កូរ៉េខាងត្បូងនិងអាមេរិកធ្វើសមយុទ្ធជើងទឹករួមនៅសមុទ្រខាងកើត
កូរ៉េខាងត្បូង-អាមេរិក ៖ តាមទីភ្នាក់ងារព័ត៌មានកូរ៉េខាងត្បូងYONHAPថា ក្រុងសេអ៊ូលនិងក្រុងវ៉ា
កូរ៉េខាងត្បូង-អាមេរិក ៖ តាមទីភ្នាក់ងារព័ត៌មានកូរ៉េខាងត្បូងYONHAPថា ក្រុងសេអ៊ូលនិងក្រុងវ៉ាស៊ីនតោន បានបើកធ្វើកាលពីថ្ងៃទី២៥កញ្ញា សមយុទ្ធយោធាជើងទឹករួមក្នុងសមុទ្រខាងកើត ក្នុងគោលបំណងពង្រឹងស្ថានភាពរៀបចំ ប្រឈមមុខនឹងការគំរាមកំហែងខាងយោធាកាន់តែខ្លាំងឡើងរបស់កូរ៉េខាងជើង។
តាមកងម៉ារីនកូរ៉េខាងត្បូងថា សមយុទ្ធរយៈពេល៣ថ្ងៃនោះចូលរួមដោយនាវាចម្បាំង៩គ្រឿងនិងយន្តហោះល្បាត២គ្រឿងរបស់ប្រទេសទាំង២។ ក្នុងចំណោមនាវាចម្បាំងទាំងនេះមាននាវាមុជទឹកកូរ៉េខាងត្បូង២គ្រឿង និងនាវាពិឃាតរបស់ប្រទេសនេះ១គ្រឿងព្រមទាំងនាវាពិឃាតអាមេរិក២គ្រឿង។
កង ម៉ារីនកូរ៉េខាងត្បូងគូសបញ្ជាក់ថា សមយុទ្ធប្រឆាំងនាវាមុជទឹកនិងបាញ់គ្រាប់ពិតនោះ ក្នុងគោលបំណងពង្រឹងសមត្ថភាពប្រតិបត្តិការនិងកិច្ចសហការគ្នា របស់សម្ព័ន្ធមិត្តពេលកំពុងមានការគំរាមកំហែងនុយក្លេអ៊ែរនិងបាលីស្ទិកកាន់តែខ្លាំងឡើងរបស់ក្រុងព្យុងយ៉ាង ក្នុងនោះមានការបាញ់បង្ហោះកាំជ្រួចអវកាសនិងការបង្ហាញនាវាមុជទឹកថ្មីមួយ។
កូរ៉េខាងជើងបន្តបង្កើនភាពតានតឹងនៅឧបទ្វីបកូរ៉េ ដោយគ្រោងធ្វើការបាញ់បង្ហោះផ្កាយរណបចារកម្មយោធាជាថ្មីទៀតនាខែខាងមុខ បន្ទាប់ពីបរាជ័យក្នុងការបាញ់បញ្ជូន២លើកកាលពីខែឧសភានិងខែសីហា។ ក្រុងព្យុងយ៉ាងក៏រៀបចំពិធីបង្ហាញនាវាមុជទឹក វាយប្រហារនុយក្លេអ៊ែរតាក់ទិកក្នុងខែកញ្ញានេះដែរ។
ប្រធានាធិបតីកូរ៉េខាងត្បូងលោកYOON SUK YEOL កាលពីថ្ងៃទី២៦កញ្ញាបានធ្វើការព្រមានម៉ឺងម៉ាត់ចំពោះកូរ៉េខាងជើង ដោយថ្លែងថា សម្ព័នភាពកូរ៉េខាងត្បូងនិងអាមេរិកនឹងបញ្ចប់របបនោះ បើហ៊ានប្រើអាវុធនុយក្លេអ៊ែរ។ លោកលើកឡើងបែបនោះក្នុងសុន្ទរកថាដែលលោកថ្លែងនាឱកាសប្រារព្ធខួបលើកទី៧៥នៃការបង្កើតកងទ័ពកូរ៉េខាងត្បូង(ថ្ងៃទី១តុលា)។ ក្នុងពិធីដែលប្រារព្ធធ្វើនៅមូលដ្ឋានអាកាសចរណ៍ក្រុងសេអ៊ូលស្ថិតនៅភាគខាងត្បូងរដ្ឋធានីនេះ លោកYOONអះអាងថា របបកូរ៉េខាងជើងត្រូវដឹងឲ្យច្បាស់ថា អាវុធនុយក្លេអ៊ែរដាច់ខាតមិនអាចធានាសន្តិសុខរបស់ខ្លួនបានឡើយ៕
ចែករំលែកព័តមាននេះ