រាជធានីភ្នំពេញ ៖ ក្នុងអំឡុងពេលទស្សនកិច្ច វិទ្យុសំឡេងវៀតណាម រដ្ឋមន្ត្រីក្រសួងព័ត៌មានកម្ពុជា បានលើកឡើងពីការបង្កើនកិច្ចសហប្រតិបត្តិការ លើការងារព័ត៌មាន និងការផ្សព្វផ្សាយ ។ ឯកឧត្តម…
រាជធានីភ្នំពេញ ៖ ក្នុងអំឡុងពេលទស្សនកិច្ច វិទ្យុសំឡេងវៀតណាម រដ្ឋមន្ត្រីក្រសួងព័ត៌មានកម្ពុជា បានលើកឡើងពីការបង្កើនកិច្ចសហប្រតិបត្តិការ លើការងារព័ត៌មាន និងការផ្សព្វផ្សាយ ។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានដឹកនាំគណៈប្រតិភូក្រសួងព័ត៌មាន បំពេញទស្សនកិច្ច និងជួបពិភាក្សាការងារជាមួយវិទ្យុសំឡេងវៀតណាម កាលពីថ្ងៃទី២៤ ខែកញ្ញា ឆ្នាំ២០២៣ ក្រោយពីគណៈប្រតិភូ បានបញ្ចប់ការចូលរួមកិច្ចប្រជុំរដ្ឋមន្ត្រី ទទួលបន្ទុកព័ត៌មានអាស៊ាន លើកទី១៦ និងកិច្ចប្រជុំពាក់ព័ន្ធ នៅទីក្រុងដាណាង ប្រទេសវៀតណាម ។
ដំណើរទស្សនកិច្ច ដើម្បីពិនិត្យលើកិច្ចសហប្រតិបត្តិការ នាពេលកន្លងមក ដែលក្រសួងព័ត៌មានកម្ពុជា និងវិទ្យុសំឡេងវៀតណាមបានធ្វើនាពេលកន្លងមក និងដើម្បីពិនិត្យលើកិច្ចសហប្រតិបត្តិថ្មីៗបន្ថែមទៀត លើវិស័យព័ត៌មាន នៃប្រទេសទាំងពីរ ។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកឡើងថា ដំណើរទស្សនកិច្ចនេះ នឹងពង្រឹងចំណងមិត្តភាព និងកិច្ចសហប្រតិបត្តិការរវាងភាគីទាំងពីរ។ កិច្ចសហប្រតិបត្តិការរវាងក្រសួងព័ត៌មានកម្ពុជា និងវិទ្យុសំឡេងវៀតណាម នាពេលកន្លងមក និងបច្ចុប្បន្ន ទទួលបានលទ្ធផលផ្លែផ្កាល្អប្រសើរ ។
ជាមួយគ្នានេះ ឯកឧត្តមរដ្ឋមន្ត្រី បានផ្តោតលើការពង្រឹងសមត្ថភាពមន្ត្រីជំនាញ និងអភិវឌ្ឍធនធានមនុស្ស ផ្នែកសារព័ត៌មាន និងការផ្លាស់ប្តូរបទពិសោធការងា រលើផ្នែកបច្ចេកទេស។
ឯកឧត្តមរដ្ឋមន្ត្រីក្រសួងព័ត៌មាន ក៏បានថ្លែងអំណរគុណដល់ភាគីវៀតណាម ដែលបានជួយដល់កម្ពុជា នូវឧបករណ៍បច្ចេកទេសវិទ្យុ និងទូរទស្សន៍ រួមមាន រថយន្តចល័តទូរទស្សន៍ ១គ្រឿង និងរថយន្តចល័តវិទ្យុ ១គ្រឿង ។
ចំណែកលោក ដូ ធៀនស៊ី (Do Tien Sy) អគ្គនាយក នៃវិទ្យុសំឡេងវៀតណាម បានមានប្រសាសន៍ថា វិទ្យុសំឡេងវៀតណាម បានសហការជាមួយទីភ្នាក់ងារប្រព័ន្ធផ្សព្វផ្សាយជាច្រើននៅគ្រប់ទ្វីប និងស្ថានីយផ្សាយសំឡេងជាតិផ្សេងៗគ្នាជាច្រើន ក្នុងនោះកិច្ចសហប្រតិបត្តិការជាមួយក្រសួងព័ត៌មានកម្ពុជា គឺជាទំនាក់ទំនងជិតស្និទ្ធ និងមានប្រសិទ្ធភាពបំផុត ។
អគ្គនាយកវិទ្យុសំឡេងវៀតណាម Do Tien Sy បានសង្កត់ធ្ងន់ថា ៖ «នាពេលខាងមុខ ភាគីយើងទាំងពីរ នឹងបន្តផ្លាស់ប្តូរព័ត៌មានអំពីនយោបាយ សេដ្ឋកិច្ច សង្គម វប្បធម៌ ឲ្យកាន់តែល្អប្រសើរថែមទៀត។ យើងខ្ញុំត្រៀមខ្លួន ជាស្រេចក្នុងការផ្លាស់ប្តូរ អ្នកជំនាញបច្ចេកទេសជាមួយកម្ពុជា។ យើងជឿជាក់ថា ទំនាក់ទំនងរវាងយើងនឹងបន្តអភិវឌ្ឍន៍ និងបន្តរួមចំណែកក្នុងការអះអាងពីទំនាក់ទំនងជិតស្និទ្ធ ដ៏ល្អប្រសើររវាងវៀតណាម និងកម្ពុជា» ។
នៅចុងបញ្ចប់ នៃកិច្ចប្រជុំ ភាគីទាំងពីរ បានចុះហត្ថលេខាលើកំណត់ហេតុ នៃកិច្ចពិភាក្សារវាងក្រសួងព័ត៌មានកម្ពុជា និងវិទ្យុសំឡេងវៀតណាម លើកិច្ចសហប្រតិបត្តិការផ្នែកព័ត៌មាន និងផ្សព្វផ្សាយ៕
ចែករំលែកព័តមាននេះ