ខេត្តតាកែវ ៖ កម្លាំងចម្រុះមានអគ្គនាយកដ្ឋាន និងពេទ្យសត្វខេត្តបានធ្វើសកម្មភាពចុះចាប់ឃាត់ឡានមួយគ្រឿងរបស់ឈ្មោះ យ៉ង់ ធឿន លួចដឹកសត្វទាគ្មានច្បាប់មកពីវៀតណាម តាមច្រកព្រត ឃុំសោម ស្រុកគិរីវង់ ។
លោកញិប ស្រ៊ន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្តតាកែវ បានឱ្យកោះសន្តិភាពយើងបានដឹង កាលពីថ្ងៃទី២៣ ខែកញ្ញា នេះថា ដោយមានការសម្របសម្រួលនីតិវិធីផ្ទាល់ដោយលោក ញ៉ាន បូរី ព្រះរាជអាជ្ញារងអមសាលាដំបូងខេត្តតាកែវ នៅវេលាម៉ោងប្រមាណ ១៨និង១៦នាទីល្ងាច ថ្ងៃទី២០ ខែកញ្ញា កន្លងទៅនេះ លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈ បសុព្យាបាលនៃក្រសួងកសិកម្មសហការជាមួយការិយាល័យបសុព្យាបាលសត្វខេត្ត ស្រុក និងកម្លាំងកងរាជអាវុធហត្ថស្រុកគិរីវង់ បានចុះធ្វើការត្រួតពិនិត្យរថយន្តមួយគ្រឿង ម៉ាកហ៊ីយ៉ុនដាយ ពណ៌ស ពាក់ស្លាកលេខ ភ្នំពេញ 3F-6769 មានម្ចាស់ឈ្មោះ យ៉ង់ ធឿន បានដឹកសត្វទារស់ចំនួន២៥០០ក្បាល គ្មានលិខិតអនុញ្ញាត និងមិនមានវិញ្ញាបនបត្រអនាម័យសត្វពីប្រទេសវៀតណាមត្រឹមត្រូវ ដែលលួចដឹកចូលមកតាមរបៀងច្រកព្រត នៅភូមិទន្លាប់ ឃុំសោម ស្រុកគិរីវង់ ខេត្តតាកែវ ។
លោកប្រធានមន្ទីរកសិកម្មខេត្តបានបញ្ជាក់ថា អំឡុងពេលសមត្ថកិច្ចចម្រុះកំពុងសាកសួរ ម្ចាស់រថយន្តបានបើករត់គេចចូលទៅផ្ទះ ឈ្មោះ យ៉ង់ ធឿន ស្ថិតនៅភូមិឈើទាលភ្លោះ ឃុំព្រៃអំពក ស្រុកគិរីវង់ ភ្លាមៗនោះដែរ សមត្ថកិច្ចចម្រុះបន្តដេញតាមរហូតដល់ផ្ទះយ៉ង់ ធឿន ដើម្បីសួរនាំបន្ថែម ប៉ុន្តែមិនបានប៉ុន្មាននាទីផង ក៏ត្រូវបានបក្ខពួករបស់គេ ចេញមកស្រែកឡូឡារ ជេរប្រមា.ថ ចង់បង្កហិ.ង្សា និងធ្វើការរារាំង ដល់ក្រុមការងារចម្រុះកំពុងអនុវត្តច្បាប់ ។
ដោយពិនិត្យស្ថានភាព និងកុំអោយប្រឈមមុខដាក់គ្នានោះ ក្រុមការងារនៃអគ្គនាយកដ្ឋានសុភាពសត្វ និងសុខភាពសាធារណៈ ក្រសួងកសិកម្មដកខ្លួនចេញ និងបន្តរៀបចំពាក្យបណ្ដឹងបន្តចាត់ការតាមនីតិវិធីច្បាប់ ។
គួបញ្ជាក់ផងដែរថា ស្រុកគីរីវង់មានព្រំប្រទល់ជាប់ជាមួយប្រទេសវៀតណាម ហើយមានច្រករបៀងតូចៗជាច្រើន ដែលបានអំណោយផលដល់ក្រុមឈ្មួញទុច្ចរិតបានត្រូវរ៉ូវគ្នាជាមួយនឹងទាហាន ហើយនគរបាលការពារព្រំដែន បើកអោយឈ្មួញនាំចូលមកមានសាច់មាន់ សាច់ និងជើងជ្រូក សាច់សត្វដែលខូចគុណភាពផ្សេងទៀតចូលមកដឹកលក់ចែកចាយក្នុងខេត្ត និងរាជធានីភ្នំពេញ ដោយមានមន្ត្រីជំនាញក៏បានចូលរួចសហការជាមួយឈ្មួញផងដែរ ។
បើទោះជាកម្លាំងអគ្គនាយកដ្ឋានចុះមកបង្ក្រាបបែបណាក៏ដោយ ក៏ឈ្មួញនៅតែបន្តលួចនាំចូលទំនិញដែលខូចគុណភាព និងប្រើសារធាតុគីមីចូលមកលក់ចែកចាយដដែល ៕
ចែករំលែកព័តមាននេះ