រាជធានីភ្នំពេញ ៖ ពិធីអបអរសាទរខួបអនុស្សាវរីយ៍លើកទី៦៦ ថ្ងៃបង្កើតកងកម្លាំងនគរបាលជាតិកម្ពុជាត្រូវបានរៀបចំធ្វើឡើងកាលពីព្រឹកថ្ងៃទី១៦ ខែឧសភា ឆ្នាំ២០១១ នៅទីស្តីការក្រសួងមហាផ្ទៃ ក្រោមអធិបតីភាពលោកឧបនាយករដ្ឋមន្ត្រី ស ខេង រដ្ឋមន្រ្តីក្រសួងមហាផ្ទៃ និងមានការចូលរួមពីឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តី រដ្ឋលេខាធិការ
រាជធានីភ្នំពេញ ៖ ពិធីអបអរសាទរខួបអនុស្សាវរីយ៍លើកទី៦៦ ថ្ងៃបង្កើតកងកម្លាំងនគរបាលជាតិកម្ពុជាត្រូវបានរៀបចំធ្វើឡើងកាលពីព្រឹកថ្ងៃទី១៦ ខែឧសភា ឆ្នាំ២០១១ នៅទីស្តីការក្រសួងមហាផ្ទៃ ក្រោមអធិបតីភាពលោកឧបនាយករដ្ឋមន្ត្រី ស ខេង រដ្ឋមន្រ្តីក្រសួងមហាផ្ទៃ និងមានការចូលរួមពីឧបនាយករដ្ឋមន្រ្តី ទេសរដ្ឋមន្រ្តី រដ្ឋមន្រ្តី រដ្ឋលេខាធិការ ព្រមទាំងតំណាងឯកអគ្គរាជទូត ឯកអគ្គរដ្ឋទូតប្រចាំនៅកម្ពុជា ។
នៅក្នុងឱកាសនោះ លោកនាយឧត្តមសេនីយ៍នេត សាវឿន អគ្គស្នងការនគរបាលជាតិ បាន មានប្រសាសន៍ថា ក្នុងឆ្នាំ២០១០កន្លងមក ការរក្សា និងពង្រឹងសន្តិសុខជាតិ អគ្គស្នងការដ្ឋាននគរបាលជាតិបានខិតខំប្រឹងប្រែងដាក់ចេញនូវបណ្តាវិធានការនានាតាមគ្រប់រូបភាព ដើម្បីបង្ការបទល្មើសនានាដែលកើតមានឡើងនៅក្នុងសង្គម ។ អាស្រ័យដោយចំណាត់ការដ៏មានប្រសិទ្ធភាព និងមានកិច្ចសហការល្អជាមួយអាជា្ញធរពាក់ព័ន្ធគ្រប់លំដាប់ថ្នាក់ក្នុងឆ្នាំ២០១០កន្លងមកនេះ ធ្វើឱ្យបទល្មើសព្រហ្មទណ្ឌមានការថយចុះ១០,៦៨% ធៀបទៅនឹងឆ្នាំ២០០៩ គឺ៣.០៨៧លើក/៣.៤៥៦លើក ក្នុងនោះបទឧក្រិដ្ឋបានថយចុះ១១,០១% និងបទល្មើសមជ្ឈិម ថយចុះ១០,៥២% ។
ការបង្រ្កាបបទល្មើសទទួលបានលទ្ធផលល្អ ដោយយើងបង្រ្កាបបាន៧៤,៨២% លើរឿងហេតុដែលកើតឡើងស្មើនឹង២.៣១០ករណី ចាប់ឃាត់ខ្លួនជនប្រព្រឹត្តបទល្មើស៣.៤១៣នាក់ បញ្ជូនទៅតុលាការផ្តន្ទាទោស។ ចំពោះបញ្ហាក្មេងទំនើងក៏បានធ្វើកិច្ចការពីរស្របគ្នា គឺជំរុញការឃោសនាអប់រំជាចំហតាមសហគមន៍ និងភូមិ-ឃុំ គួបផ្សំនឹងជំរុញការអនុវត្តច្បាប់ដោយបានធ្វើការអប់រំចំនួន២.៣០៤លើក បញ្ជូនទៅមណ្ឌលអប់រំមុខសញ្ញាក្មេងទំនើងចំនួន៨៩នាក់ និងចាប់បញ្ជូនទៅតុលាការចំនួន៤៥៣ នាក់។
ការប្រយុទ្ធប្រឆាំងគ្រឿងញៀននៅតែជាចំណុចក្តៅ ដែលបានប្រមូលផ្តុំតសូ៊ឆ្នាំនេះបានស្រាវជ្រាវរកឃើញបណ្តាករណីធំៗ និងមុខសញ្ញាមេខ្លោងជាច្រើន ជាហេតុធ្វើឱ្យកិច្ចប្រតិបត្តិការមានលទ្ធភាពបំផ្លាញការចរាចរណ៍ជួញដូរគ្រឿងញៀន បានដល់ឫសគល់ និងចំខ្សែ បណ្តាញដែលមានលក្ខណៈចាក់ស្រេះច្រើនជាងមុន ។ជាលទ្ធផល បង្រ្កាបបាន៣៤៧ករណីឃាត់ខ្លួនជនល្មើស៦៨៩នាក់ ក្នុងនោះមានជនបរទេស៦៤នាក់ ព្រមទាំងចាប់យកវត្ថុតាងជាច្រើនបញ្ជូនទៅតុលាការ ។
ដោយឡែកការប្រយុទ្ធប្រឆាំងការជួញដូរមនុស្ស តាមរយៈយន្តការដែលបានបង្កើតឡើង បានសហការ ជាមួយបណ្តាដៃគូពាក់ព័ន្ធអនុវត្តយ៉ាងសកម្មការងារឃោសនា ការងារទប់ស្កាត់ និងការងារ គ្រប់គ្រង ធ្វើឱ្យបទល្មើសនេះថយចុះ ហើយបង្រ្កាបបាន២៦១ករណី ឃាត់ខ្លួនបាន២១៦ នាក់ក្នុងនោះ មានជនបរទេស២៥នាក់ បញ្ជូនទៅតុលាការ និងរំដោះជនរងគ្រោះបានចំនួន៧៥៣នាក់ បញ្ជូនទៅមជ្ឈមណ្ឌលស្តារនីតិសម្បទានិងអាណាព្យាបាល ។
លោកអគ្គស្នងការនគរបាលជាតិបានសង្កត់ធ្ងន់ថា អត្រាគ្រោះថ្នាក់ចរាចរណ៍ក្នុងឆ្នាំកន្លងមកនេះ កាត់បន្ថយបានចំនួន៩,៨២% (៥.៤៣០លើក/៦.០២១លើក) ។ លទ្ធផលអនុវត្តច្បាប់ គិតត្រឹមថ្ងៃទី២០ ខែមីនា ឆ្នាំ ២០១១បានអប់រំ និងពិន័យអ្នកប្រើប្រាស់ម៉ូតូចំនួន ៥១.៥៦៨គ្រឿង និងរថយន្ត៦១.០៥៣គ្រឿង ក្នុងនោះធ្វើការត្រួតពិនិត្យជាតិស្រវឹងក្នុងពេលបើកបរបានចំនួន៥.៤៣៥នាក់ ត្រួតពិនិត្យរថយន្តបើកបរហួសល្បឿនកំណត់១៣.៨៨៥គ្រឿង ដឹកសំពីងសំពោង៥.៣៥៩គ្រឿង បំបាត់ការកែច្នៃរថយន្តខុសបច្ចេកទេស២៣៩គ្រឿង ដោយធ្វើការផាកពិន័យតាមច្បាប់ និងអនុវត្តតាមវិធានការតុលាការបានចំនួន៥៥៣ករណី ។ បញ្ហាគ្រោះថ្នាក់អគ្គិភ័យឆ្នាំនេះ បានបង្កគ្រោះថ្នាក់ធ្ងន់ធ្ងរ សរុបមានចំនួន៣៥១ករណី កើនលើសឆ្នាំមុនដែលបណ្តាលមកពីមូលហេតុជាច្រើន ក្នុងនោះកត់សម្គាល់មានទីតាំងមួយចំនួនទោះបីមានមធ្យោបាយ និងកម្លាំងគ្រប់គ្រាន់សង្គ្រោះក៏ដោយ បុ៉ន្តែអាស្រ័យដោយលក្ខខណ្ឌហេដ្ឋារចនាសម្ព័ន្ធ ការកសាងទីតាំងមិនមានបំពាក់ប្រព័ន្ធប្រកាសអាសន្នឬប្រព័ន្ធពន្លត់អគ្គិភ័យបឋម ធ្វើឱ្យគ្មានលទ្ធភាពដោះស្រាយបញ្ហានេះបាន។ ចំពោះចំណុចនេះអនុវត្តតាមអនុសាសន៍ដឹកនាំដ៏ខ្ពង់ខ្ពស់របស់សម្តេចតេជោក្រសួងមហាផ្ទៃបានចង្អុលដឹកនាំឱ្យរដ្ឋបាលដែនដីនិងស្នងការដ្ឋាននគរបាលត្រួតពិនិត្យឡើងវិញ និងណែនាំឱ្យរោងចក្រ សហគ្រាស សំណង់អគារធំៗ និងទីតាំងប្រមូលផ្តុំមួយចំនួនកែលម្អឡើងវិញប្រព័ន្ធហេដ្ឋារចនាសម្ព័ន្ធ ។
លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃបានថ្លែងថា ការរៀបចំទិវារំលឹកខួបអនុស្សាវរីយ៍លើកទី៦៦ ថ្ងៃកំណើតនគរបាលជាតិនេះ គឺជាព្រឹត្តិការណ៍មានអត្ថន័យជាប្រវត្តិសាស្រ្តឧត្តុង្គឧត្តមប្រកបដោយមោទនភាពក្រៃលែងសម្រាប់ប្រជាជាតិខ្មែរទាំងមូល ដែលបានស្ថាបនាឡើងនូវកម្លាំងប្រតិបត្តិច្បាប់ដ៏អង់អាចក្លាហានមួយ ដើម្បីទទួលរ៉ាប់រងភារកិច្ច រក្សាការពារសន្តិសុខ សណ្តាប់ធ្នាប់ និងសុវត្ថិភាពសង្គម ដោយកម្លាំងផ្ទាល់របស់ជាតិតាំងពីច្រើនឆ្នាំណាស់មកហើយ ជាពិសេសចាប់ពីពេលដែលកម្ពុជាទទួលបានឯករាជ្យពីអាណានិគមនិយមបារាំងនាឆ្នាំ១៩៥៣ ។ ជាមួយនេះ ខិតខំប្រឹងប្រែងដោយសកម្មប្រយុទ្ធ ប្រឆាំង និង បង្ការទប់ស្កាត់បទល្មើសផ្សេងៗ ជាពិសេសអំពើលួច ប្លន់ ការជួញដូរ ចែកចាយនិងប្រើប្រាស់ គ្រឿងញៀន ការជួញដូរមនុស្ស ការធ្វើអាជីវកម្មផ្លូវភេទលើស្រ្តី និងកុមារ ។ បន្តកិច្ចសហប្រតិបត្តិការឱ្យបានទូលំទូលាយជាមួយប្រទេសជាមិត្តនិងអង្គការអន្តរជាតិពាក់ព័ន្ធ លើកកម្ពស់ស្មារតីទទួលខុសត្រូវក្នុងការបង្ការទប់ស្កាត់ឧក្រិដ្ឋកម្មឆ្លងដែនគ្រប់ប្រភេទ ជាពិសេសចាត់វិធានការរារាំងមិនឱ្យកើតមានដាច់ខាតសកម្មភាពភេរវកម្មនៅកម្ពុជា ៕
ចែករំលែកព័តមាននេះ