ខេត្តបាត់ដំបង ៖ សំណង់ឡប់ឡែចាត់ទប់ច្រាំងស្ទឹងសង្កែផ្នែកខាងក្រោមនៃ «ទំនប់សាលាតាអន» ត្រើយខាងកើត ដែលស្ថិតក្នុងឃុំព្រែកខ្ពប ស្រុកឯកភ្នំ បានរងការខូចខាតបាក់ស្រុតអស់ប្រវែងជាង១៤០ម៉ែត្រ ដែលមន្ត្រីនៃមន្ទីរជំនាញពុំទាន់ហ៊ានសន្និដ្ឋានឲ្យប្រាកដថា តើបណ្ដាលមកពីបញ្ហាបច្ចេកទេស…
ខេត្តបាត់ដំបង ៖ សំណង់ឡប់ឡែចាត់ទប់ច្រាំងស្ទឹងសង្កែផ្នែកខាងក្រោមនៃ «ទំនប់សាលាតាអន» ត្រើយខាងកើត ដែលស្ថិតក្នុងឃុំព្រែកខ្ពប ស្រុកឯកភ្នំ បានរងការខូចខាតបាក់ស្រុតអស់ប្រវែងជាង១៤០ម៉ែត្រ ដែលមន្ត្រីនៃមន្ទីរជំនាញពុំទាន់ហ៊ានសន្និដ្ឋានឲ្យប្រាកដថា តើបណ្ដាលមកពីបញ្ហាបច្ចេកទេស ឬ បណ្ដាលមកពីទឹកភ្លៀងហូរច្រោះ ទើបនាំឲ្យសំណង់ស្រុតរអិលចុះក្នុងស្ទឹងបែបនេះ?
កាលពីរសៀលថ្ងៃទី២៤ កញ្ញា លោក ឡុង ផលគុណ ប្រធានមន្ទីរធនធានទឹក និងឧតុនិយម
ខេត្ត បានដឹកនាំកម្លាំងចុះពិនិត្យស្ថានភាពសំណង់ច្រាំងស្ទឹងដែលរងការខូចខាត តែពុំទាន់អាចវាយតំលៃបែបណា ជុំវិញការបាត់ស្រុកសំណង់ច្រាំងស្ទឹង «ទំនប់សាលាតាអន» នេះទេ ។ លោក ឡុង ផលគុណ បានប្រាប់ថា សំណង់ច្រាំងស្ទឹងដែលបាក់ស្រុត ខូចខាតអស់ប្រវែងជាង១៤០ម៉ែត្រ ។ ក្នុងនោះ សំណង់ឡប់ឡែចាក់ទប់ច្រាំងស្ទឹងខូចខាតប្រវែង៩៤ម៉ែត្រ និងបាត់ស្រុកដីធម្មជាតិប្រវែងប្រមាណ៤០ម៉ែត្រថែមទៀត ។
អ្នកភូមិដែលរស់នៅក្បែរកន្លែងកើតហេតុបាននិយាយថា សំណង់ទប់ច្រាំងស្ទឹងខាងលើនេះ បានបាក់ស្រុតចុះក្នុងស្ទឹងប្រហែលជាង១០ថ្ងៃកន្លងមកហើយ ក្នុងអំឡុងពេលភ្លៀងធ្លាក់ជោកជាំ ។ អ្នកភូមិបានរំលឹកពីប្រវត្តិខ្លះៗនៃការបាត់ស្រុកច្រាំងស្ទឹងចំណុចខាងលើនេះថា រាប់សិបឆ្នាំកន្លងមកហើយ ច្រាំងស្ទឹងចំណុចខាងលើ មិនធ្លាប់បាក់ស្រុតធ្ងន់ធ្ងរបែបនេះទេ ។ ធ្លាប់បាក់ស្រុតដែរ តែស្រុតតិចតួច ទើបតែពេលនេះ ក្រោយពេលចាក់សំណង់ទប់ច្រាំងស្ទឹង ស្រាប់តែបាក់ស្រុតធ្ងន់ធ្ងររអិលចូលស្ទឹង ទាំងសំណង់ទប់ច្រាំងស្ទឹងទាំងដីធម្មជាតិតែម្ដង ។
បើតាមការពិនិត្យជាក់ស្ដែង ស្នាមបាក់ស្រុតថ្មីៗបានកើតឡើងស្ទើររាល់ថ្ងៃ ដែលចំណុចខ្លះបាក់ស្រុតជម្រៅជាង០១ម៉ែត្រ រីឯចំណុចខ្លះទើបស្រុតថ្មីៗ និងកន្លែងខ្លះកំពុងចាប់ផ្ដើមប្រេះស្រុតជាបន្តបន្ទាប់ទៀត ទៅកាន់ផ្នែកខាងក្រោមនៃមាត់ស្ទឹង ។ សំណង់ទ្វារទឹកសាលាតាអន ស្ថិតនៅតាមដងស្ទឹងសង្កែ ដែលមានទីតាំងនៅក្នុងស្រុកឯងភ្នំ គឺជាសំណង់មេស្ទាក់ទឹកដ៏ធំមួយ ក្នុងចំណោមប្រព័ន្ធប្រឡាយទឹកជាច្រើនខ្សែទៀតដែលស្ថិតក្នុង«គម្រោងអភិវឌ្ឍន៍ទំនប់សាលាតាអន» ។
យោងតាមគម្រោងអភិវឌ្ឍន៍ទំនប់ទឹកសាលាតាអននេះ «សំណង់ទ្វារទឹកសាលាតាអន» មានកំពស់២៤ម៉ មានប្រវែង៧៤ម៉ បំពាក់ទ្វារទឹកធំដែលមានទទឹង១០ម៉ កំពស់៦ម៉ ចំនួន៦សន្លឹក ។ ជាមួយគ្នានោះ ក៏មានសាងសង់ច្រកផ្លូវត្រីមួយកន្លែង ដែលមានទទឹង០២ម៉ កំពស់០២ម៉ បំពាក់ទ្វារទឹកចំនួន០២សន្លឹក ។ ក្រៅពីសាងសង់សំណង់ទ្វារទឹកសាលាតាអនដ៏ធំសម្រើមខាងលើនេះ គម្រោងនេះក៏មានការសាងសង់ប្រឡាយទឹកថ្មី និងស្ដារប្រឡាយទឹកចាស់សរុបចំនួន១០ខ្សែផងដែរ ។
គម្រោងទាំងអស់ខាងលើ ទទូលសាងសង់ដោយក្រុមហ៊ុន « អេស ឌី អេ ជី » សហការជាមួយក្រុមហ៊ុន « ញូវមីលលីននីម »។ បើតាមប្រវត្តិនៃការសាងសង់ «សំណង់ទំនប់ទ្វារទឹកសាលាតាអន» នេះ បានសាងសង់រយៈពេល០៥ឆ្នាំកន្លងមកហើយ តែមិនទាន់សម្ពោធដាក់ឲ្យប្រើប្រាស់ជាផ្លូវការនៅឡើយទេ ចាប់តាំងពីឆ្នាំ២០១៨ រហូតមកដល់ឆ្នាំ២០២៣ នេះ ។ នេះបើតាម លោក ម៉ិល សុផល អភិបាលស្រុកឯកភ្នំ ដែលបានបញ្ជាក់ប្រាប់កោះសន្តិភាព នៅព្រឹកថ្ងៃទី២៥ កញ្ញា នេះ ។
លោកអភិបាលស្រុកបានបញ្ជាក់ថា លោកបានចុះពិនិត្យចំណុចច្រាំងស្ទឹង ដែលរងការខូចខាតនោះហើយ គឺបានបាក់ស្រុតខូចខាតសំណង់ទប់ច្រាំង តែមិនទាន់ប៉ះពាល់ផ្លូវធ្វើដំណើរធ្ងន់ធ្ងរទេ ។ ប៉ុន្តែយ៉ាងណា ពេលនេះ មន្ត្រីមន្ទីរជំនាញបានចុះពិនិត្យ ដើម្បីមានវិធានការទប់ស្កាត់ហើយ ។
ពាក់ព័ន្ធនឹងការបាក់ស្រុតច្រាំងស្ទឹងខាងលើនេះ ពិតមែនតែមន្ត្រីជំនាញមិនទាន់ធ្វើការសន្និដ្នានជាផ្លូវការអំពីមូលហេតុនៃការបាក់ស្រុតដីនេះ ។ ប៉ុន្តែលោក ឡុង ផលគុណ ប្រធានមន្ទីរធនធានទឹក បានប្រាប់ថា បើពិនិត្យលើទិដ្ឋភាពជាក់ស្ដែង សំណង់ច្រាំងស្ទឹងនេះ អាចត្រូវទឹកភ្លៀងហូរច្រោះផ្នែកខាងលើ ទើបធ្វើឲ្យសំណង់បាក់ស្រុតរអិលចុះទៅក្នុងស្ទឹង ។
លោកបានលើកឡើងថា នៅផ្នែកខាងកើតស្ទឹង (ក្នុងភូមិ) មានប្រព័ន្ធប្រឡាយសម្រាប់រំដោះទឹកជំនន់ពីក្នុងភូមិចូលក្នុងស្ទឹង តែសព្វថ្ងៃត្រូវមានម្ចាស់ដីនៅក្បែរប្រឡាយរំដោះទឹកនេះ នាំគ្នាចាក់ដីលុបបិទជិត រំលោភយកអស់សល់តែស្លាកស្នាមប្រព័ន្ធលូរឆ្លងកាត់ផ្លូវ ។
ដូច្នេះហើយ ទើបពេលមានភ្លៀងធ្លាក់ខ្លាំងជន់លិច ហើយទឹកហូរច្រោះសំណង់ច្រាំងស្ទឹងចុះទៅក្រោម ធ្វើឲ្យសំណង់បាក់ស្រុតរអិលចូលស្ទឹងទាំងផ្ទាំងតែម្ដង រហូតដីធម្មជាតិនៅតាមមាត់ស្ទឹងនៅផ្នែកខាងក្រោយ ក៏ត្រូវបាក់ស្រុតដែរ ។ ចំពោះវិធានការទប់ស្កាត់ លោក ឡុង ផលគុណ បានបញ្ជាក់ថា នៅពេលនេះ យើងមិនអាចធ្វើអ្វីកើតទេ ព្រោះជារដូវវស្សា ទឹកស្ទឹកនៅឡើងនៅឡើយ ។
ប៉ុន្តែបើប៉ះពាល់ផ្លូវធ្វើដំណើររបស់ប្រជាពលរដ្ឋ យើងគ្រាន់តែចាក់ដីលុបបំពេញកន្លែងបាក់ស្រុត ដើម្បីសម្រូលដល់ការធ្វើដំណើររបស់ប្រជាពលរដ្ឋជាបណ្ដោះអាសន្នតែប៉ុណ្ណោះ រហូតដល់រដូវទឹកស្រក ទើបយើងអាចមានវិធានការជួសជុល ឬត្រូវធ្វើបែបណាចំពោះសំណង់ទប់ច្រាំងស្ទឹងដែលបាក់រអិលចូលក្នុងស្ទឹងនេះជាថ្មីបាន ៕
ចែករំលែកព័តមាននេះ