ADផ្ទាំងផ្សព្វផ្សាយពាណិជ្ជកម្ម

Picture

របរ​ធ្វើ​ត្រីងៀត​បន្ត​ពី​ម្តាយក្មេក ឥឡូវ​មាន​មហិច្ឆតា​ចង់​នាំ​ចេញ​លក់​នៅ​ក្រៅប្រទេស

8 ខែ មុន
  • កំពង់ធំ

ខេត្តកំពង់ធំ ៖ ដោយ​បន្ត​មុខរបរ​ធ្វើ​ត្រីងៀត​លក់​តាម​បែប​ប្រពៃណី​ពី​ម្តាយក្មេក តាំងពី​ឆ្នាំ ២០១១ មក ឥឡូវនេះ​លោក សួង សោភ័ណ មាន​សេចក្តី​ប្រាថ្នា​ធំ​ក្នុង​ការ​នាំ​ផលិតផល​របស់ខ្លួន​ដាក់​លក់​នៅ​ក្នុង​ផ្សារ​ទំនើប​នានា…

ខេត្តកំពង់ធំ ៖ ដោយ​បន្ត​មុខរបរ​ធ្វើ​ត្រីងៀត​លក់​តាម​បែប​ប្រពៃណី​ពី​ម្តាយក្មេក តាំងពី​ឆ្នាំ ២០១១ មក ឥឡូវនេះ​លោក សួង សោភ័ណ មាន​សេចក្តី​ប្រាថ្នា​ធំ​ក្នុង​ការ​នាំ​ផលិតផល​របស់ខ្លួន​ដាក់​លក់​នៅ​ក្នុង​ផ្សារ​ទំនើប​នានា ជា​ពិសេស​លក់​នៅ​ក្រៅប្រទេស ដោយ​សិប្បកម្ម​របស់លោក​កំពុង​អនុវត្ត​គោលការណ៍​មួយ​ចំនួន​ដើម្បី​ទទួល​បាន​ស្តង់ដារ​និមិត្តសញ្ញា​គុណភាពផលិតផល​ជលផល​កម្ពុជា (CQS) ។

ដោយ​ទទួល​បាន​កិច្ច​គាំទ្រ​ពី​គម្រោង​អភិវឌ្ឍន៍​ជលផល​ក្រោយ​ប្រមូល​ផល (CAPFish-Capture) សិប្បកម្ម​ផលិត​ត្រីងៀត សួង សោភ័ណ ទទួល​បានការ​បណ្តុះបណ្តាល​ពី​គុណភាព អនាម័យ និង​ពី​សុវត្ថិភាព​ចំណីអាហារ ។ ក្រោយ​ពី​ទទួល​បាន​វគ្គ​បណ្តុះបណ្តាល​ម្ចាស់សិប្បកម្ម​រូ​ម​នេះ​បាន​តាំងចិត្ត​ថា កែប្រែ​ទម្លាប់​ប្រពៃណី មក​ប្រើប្រាស់​ឧបករណ៍​ទាន់សម័យ ដើម្បី​សម្រួល​ដល់​ច្រវាក់​ផលិតកម្ម​របស់​ខ្លួន​ឱ្យ​រីក​ចម្រើន និង​ព​ង្រឹ​ក​សុវត្ថិភាព​ដល់​អ្នក​ទទួលទាន ។

សូម​បញ្ជាក់​ថា គម្រោង​អភិវឌ្ឍន៍​ជលផល​ក្រោយ​ប្រមូល​ផល (CAPFish) គាំទ្រ​ដល់សហគ្រាស​ជលផល ក្នុង​ការ​ធ្វើ​ទំនើប​កម្ម​ប្រតិបត្តិការ​អាជីវកម្ម ការ​បង្កើត​ការងារ ការ​ប្រើប្រាស់​ធនធាន​ប្រកបដោយ​ប្រសិទ្ធភាព និង​បង្កើន​ប្រាក់​ចំណេញ​បាន​កាន់តែ​ច្រើន គឺជា​កិច្ចសហការ​រវាង​ក្រសួងកសិកម្ម រុក្ខា​ប្រមាញ់ និង​នេសាទ និង​អង្គការសហប្រជាជាតិ​អភិវឌ្ឍន៍ឧស្សាហកម្ម (UNIDO) ក្រោម​សហ​ហិរញ្ញប្បទាន​ពី​សហភាព​អឺរ៉ុប ។

ក្នុង​ដំណើរ​ទស្សនកិច្ច​សិក្សា និង​ផ្សព្វផ្សាយ​អំពី​សហគ្រាស​ជលផល​ក្រោយ​ប្រមូលផល ដែល​ទទួលផល​ពី​គម្រោង CAPFish កាលពី​ពេល​ថ្មី​ៗ​មកនេះ លោក សួង សោភ័ណ ម្ចាស់​សិប្បកម្ម​ផលិត​ត្រីងៀត សួង សោភ័ណ បាន​ប្រាប់​ពី​ភាព​ខុស​គ្នា​រវាង​ការ​ធ្វើ​ត្រីងៀតតាម​បែប​ប្រពៃណី និង​តាម​បែប​ទំនើប​បច្ចុប្បន្ន​ថា គឺ​ពី​មុន​ជួប​បញ្ហា​ច្រើន ជា​ពិសេស​ពេលហាល​ត្រី​ជួប​ការ​លំបាក​ពេល​មាន​ភ្លៀង​ម្តង​ៗ ធ្វើ​ឱ្យ​ការ​ផ្គត់ផ្គង់​ដល់​អតិថិជន​មិន​គ្រប់គ្រាន់ ខាតបង់ ព្រោះ​គ្មាន​កន្លែង​ហាល​ត្រី និង​ឧបករណ៍​ត្រឹមត្រូវ និង​មិន​យល់​ពី​គោលការណ៍ អនាម័យ ។ លោក​បន្ត​ថា តែ​ក្រោយ​ពី​ទទួល​បានការ​គាំទ្រ​ពី​គម្រោង CAPFish លោក​បាន កែប្រែ​ទីតាំង​ផលិតដែល​ផលិតផល​អាច​ផ្គត់ផ្គង់​ទីផ្សារ​ទាន់​ពេលវេលា ។

សិប្បកម្ម​ផលិត​ត្រីងៀត សួង សោភ័ណ ស្ថិត​នៅ​ភូមិ​កំពង់​ចិន ឃុំ​កំពង់​ចិន​ត្បូង ស្រុក​ស្ទោង ខេត្តកំពង់ធំ បាន​ទទួល​នូវ​ឧបករណ៍ និង​សម្ភារ​មួយ​ចំនួន​ពី​គម្រោង CAPFish មាន​ដូច​ជា ៖ ឡ​ស​ម្ងួ​ត​ត្រី ប្រព័ន្ធ​ចម្រោះ​ទឹក​ស្អាត តុ​លាង​ត្រី ទូរ​ក្លា​សេ ម៉ាស៊ីន​អ៊ុត​ប៊ឺ​ត ខ្យល់ និង​ម៉ាស៊ីន​ក្រឡុក​គ្រឿង ។ បច្ចុប្បន្ន​មាន​បុគ្គលិក​បម្រើ​ការងារ​ពេញ​ម៉ោង ៨ នាក់ ក្នុង​នោះ​ស្រី ៤ នាក់ និង​បុគ្គលិក​ក្រៅ​ម៉ោង ៥ នាក់​ថែម​ទៀត ។ ផលិតផល​សំខាន់​ៗ គឺ ត្រី​ឌៀប និង​ត្រី​រ៉ស់ ត្រូវ​បាន​ប្រើប្រាស់​ជា​វត្ថុធាតុដើម​ដើម្បី​ផលិត​ជា ត្រីងៀត និង​អាច​ផលិត​បានជា​មធ្យម ៥០០ គីឡូក្រាម​ក្នុង​មួយ​ថ្ងៃ ។ សិប្បកម្ម​បាន​ផ្គត់ផ្គង់​ផលិតផល​ខ្លួន​ជា​ចម្បង​ទៅ​កាន់​ទីផ្សារ​ក្នុងស្រុក ក្នុង​ខេត្តកំពង់ធំ ខេត្តកំពង់ចាម ត្បូងឃ្មុំ និង​ខេត្តរតនគិរី ។

គម្រោង CAPFish ផ្តល់​កិច្ច​គាំទ្រ​ដល់​សហគ្រាស​នេះ នូវ​កម្មវិធី​សហ​វិនិយោគ ជួយ​ឱ្យសិប្បកម្ម​អនុវត្ត CQS និង​បង្កើន​សមត្ថភាព​ផលិត​ពី ៥០០ គីឡូក្រាម​ដល់ ១០០០ គីឡូក្រាមក្នុង​មួយ​ថ្ងៃ ។ កែ​លម្អ​ទីតាំង សម្ភារ និង​បរិក្ខារ​កែ​ច្នៃ​ឱ្យ​ស្រប​តាម​តម្រូវការ​អប្ប​បរ​ហ​ស្តង់ដារ CQS រួម​ទាំង​ប្រព័ន្ធ​លូ​ទឹក​កខ្វក់ ។ បន្ត​ទិញ​ត្រី​ស្រស់​ពី​កសិដ្ឋាន​វារីវប្បកម្ម​ក្នុងស្រុក និង​អនុវត្តកសិកម្ម​តាម​កិច្ចសន្យា​ជាមួយ​អ្នក​ផ្គត់ផ្គង់​ត្រី​ស្រស់​ក្នុងស្រុក លើកទឹកចិត្ត​ពួក​គេ​ឱ្យ​អនុវត្ត អនាម័យ​ល្អ បណ្តុះបណ្តាល​ផ្ទាល់​លើ​ការងារ​អំពី​តម្រូវការ​អប្បបរមា CQS ដល់​បុគ្គលិក បង្កើត​សម្ភារ​ទីផ្សារ ផ្លា​ក​សញ្ញា​ផលិតផល និង​កែ​លម្អ​សម្បក​វេច​ខ្ចប់ ។ ពិនិត្យ​មើល​ឡើង​វិញ និង​កែ​លម្អ​កំណត់​ត្រា​អាជីវកម្ម និង​កំណត់​អ្នកទិញ​ថ្មី​នៅ​ខេត្តកំពង់ចាម និង​ទីផ្សារ​នៅ​រាជធានីភ្នំពេញ ។

ទន្ទឹម​នេះ​ម្ចាស់​សិប្បកម្ម​មាន​បំណង​លក់​ផលិតផល​ត្រីងៀត​របស់​ខ្លួន​ទៅ​ក្រៅប្រទេស ដោយ​អះអាង​ថា ត្រូវ​បំពេញ​ស្តង់ដារ CQS ឱ្យ​បាន​ពេញលេញ ឬ ស្តង់ដា​ផ្សេង​ទៀត​ជា​មុនសិន ។ ហើយ​ដើម្បី​ឈាន​ទៅ​មុខ​ទៀត​បាន​ត្រូវការ​ឱ្យ​គម្រោង CAPFish ជួយ ជា​ពិសេសឧបករណ៍​នៅ​ក្នុង​ច្រវាក់​ផលិតកម្ម​តែ​ម្តង ដែល​នឹង​ធ្វើ​ឱ្យ​ការ​ផលិត​មានការ​កើនឡើង ។

ទោះជា​យ៉ាងណា​ក៏​ដោយ​លោក​បាន​សំណូមពរ​ឱ្យ​រាជរដ្ឋាភិបាល​អាណត្តិ​ថ្មី​នេះ ជួយ​ពង្រឹង​វារីវប្បកម្ម​ក្នុងស្រុក​ឱ្យ​បាន​ច្រើន ជា​ពិសេស​ផ្តោត​ទៅ​លើ​អ្នក​ចិញ្ចឹម​ឱ្យ​មាន លក្ខណៈ​ស្តង់ដារ​ត្រឹមត្រូវ និង​មាន​តម្លៃ​ថេរ ៕

អត្ថបទសរសេរ ដោយ

កែសម្រួលដោយ