សមត្ថកិច្ចបានឃាត់ខ្លួនជនជាតិថៃម្នាក់ ក្នុងចំណោមបក្សពួក២នាក់ ដែលធ្វើសកម្មភាពលួ.ចទំនិញនៅក្នុងហាងមួយកន្លែង យីហោ «ឡុង សេងលី» ហើយក៏មានបក្សពួក១ក្រុម មានគ្នាចំនួន៦នាក់ បម្រុងមករំដោះគ្នីគ្នា
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា សមត្ថកិច្ចបានឃាត់ខ្លួនជនជាតិថៃម្នាក់ ក្នុងចំណោមបក្សពួក២នាក់ ដែលធ្វើសកម្មភាពលួ.ចទំនិញនៅក្នុងហាងមួយកន្លែង យីហោ «ឡុង សេងលី» ហើយក៏មានបក្សពួក១ក្រុម មានគ្នាចំនួន៦នាក់ បម្រុងមករំដោះគ្នីគ្នា បង្កឱ្យមានការភ្ញាក់ផ្អើលកាលពីថ្ងៃទី២៤ ខែកញ្ញា ឆ្នាំ២០២៣ ស្ថិតនៅក្នុងភូមិក្បាលស្ពានមួយ សង្កាត់អូរជ្រៅ ក្រុងប៉ោយប៉ែត។
បើតាមសម្ដីម្ចាស់ហាង «ឡុង សេងលី» បានប្រាប់ឱ្យដឹងថា ជនជាតិថៃ២នាក់បាននាំគ្នាធ្វើសកម្មភាពចូលក្នុងហាងលក់ទំនិញ រួចក៏លួចអីវ៉ាន់ ប៉ុន្ដែគ្រានោះរូបគាត់ជាម្ចាស់ឃើញទាន់ក៏ស្ទុះទៅចាប់ជនសង្ស័យ ស្រាប់តែត្រូវជនជាតិថៃទាំង២នាក់ (ជនសង្ស័យ) នាំគ្នាព្រួតវា.យទៅលើរូបគាត់ជាម្ចាស់ហាងវិញ។
ម្ចាស់ហាងខាងលើបន្តថា តែសំណាង ពេលនោះត្រូវបានអ្នកជិតខាងឃើញទាន់ ក៏សម្រុកទៅជួយចាប់ជនសង្ស័យបានម្នាក់ និងម្នាក់ទៀតរត់គេចខ្លួនបាត់។ ភ្លាមៗនោះ ក៏ស្រាប់តែឃើញបក្សពួកជនសង្ស័យមួយក្រុម មានគ្នា៦នាក់ ជិះម៉ូតូមកដល់ក្នុងហាងបម្រុងរំដោះជនជាតិថៃម្នាក់នោះដែលត្រូវចាប់ខ្លួនបាន ប៉ុន្តែដោយសារឃើញមានប្រជាពលរដ្ឋឆោមរោមច្រើន ជនសង្ស័យមួយក្រុមនោះក៏នាំគ្នាជិះម៉ូតូចេញទៅវិញបាត់អស់តែម្ដងទៅ។
ម្ចាស់ហាងបានបញ្ជាក់ថា ជនជាតិថៃទាំង២នាក់នេះ រយៈពេលកន្លងមក ក៏ធ្លាប់ធ្វើសកម្មភាពលួ.ចទំនិញនៅក្នុងហាង ហើយជាប់ក្នុងកាមេរ៉ាសុវត្ថិភាពម្តងរួចហើយ ទើបឃើញមុខចូលមកលួ.ចម្តងទៀត រូបគាត់ក៏ស្ទុះទៅឃាត់ខ្លួនពួកចោ.រដែលបម្រុងយកអីវ៉ាន់ចេញមិនឱ្យលុយ តែក៏ត្រូវចោ.រព្រួតវា.យមកលើរូបគាត់ជាម្ចាស់ហាងវិញ ប៉ុន្តែគាត់ក៏សូមអរគុណចំពោះទឹកចិត្តបងប្អូនជិតខាងដែលឃើញ និងជួយអន្តរាគមន៍ចាប់ចោ.របានម្នាក់ រួចប្រគល់ជូនឱ្យមន្ត្រីនគរបាលប៉ុស្តិ៍សង្កាតអូរជ្រៅ ដើម្បីចាត់ការ។
បើតាមមន្ត្រីនគរបាលប៉ុស្តិ៍រដ្ឋបាលអូរជ្រៅ ក៏បានប្រាប់ឱ្យដឹងដែរថា ជនជាតិថៃទាំង២នាក់ ដែលធ្វើសកម្មភាពលួ.ចទំនិញនៅក្នុងហាង «ឡុង សេងលី» ថែមទាំងព្រួតគ្នាវា.យម្ចាស់ហាង បណ្ដាលឱ្យរងរបួស និងត្រូវឃាត់ខ្លួនបានម្នាក់ ក្នុងចំណោម២នាក់នេះ សមត្ថកិច្ចជំនាញកំពុងតែធ្វើការស្រាវជ្រាវតាមរកចាប់ខ្លួនជនសង្ស័យដែលរត់គេចខ្លួន ចំណែកជនសង្ស័យត្រូវចាប់ខ្លួនបាននេះ សមត្ថកិច្ចកំពុងកសាងសំណុំរឿង ដើម្បីចាត់ការតាមនីតិវិធីនៃច្បាប់៕
ចែករំលែកព័តមាននេះ