ខេត្តកំពង់ចាម ៖ រថយន្តផ្តាច់ព្រលឹងប្រភេទកាមរីគូទហើមចង្កូតស្តាំដឹកឈើគ្រញូងបានបើកបុកក្មេងប្រុសម្នាក់ឈ្មោះ ចាន់ ទិត្យ អាយុ៨ឆ្នាំ ពេញទំហឹងកាលពីវេលាម៉ោង១១ និង៤៦នាទីព្រឹក ថ្ងៃទី១៤ ឧសភា នៅមុខខ្លោងទ្វារចូលវត្តនគរបាជ័យ ស្ថិតនៅភូមិជង្ហុក ឃុំអំពិល ស្រុកកំពង់សៀមបណ្តាលឱ្យររងរបួសជាទម្ងន់ រួចរថយន្តនោះបើករត់
ខេត្តកំពង់ចាម ៖ រថយន្តផ្តាច់ព្រលឹងប្រភេទកាមរីគូទហើមចង្កូតស្តាំដឹកឈើគ្រញូងបានបើកបុកក្មេងប្រុសម្នាក់ឈ្មោះ ចាន់ ទិត្យ អាយុ៨ឆ្នាំ ពេញទំហឹងកាលពីវេលាម៉ោង១១ និង៤៦នាទីព្រឹក ថ្ងៃទី១៤ ឧសភា នៅមុខខ្លោងទ្វារចូលវត្តនគរបាជ័យ ស្ថិតនៅភូមិជង្ហុក ឃុំអំពិល ស្រុកកំពង់សៀមបណ្តាលឱ្យររងរបួសជាទម្ងន់ រួចរថយន្តនោះបើករត់គេចបាត់។ ក្មេងប្រុសរងគ្រោះត្រូវម្តាយឪពុក នាំទៅសង្គ្រោះនៅមន្ទីរពេទ្យខេត្ត តែជាអកុសលគេបានស្លាប់ រួចដឹកទៅរៀបចំធ្វើបុណ្យតាមប្រពៃណី ។
ម្តាយរបស់ក្មេងប្រុសរងគ្រោះឈ្មោះ ចាន់ ពីន អាយុ២៥ឆ្នាំ រស់នៅភូមិកើតហេតុរៀបរាប់ទាំងបង្ហូរទឹកភ្នែកថា មុនពេលកើតហេតុកូនប្រុសនាងឈ្មោះទិត្យជាកូនតែម្នាក់គត់បានឈរនៅចិញ្ចើមថ្នល់ដើម្បីដើរឆ្លងទៅទិញកៅស៊ូកងមកទុកលេងជាមួយក្មេងៗឯទៀត តែពុំទាន់បានឈានជើងទៅផងបែរជាត្រូវរថយន្តកាមរីដឹកគ្រញូងបើកចេញមកពីក្នុងវត្តនគរបាជ័យក្នុងទិសដៅពីលិចមកកើតបុកពេញទំហឹង ។
ម្តាយក្មេងប្រុសរៀបរាប់ប្រាប់បន្តថា រថ យន្តមិនបានឈប់ទេ គឺបានបន្ថែមល្បឿនបើកគេចទាំងកូនរបស់នាងទើរលើគំរបម៉ាស៊ីន លុះបានចំងាយ៣៥ម៉ែត្រធ្លាក់លើថ្នល់ចាក់បេតុងរងរបួសជាទម្ងន់រហូតដល់សន្លប់។ ក្នុងពេលនោះនាងរត់ទៅលើកបីត្រកងកូនប្រុសរួចហៅម៉ូតូឌុបដឹកយកទៅសង្គ្រោះនៅមន្ទីរពេទ្យខេត្ត តែដោយសាររបួសធ្ងន់ពេកគ្រូពេទ្យមិនអាចសង្គ្រោះបានកូននាងក៏ស្លាប់ទៅ។
អ្នកភូមិប្រាប់ឲ្យដឹងថា រថយន្តផ្តាច់ព្រលឹងដែលបុកក្មេងប្រុសស្លាប់នេះនាពេលកន្លងមកឲ្យតែបើកមកដល់ត្រង់ផ្លូវកោងក្បែរតាព្រហ្មក្នុងវត្តនគរបាជ័យបើកឡើងហើបកង់មួយចំហៀងស្ទើរតែក្រឡាប់ លុះពេលចេញដល់ត្រង់ខ្លោងទ្វារប្រាសាទមិនបង្អង់ល្បឿនទេ បែរជាថែមល្បឿនកាន់តែលឿនឡើងធ្វើឲ្យអ្នកដំណើរម្នាក់ៗស្រៀវឆ្អឹងខ្នងគ្រប់ៗគ្នា ។ ប្រជាពលរដ្ឋសំណូមពរដល់លោកអធិការនគរបាលស្រុកកំពង់សៀមឱ្យចាត់វិធានការតាមច្បាប់ដល់អ្នកបើកបរនេះផង បើពុំនោះទេនៅថ្ងៃក្រោយនឹងមានគ្រោះថ្នាក់ជាបន្តបន្ទាប់ទៀត ។
លោកវរសេនីយ៍ត្រី ប៉ាក ជាតិ អធិការនគរបាលស្រុកកំពង់សៀមប្រាប់តាមទូរស័ព្ទ ឲ្យដឹងថា ក្នុងករណីខាងលើនេះរូបលោកបានចាត់ឲ្យមន្ត្រីជំនាញក្រោមឪវាទទៅស្រាវជ្រាវនៅកន្លែងកើតហេតុ ហើយតាមរយៈសាក្សីកំណត់អត្តសញ្ញាណអ្នកបើកបរបានហើយ ដូច្នេះនឹងកសាងសំណុំរឿងបញ្ជូនទៅសាលាដំបូងខេត្តសុំដីកាតាមចាប់ខ្លួនយកទៅផ្តន្ទាទោសតាមច្បាប់ ។ ក្រុមសាច់ញាតិរបស់អ្នករងគ្រោះបញ្ជាក់ថា ក្នុងករណីដែលបង្កឲ្យស្លាប់បាត់បង់អាយុជីវិតក្មេងប្រុសនេះដាក់ពាក្យបណ្តឹងទាមទារចំនួន១ម៉ឺនដុល្លារ និងឲ្យផ្តន្ទាទោសជនល្មើសតាមច្បាប់ ៕
ចែករំលែកព័តមាននេះ