រាជធានីភ្នំពេញ ៖ សម្តេចធិបតី នាយករដ្ឋមន្ត្រី ហ៊ុន ម៉ាណែត បានលើកឡើងថា ការប្រកាន់ជំហរចិនតែមួយរបស់រាជរដ្ឋាភិបាលថ្មី គឺមិនខុសនោះទេ ព្រោះថា…
រាជធានីភ្នំពេញ ៖ សម្តេចធិបតី នាយករដ្ឋមន្ត្រី ហ៊ុន ម៉ាណែត បានលើកឡើងថា ការប្រកាន់ជំហរចិនតែមួយរបស់រាជរដ្ឋាភិបាលថ្មី គឺមិនខុសនោះទេ ព្រោះថា មានប្រទេសជាច្រើន ដែលជាសមាជិកអង្កការសហប្រជាជាតិ ប្រកាន់ជំហរចិនតែមួយ ។
ការលើកឡើងរបស់សម្តេចធិបតីនេះ បន្ទាប់ពីមានប្រជាពលរដ្ឋទាំងក្នុងស្រុក និងក្រៅស្រុក ចង់ដឹងពីគោលជំហររាជរដ្ឋាភិបាលថ្មី នៅពេលទស្សនកិច្ច នៅប្រទេសចិន កន្លងមកនេះ ។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងក្នុងពិធីសំណេះសំណាលជាមួយកម្មករកម្មការរិនី ជិត២ម៉ឺននាក់ នៅស្រុកបាទី ខេត្តតាកែវ ថា មានការលើកឡើងបកស្រាយច្រើនណាស់ ពាក់ព័ន្ធនឹងសម្តេចទៅប្រទេសចិនពិសេសនោះ គោលជំហរនយោបាយអន្តរជាតិ តែម្តង ។
សម្តេចធីបតី បានលើកឡើងថា មានអ្នកខ្លះថា កម្ពុជាប្រកាន់គោលជំហរចិនតែមួយ គឺមានភាពអាក្រក់ ប៉ុន្តែសម្តេចធិបតី បានបញ្ជាក់ថា ៖ «ខ្ញុំសូមប្រាប់វិញថា ទៅស្រាវជ្រាវឡើងវិញទៅ សមាជិកអង្កការសហប្រជាជាតិ មានចំនួន១៩៣ប្រទេស នៅក្នុងនោះ មាន១៨១ប្រទេស គឺប្រកាន់ជំហរចិនមួយ រួមទាំងអាមេរិកដែរ ដូច្នេះកម្ពុជា ប្រកាន់ជំហរចិនតែមួយ គឺមិនខុសទេ» ។
សម្តេចធិបតី គូសបញ្ជាក់ថា ៖ «ខ្ញុំសូមបញ្ជាក់ថា យើងសូមបញ្ចេញជំហរនយោបាយអាណត្តិ ទី៧ គឺប្រកាន់ជំហរនិរន្តភាព និងសុក្រឹតភាព ជាមួយគោលនយោបាយរបស់គណបក្សប្រជាជនកម្ពុជា ដែលមានពីមុន គឺគោលនយោបាយឈរលើមូលដ្ឋានអធិបតេយ្យភាព ឯករាជភាព ផ្អែកលើច្បាប់ អនុវត្តដោយច្នៃប្រឌិត វៃឆ្លាត ដោយផ្អែកលើការតម្កល់ជាតិជាធំ ។ នេះជាគោលនយោបាយរបស់យើងជាមួយបណ្តាប្រទេសទាំងអស់» ។
ជាមួយគ្នានោះដែរ សម្តេចធិបតី ក៏បានស្នើឲ្យប្រជាពលរដ្ឋ កុំព្រួយបារម្ភ ព្រោះរាជរដ្ឋាភិបាលធ្វើអ្វីមួយគិតប្រយោជន៍ជាធំ និងមិនធ្វើឲ្យបាត់បង់ផលប្រយោជន៍ជាតិនោះទេ ។
សម្តេចធិបតី ហ៊ុន ម៉ាណែត បានគូសបញ្ជាក់ថា ៖ «ខ្ញុំទៅចិន ដើម្បីបញ្ជាក់ គោលនយោបាយការទូត ជាមួយចិន រក្សានៅដដែល ដោយសារ គឺជាគោលនយោបាយរបស់គណបក្សប្រជាជនកម្ពុជា ដោយបានអនុម័ត ដោយអង្គសន្និបាទវិសាមញ្ញ។ ហើយពីណា ក៏ដោយដឹកនាំ ត្រូវអនុវត្តគោលនយោបាយហ្នឹង» ។
សម្តេចធិបតី បានបន្តថា ៖ «ខ្ញុំសូមជូនសារទៅផង ហើយអ្នក ដែលវាយប្រហារខ្ញុំ ក៏កំពុងអង្គុយមើលស្តាប់ផងដែរ និងរកគន្លឹះវ៉ៃទៀត។ ខ្ញុំសូមសរសើរតែម្តង វាយប្រហារម្តងថា ខ្ញុំកូនវៀតណាម ម្តងជាកូនឪខ្ញុំ ប៉ុន្តែខ្ញុំគ្រាន់តែសូមបញ្ជាក់តិចថា ថាតើទស្សនកិច្ចទៅចិនប៉ុន្មានថ្ងៃនេះ ដើម្បីធ្វើអ្វី ? មានអ្នកខ្លះលើកឡើងថា ខ្ញុំទៅចិន ដើម្បីបញ្ជាក់ជំហរពី គោលនយោបាយរបស់កម្ពុជាថា ចិនចង់ដឹងថា រដ្ឋាភិបាលទើបបង្កើតថ្មី ប្រកាសគោលនយោបាយយ៉ាងម៉េច ? ពិសេសដំណើរការទូតនៅចិន» ។
សម្តេចធិបតី បានលើកឡើងថា មានអ្នកខ្លះថា ការយកសេដ្ឋកិច្ច មកអនុវត្តនៅកម្ពុជាមិនល្អនោះទេ ប៉ុន្តែសម្តេចថាការបង្កើតមិត្តជាច្រើន នៅលើអន្តរជាតិ តើវាខុសឬអ្វី ? ខ្មែរគួរតែអបអរសាទនៅពេលមានមិត្តកាន់តែច្រើន កាន់តែល្អ ព្រោះថា ខ្មែរប្រទេសមួយតូច ហើយការធ្វើទំនាក់ទំនងពាណិជ្ជកម្ម យើងត្រូវតែធ្វើ ដើម្បីយកផលប្រយោជន៍មកក្នុងប្រទេសកាន់តែច្រើន ។
ជាមួយគ្នានោះដែរ សម្តេចធិបតី បានលើកឡើងថា បើការធ្វើទំនាក់ទំនងពាណិជ្ជកម្ម ជាមួយចិនអាក្រក់មែន សូមសួរទៅអាមេរិក ជប៉ុនផងថា ធ្វើទំនាក់ទំនងជាមួយចិនធ្វើអី ? នៅក្នុងពិព័ណ៌នៅក្រុងណាននីង ប្រទេសចិន មានតំណាងប្រទេសជាច្រើន បានទៅធ្វើការទាក់ទង ដើម្បីធ្វើពាណិជ្ជកម្មមកប្រទេសគេ ផងដែរ៕
ចែករំលែកព័តមាននេះ