ភ្នំពេញ៖ កិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី២០ ខែកញ្ញា ឆ្នាំ២០២៣ នេះ បានសម្រេចថា កម្មវិធីគោលនយោបាយ​អាទិភាព ៦ចំណុច របស់រាជរដ្ឋាភិបាលថ្មី ត្រូវប្រកាសអនុវត្ត​មុនដំណាច់ឆ្នាំ២០២៣ នេះ។ មកទល់ពេលនេះ យន្តការសម្រាប់អនុវត្តកម្មវិធីទាំង ៦ចំណុចនេះ ត្រូវបានរៀបចំរួចស្រេចបាច់​ហើយ។

សេចក្តីប្រកាសលទ្ធផលនៃកិច្ចប្រជុំពេញអង្គគណៈរដ្ឋមន្ត្រី បានលើកបង្ហាញនូវកម្មវិធីគោល​នយោបាយ​អាទិភាពទាំង ៦ នៃយុទ្ធសាស្ត្របញ្ចកោណ ដំណាក់កាលទី១ រួមមាន៖

កម្មវិធីទី១ ការផ្តល់​ការថែទាំសុខភាព ឆ្ពោះទៅ​កម្មវិធីគ្របដណ្តប់សុខភាពជាសកល។

កម្មវិធីទី២ ការបណ្តុះបណ្តាល​ជំនាញវិជ្ជាជីវៈ និងបច្ចេកទេស ដល់យុវជន​មកពីគ្រួសារក្រីក្រ និងគ្រួសារ​ងាយរង​ហានិភ័យ នៅទូទាំងប្រទេស។

កម្មវិធីទី៣ ការធ្វើស្ថាបនូបនីយកម្ម​កម្មវិធីជាតិជំនួយសង្គម សម្រាប់គ្រួសារក្រីក្រ ក្រុមជន​ងាយរងគ្រោះនៅក្នុងគ្រួសារក្រីក្រ និងគ្រួសារងាយរង​ហានិភ័យ នៅក្នុង​គ្រាមានវិបត្តិសេដ្ឋកិច្ច និងគ្រាមានគ្រោះអាសន្ន។

កម្មវិធីទី៤ ការដាក់ចេញ និងការជំរុញអនុវត្តយុទ្ធសាស្ត្រ​អភិវឌ្ឍសេដ្ឋកិច្ចក្រៅប្រព័ន្ធ ឱ្យមាន​លទ្ធភាព​ចូលរួម​ទៅក្នុងសេដ្ឋកិច្ច​ក្នុងប្រព័ន្ធ។

កម្មវិធីទី៥ ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន សំដៅលើកស្ទួយ​ផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ​។

កម្មវិធីទី៦ ការដាក់ពង្រាយ​មន្ត្រីបច្ចេកទេសកសិកម្ម នៅគ្រប់ឃុំសង្កាត់ ដែលមានសកម្មភាព​កសិកម្ម នៅទូទាំងប្រទេស ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារ​កសិករ ក្នុងការលើកស្ទួយ​ផលិតផល​កសិកម្មរបស់ខ្លួន និងការរៀបចំ​ឱ្យមានសមាគមកសិករ នៅតាមទីជនបទ​។

សេចក្តីប្រកាស បន្តថា រាជរដ្ឋាភិបាល នីតិកាលទី៧ នៃរដ្ឋសភា នឹងប្រកាសចាប់ផ្តើម​អនុវត្តកម្មវិធីគោលនយោបាយអាទិភាពទាំង ៦ខាងលើ ជាបន្តបន្ទាប់ មុនដំណាច់ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់​របស់សម្តេចធិបតីនាយករដ្ឋមន្ត្រី ដែលក្នុងនោះ កម្មវិធីទី១ និងទី២ គ្រោងប្រកាស​ដាក់ឱ្យអនុវត្តជាផ្លូវការ នៅថ្ងៃទី១៤ ខែវិច្ឆិកា ឆ្នាំ២០២៣ នៅក្រសួងការងារ និងបណ្តុះបណ្តាលវិជ្ជាជីវៈ។ កម្មវិធីទី៣ គ្រោងនឹងប្រកាស​ដាក់ឱ្យអនុវត្តជាផ្លូវការ នៅថ្ងៃទី៥ ខែធ្នូ ឆ្នាំ២០២៣ នៅក្រសួងសង្គមកិច្ច អតីតយុទ្ធជន និងយុវនីតិសម្បទា។ កម្មវិធីទី៤ គ្រោងប្រកាស​ដាក់ឱ្យ​អនុវត្តជាផ្លូវការ នៅថ្ងៃទី១០ ខែតុលា ឆ្នាំ២០២៣ នៅក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ កម្មវិធីទី៥ និងទី៦ គ្រោងប្រកាសដាក់ឱ្យអនុវត្តជាផ្លូវការ នៅថ្ងៃទី២០ ខែវិច្ឆិកា ឆ្នាំ២០២៣ នៅក្រសួងកសិកម្ម រុក្ខាប្រមាញ់ និងនេសាទ។

សេចក្តីប្រកាស ក៏បានបញ្ជាក់ថា របាយការណ៍វឌ្ឍនភាពនៃការរៀបចំ​យន្តការអនុវត្តកម្មវិធីគោល​នយោបាយអាទិភាព ចំនួន ៦ របស់រាជរដ្ឋាភិបាល នីតិកាលទី៦ សម្រាប់ប្រកាស​ចាប់ផ្តើម​អនុវត្ត​មុនដំណាច់ឆ្នាំ២០២៣ ត្រូវបានសម្រេចឯកភាពដោយអង្គប្រជុំ​ពេញអង្គគណៈរដ្ឋមន្ត្រី៕​