
ចែករំលែកព័តមាននេះ