នាវាកងទ័ពជើងទឹកវៀតណាម ១គ្រឿង ចូលចតនៅកំពង់ផែស្វយ័តក្រុងព្រះសីហនុ រយៈពេល៤ថ្ងៃ
ខេត្តព្រះសីហនុ ៖ ព្រឹកថ្ងៃទី២៦ ខែកញ្ញា ឆ្នាំ២០២៣ លោកឧត្តមនាវីត្រី អ៊ិន សុខេមរ៉ា នាយសេនាធិការរងមូលដ្ឋានសមុទ្រ ដឹកនាំនាយនាវី…
ខេត្តព្រះសីហនុ ៖ ព្រឹកថ្ងៃទី២៦ ខែកញ្ញា ឆ្នាំ២០២៣ លោកឧត្តមនាវីត្រី អ៊ិន សុខេមរ៉ា នាយសេនាធិការរងមូលដ្ឋានសមុទ្រ ដឹកនាំនាយនាវី និងនាយនាវីរង អញ្ជើញទទួលស្វាគមន៍ នាវាកងទ័ពជើងទឹកប្រជាជនវៀតណាម ចំនួន០១គ្រឿង លេខ-263 ដឹកនាំដោយលោកវរនាវីឯក ជីញ ស៊ុនទុង មេបញ្ជាការរងនាយសេនាធិការបញ្ជាការដ្ឋានតំបន់៥ នៃកងទ័ពជើងទឹកប្រជាជនវៀតណាម បានចូលសំចត នាវាជើងទឹក នៅកំពង់ផែស្វយ័តក្រុងព្រះសីហនុ ប្រកបដោយសុវត្ថិភាព ក្នុងគោលបំណងធ្វើទស្សនកិច្ច នៅព្រះរាជាណាចក្រកម្ពុជា រយៈពេល០៤ថ្ងៃ គឺចាប់ពីថ្ងៃទី២៦ ដល់ថ្ងៃទី២៩ ខែកញ្ញា ឆ្នាំ២០២៣ ដើម្បីពង្រឹងចំណងមិត្តភាព សាមគ្គីភាព និងកិច្ចសហប្រតិបត្តិការល្អ រវាងកងទ័ពជើងទឹកប្រទេសទាំងពីរកម្ពុជា-វៀតណាម ។
បើយោងតាមទីភ្នាក់ងារសារព័ត៌មានកម្ពុជា បានអោយដឹងថា ក្នុងឱកាសនោះ ក៏មានការទទួលស្វាគមន៍ពីអគ្គកុងស៊ុលវៀតណាម ប្រចាំខេត្តព្រះសីហនុ ផងដែរ ។
លក្ខណៈបច្ចេកទេស នាវាកងទ័ពជើងទឹកប្រជាជនវៀតណាម លេខ-263 ជាប្រភេទនាវាល្បាត មានបណ្ដោយ ៤៩.៥៣ម៉ែត្រ ទទឹង ៩.២ម៉ែត្រ ជម្រៅទឹក ២.៣ម៉ែត្រ និងទម្ងន់ផ្ទុក ៣៧៥តោន ហើយមាននាវិក នៅលើនាវាសរុប ចំនួន៤៥នាក់ ហើយមេបញ្ជាការ នាវា គឺលោកអនុនាវីឯក ដាំង មីញឡើយ ។
ក្នុងឱកាសដំណើរទស្សនកិច្ច នៅព្រះរាជាណាចក្រកម្ពុជា គណៈប្រតិភូនាវាកងទ័ពជើងទឹកប្រជាជនវៀតណាម មានគម្រោងចូលជួបសម្តែងការគួរសម និងពិភាក្សាការងារជាមួយមេបញ្ជាការកងទ័ពជើងទឹកមូលដ្ឋានសមុទ្ររាម ព្រមទាំងមានកម្មវិធីប្រកួតកីឡាមិត្តភាព រវាងកងទ័ពជើងទឹក នៃប្រទេសទាំងពីរកម្ពុជា និងវៀតណាម ៕
ចែករំលែកព័តមាននេះ