ខេត្តបាត់ដំបង ៖ យោងតាមប្រភពព័ត៌មានពីតាមបណ្តាស្រុកនានាភាគខាងលិចខេត្តបាត់ដំបង ដែលជាប់ព្រំប្រទល់ប្រទេសសៀមឱ្យដឹងថា ពលករខ្មែរទាំងប្រុស ទាំងស្រី រាប់សិបនាក់ក្នុងមួយថ្ងៃៗ នៅតែបន្តចូលទៅធ្វើការលើទឹកដីសៀមដោយខុសច្បាប់ បើទោះជាពេលថ្មីៗនេះរដ្ឋាភិបាលប្រទេសសៀមចេញសេចក្តីប្រកាសថា
ខេត្តបាត់ដំបង ៖ យោងតាមប្រភពព័ត៌មានពីតាមបណ្តាស្រុកនានាភាគខាងលិចខេត្តបាត់ដំបង ដែលជាប់ព្រំប្រទល់ប្រទេសសៀមឱ្យដឹងថា ពលករខ្មែរទាំងប្រុស ទាំងស្រី រាប់សិបនាក់ក្នុងមួយថ្ងៃៗ នៅតែបន្តចូលទៅធ្វើការលើទឹកដីសៀមដោយខុសច្បាប់ បើទោះជាពេលថ្មីៗនេះរដ្ឋាភិបាលប្រទេសសៀមចេញសេចក្តីប្រកាសថា នឹងចាត់វិធានការបង្ក្រាបពលករខ្មែរខុសច្បាប់ក្តី ។
តាមសេចក្តីរាយការណ៍ថា ពលករខ្មែរភាគច្រើនមកពីតាមបណ្តាខេត្តផ្សេងៗនៃប្រទេសកម្ពុជា ។ ពួកគេជិះរថយន្តឈ្នួលទៅកាន់តំបន់ព្រំដែនជួបជុំគ្នាពេលល្ងាច ដោយមានមេខ្យល់ជាអ្នករៀបចំរត់ការឃុបឃិតគ្នាជាមួយមន្ត្រីនគរបាលការពារព្រំដែន និងមន្ត្រីយោធាដែលឈរជើងនៅចំណុចច្រករបៀងនានានៅតាមបន្ទាត់ព្រំដែន ។ មេខ្យល់ដែលនាំពលករខ្មែរនេះមាន២ក្រុមដោយ១ក្រុមជាអ្នកនាំពីទឹកដីខ្មែរ ឯមួយក្រុមទៀតរង់ចាំនៅលើទឹកដីសៀមដើម្បីនាំបន្តទៅទីក្រុងបាងកក ។
តាមការទម្លាយឱ្យដឹងពីអ្នកស្រុកជាប់តំបន់ព្រំដែនថា ពលករម្នាក់ត្រូវបង់ប្រាក់ចំនួនពី២៥០០បាត ទៅ៣០០០បាត ទៅឱ្យមេខ្យល់ ដើម្បីបានទៅធ្វើពលករនៅទីក្រុងបាងកក ហើយមេខ្យល់បានបង់បន្តទៅឱ្យនគរបាល និងយោធាការពារព្រំ ដែនក្នុងពលករម្នាក់ចំនួន១៥០បាត ជាថ្នូរនឹងការបើកច្រកឱ្យឆ្លងអូរព្រំដែនចូលទឹកដីសៀម ។ លោកស្រី សុខុន ប្រធានវរការពារព្រំដែនលេខ៨១៧ធ្លាប់បានបញ្ជាក់ប្រាប់កោះសន្តិភាពថា កម្លាំងនគរបាលការពារព្រំដែនរបស់លោកតែងតែទប់ស្កាត់មិនឱ្យពលករខ្មែរឆ្លងដែនចូលទៅប្រទេសសៀមដោយខុសច្បាប់ឡើយ ប៉ុន្តែពួកគេនៅតែបន្តឆ្លងដែន ដោយលួចលាក់តាមច្រកតូចៗដែលកំបាំងពីភ្នែកសមត្ថកិច្ច ។
រយៈពេល២ខែកន្លងទៅនេះ បើតាមការកត់សម្គាល់ឃើញរថយន្តឈ្នួលដឹកជញ្ជូនពលករខ្មែរធ្វើចំណាកស្រុកមកពីតាមបណ្តាខេត្តនានា ឆ្ពោះទៅកាន់តំបន់ព្រំដែនស្រុកកំរៀង ស្រុកភ្នំព្រឹក និងស្រុកសំពៅលូន នៃខេត្តបាត់ដំបងជាប់ព្រំដែនប្រទេសសៀម ក្នុងមួយថ្ងៃៗរាប់រយនាក់ដែលមានមេខ្យល់ដឹកនាំដើម្បីឆ្លងដែនទៅធ្វើកម្មករលើទឹកដីសៀមដោយខុសច្បាប់ ។ រីឯកម្លាំងនគរបាលនៃស្នងការដ្ឋានខេត្តធ្លាប់បង្ក្រាប និងទប់ស្កាត់បានបន្តបន្ទាប់ ។
ទាក់ទិននឹងការឆ្លងដែនរបស់ពលករខ្មែរដោយខុសច្បាប់នេះ អាជ្ញាធរនៃប្រទេសសៀម បានប្រកាសកាលពីពេលថ្មីៗនេះនឹងចាត់វិធានការបង្ក្រាប ឬចាប់ដាក់ពន្ធនាគារពលករខ្មែរ ទាំងឡាយណាដែលឆ្លងដែនចូលទៅទឹកដីសៀម ដោយខុសច្បាប់ ហើយអាជ្ញាធរនៃប្រទេសនេះ ក៏បានប្រាប់ផងដែរ ឱ្យពលករខ្មែរទាំងនោះទៅចុះឈ្មោះបំពេញសំណុំបែបបទ ដើម្បីបានស្របច្បាប់ ។
បើតាមមតិរិះគន់នានាថា វាមិនពិបាកទេក្នុងការបិទខ្ទប់មិនឱ្យពលករខ្មែរចេញទៅប្រទេសសៀមខុសច្បាប់ គឺអាស្រ័យ លើអាជ្ញាធរ ឬសមត្ថកិច្ចដែលឈរជើងតាមបន្ទាត់ព្រំដែនតែប៉ុណ្ណោះ ឱ្យតែពួកគេឈប់យកលុយពីពួកមេខ្យល់នាំមនុស្សឆ្លងដែនខុសច្បាប់ទាំងអស់នោះទៅ គឺជាការស្រេចទៅហើយ ។ ប៉ុន្តែផ្ទុយទៅវិញ ឱ្យតែបានប្រាក់ពួកគេមិនខ្វល់ពីការឈឺក្បាលរបស់រាជរដ្ឋាភិបាលកម្ពុជាឡើយ ។ បញ្ហានេះអាជ្ញាធរខេត្ត និងសមត្ថកិច្ច គ្រប់ស្ថាប័ន គួរតែចាត់វិធានការទប់ស្កាត់ចៀសវាងការធ្វើទុក្ខបុកម្នេញមកលើពលករខ្មែរពីសំណាក់អាជ្ញាធរនៃប្រទេសសៀម ដែលកំពុងបង្កបញ្ហាមកលើកម្ពុជាមិនឈប់ឈរ ។
តាមប្រភពព័ត៌មានពីក្រុងប៉ោយប៉ែតឱ្យដឹងដែរថា នៅរសៀលថ្ងៃទី១៦ ឧសភា ពលករខ្មែរជាង១០០នាក់ត្រូវសមត្ថកិច្ចសៀមចាប់ក្នុងផ្សាររុងក្លឿ ស្ថិតក្នុងស្រុកអារញ្ញ ខេត្តស្រះកែវ កាលពីយប់ថ្ងៃទី១៥ ឧសភា ដោយចោទប្រកាន់ពីបទឆ្លងដែនខុសច្បាប់។ អ្នករកស៊ីក្នុងផ្សាររុងក្លឿ ហើយស្នាក់នៅទីនោះរាយការណ៍ថា សមត្ថកិច្ចសៀមបានចុះចាប់ពលករ ឬកម្មករដែលចូលទៅទឹកដីសៀមពេញមួយយប់ តាំងពីក្បាលព្រលប់ រហូតដល់ព្រឹកព្រលឹមបានជាច្រើននាក់ ប៉ុន្តែមិនដឹងចំនួនពិតទេ។
ជុំវិញព័ត៌មាននេះ បើតាមការឱ្យដឹងពីលោកលាក់ រម្មនា ប្រធានសេនាធិការប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែតប្រាប់តាមទូរស័ព្ទ នៅវេលាម៉ោងជាង៣រសៀល ថ្ងៃទី១៦ ឧសភាថា ពិតជាមានពលករខ្មែរត្រូវសមត្ថកិច្ចសៀមចាប់នៅផ្សាររុងក្លឿ ជាង១០០នាក់ មែន។ បើតាមការសួរនាំក្រោយពេលពលករដែលសមត្ថកិច្ចសៀមចាប់ ហើយបញ្ជូនមកដល់ការិយាល័យអន្តោប្រវេសន៍របស់លោកនោះដឹងថា ពួកគេចូលទៅទឹកដីសៀមដោយខុសច្បាប់តាមច្រករបៀង ។
មន្ត្រីកម្ពុជាមួយរូបប្រាប់ថា ការចាប់ពលករពីសមត្ថកិច្ចសៀមនៅផ្សារុងក្លឿនោះ ក៏មានផ្ទុះអាវុធជាច្រើនគ្រាប់ផងដែរ ប៉ុន្តែពុំដឹងពីមូលហេតុអ្វីទេ។ ពលករដែលត្រូវគេចាប់នោះខ្លះត្រូវគេដកយកទូរស័ព្ទ ខ្លះគេដកយកលុយ និងខ្លះអស់ស្បែកជើង ៕
ចែករំលែកព័តមាននេះ