កម្លាំងរដ្ឋបាលព្រៃឈើ សហការជាមួយកម្លាំងកងរាជអាវុធហត្ថផង បានចុះបង្ក្រាប និងរឹបអូសយកឈើប្រណីតជិត១០០ដុំ កាលពីថ្ងៃទី១៨ ខែកញ្ញា ឆ្នាំ២០២៣ ដែលជនល្មើសដឹកជញ្ជូនដោយគ្មានលិខិតអនុញ្ញាត រួចយកទៅស្ដុកទុកក្នុងទីតាំងមួយកន្លែង
ខេត្តបាត់ដំបង ៖ កម្លាំងរដ្ឋបាលព្រៃឈើ សហការជាមួយកម្លាំងកងរាជអាវុធហត្ថផង បានចុះបង្ក្រាប និងរឹបអូសយកឈើប្រណីតជិត១០០ដុំ កាលពីថ្ងៃទី១៨ ខែកញ្ញា ឆ្នាំ២០២៣ ដែលជនល្មើសដឹកជញ្ជូនដោយគ្មានលិខិតអនុញ្ញាត រួចយកទៅស្ដុកទុកក្នុងទីតាំងមួយកន្លែង ស្ថិតនៅភូមិអង់ សង្កាត់អូរចា ក្រុងបាត់ដំបង។
យោងតាមរបាយការណ៍បានឲ្យដឹងថា ឈើប្រណីតទាំងនេះ ត្រូវបានគេដឹកតាមរថយន្តកាមរី និងគោយន្តកន្ត្រៃ យកទៅដាក់នៅក្នុងទីតាំងស្ដុកឈើត្រង់ចំណុចខាងលើ។ ដោយបុរសម្នាក់មានឈ្មោះ ចយ សុខា អាយុ៤៥ឆ្នាំ រស់នៅចំណុច «អក្សរ តេ T» ស្ថិតក្នុងឃុំកំពង់ល្ពៅ ស្រុកសំឡូត ជាអ្នកដឹកជញ្ជូនឈើខុសច្បាប់ទាំងនេះ ហើយត្រូវបានសមត្ថកិច្ចបង្ក្រាបនៅពេលដឹកចូលដល់ទីតាំងនៅភូមិអង់ សង្កាត់អូរចា។
មន្ត្រីកងរាជអាវុធហត្ថ ដែលសហការជាមួយកម្លាំងរដ្ឋបាលព្រៃឈើ បានប្រាប់ឱ្យដឹងថា ព្រះរាជអាជ្ញារងមួយរូប គឺលោក ដួង សារ៉ន ជាអ្នកដឹកនាំកិច្ចប្រតិបត្តិការនេះផ្ទាល់។ គេមិនទាន់ដឹងច្បាស់ថា តើឈើប្រណីតទាំងនេះ ដឹកចេញពីតំបន់ណាមកទេ? ព្រោះផ្នែករដ្ឋបាលព្រៃឈើ គឺជាអ្នកសួរនាំរឿងនេះ។
កោះសន្តិភាព មិនអាចទំនាក់ទំនងសុំការបំភ្លឺបន្ថែមពីមន្ត្រីរដ្ឋបាលព្រៃឈើ ដែលចុះបង្ក្រាបបទល្មើសព្រៃឈើនេះបាននៅឡើយទេ នៅព្រឹកថ្ងៃទី១៩ ខែកញ្ញា ឆ្នាំ២០២៣នេះ។ ប៉ុន្តែបើតាមប្រភពព័ត៌មានបានឲ្យដឹងថា កំណាត់ឈើប្រណីតទាំងនេះ ត្រូវបានគេដឹកជញ្ជូនចេញពីស្រុកសំឡូត។ ប្រភពដដែលបានបញ្ជាក់ថា ឈើទាំងនេះ ភាគច្រើនគេដឹកជញ្ជូនពេលយប់តាមរយៈគោយន្ត ឬរថយន្តចាស់ៗខ្នាតតូច។
ហើយនៅក្នុងកិច្ចប្រតិបត្តិការខាងលើនេះ បើតាមរបាយការណ៍ គឺសមត្ថកិច្ចបានរឹបអូសឈើជាច្រើនប្រភេទ តែជាប្រភេទឈើប្រណីត មានដូចជា ៖ ឈើបេងចំនួន៤២ដុំ, ឈើកកោះ និងឈើគគីចំនួន៣០ដុំ ព្រមទាំងប្រភេទដើមមៀនព្រៃចំនួន២៧ដុំ សរុបគឺជិត១០០ដុំឯណោះ។
សមត្ថកិច្ច បានអះអាងថា អ្នកដឹកជញ្ជូនឈើទាំងនេះ គ្មានលិខិត្រអនុញ្ញាតទេ ហើយត្រូវបានរឹបអូសយកទាំងអស់ រួចប្រគល់ជូនទៅផ្នែករដ្ឋបាលព្រៃឈើ ដើម្បីចាត់ការតាមនីតិវិធី៕
ចែករំលែកព័តមាននេះ