ក្រុមអ្នករត់ម៉ូតូកង់បី២ក្រុម ឈ្លោះដណ្តើមម៉ូយ រាលដាលដល់អ្នកសារព័ត៌មាន
- បន្ទាយមានជ័យ
ខេត្តបន្ទាយមានជ័យ ៖ ក្រុមអ្នករត់ម៉ូតូកង់បី២ក្រុម បានឈ្លោះដណ្តើមម៉ូយគ្នាបែកផ្សែង រហូតដល់
ខេត្តបន្ទាយមានជ័យ ៖ ក្រុមអ្នករត់ម៉ូតូកង់បី២ក្រុម បានឈ្លោះដណ្តើមម៉ូយគ្នាបែកផ្សែង រហូតដល់ច្រានម៉ូតូកង់បីរបស់ភាគីម្ខាងទៀតឱ្យដេកស្ដូកស្ដឹង ។ លុះក្រុមអ្នកកាសែតទៅថតយកព័ត៌មាន ក៏ត្រូវក្រុមអ្នករត់ម៉ូតូកង់បី បានរុញច្រាន ប្រមាថ និងជេរបញ្ចោរ ហើយក្រុមអ្នកសារព័ត៌មានទាំងនោះក៏ទៅដាក់ពាក្យបណ្តឹង ។
ហេតុការណ៍ខាងលើនេះកើតឡើងកាលពីថ្ងៃទី១៥ ខែកញ្ញា ឆ្នាំ២០២៣ កន្លងទៅ នៅចំណុចអគារ AK៩៧ ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ។
ក្រុមអ្នកសារព័ត៌មានទាំងនោះនិយាយថា នៅពេលទទួលបានដំណឹងថា មានករណីទំនាស់គ្នារវាងអ្នករត់ម៉ូតូកង់បី២ក្រុម រឿងដណ្តើមម៉ូយគ្នា ដោយក្រុមម្ខាងបានលើកម៉ូតូកង់បី១គ្រឿងរបស់ក្រុមម្ខាងទៀត បណ្តាលក្រឡាប់ផ្ងារជើងនោះ ក៏ទៅថតរូបភាពយកព័ត៌មាន ។
ពេលនោះ ស្រាប់តែត្រូវបានភាគីម៉ូតូកង់បីដែលជាក្រុមសមាគម រុញច្រានចេញនិងជេរប្រមាថយ៉ាងចាស់ដៃ ។
ក្រោយពីរងនូវការជេរប្រមាថនិងរុញច្រានបែបនេះ អ្នកសារព័ត៌មានចំនួន៣អង្គភាពដែលបានទៅថតយកព័ត៌មាននៅពេលនោះ ក៏បានទៅដាក់ពាក្យបណ្តឹងនៅប៉ុស្តិ៍នគរបាលអូរជ្រៅ ដើម្បីឲ្យជួយរកយុត្តិធម៌ ។
អ្នកសារព័ត៌មានទាំងនោះនិយាយថា ទំនាស់រវាងក្រុមម៉ូតូកង់បីនិងក្រុមសមាគម ធ្លាប់ប្រទូស្តរ៉ាយនឹងគ្នា២ទៅ៣ដងមកហើយ នៅពេលដែលខាងសមាគមមករករឿងអ្នករត់ម៉ូតូកង់បីក្រៅសមាគម ដោយចោទថា មកដណ្តើមម៉ូយគេ ។
នៅល្ងាចថ្ងៃទី១៥ ខែកញ្ញា ឆ្នាំ២០២៣ គេឃើញឯកឧត្តម ប៉ាន់ ខែមប៊ុនថន នាយករងខុទ្ទកាល័យនាយករដ្ឋមន្ត្រី និងសមត្ថកិច្ច មាននគរបាល និងកងរាជអាវុធហត្ថក្រុងប៉ោយប៉ែតបានទៅកន្លែងកើតហេតុ ហើយសុំឱ្យមន្ត្រីជំនាញរកដំណោះស្រាយដើម្បីបញ្ចប់បញ្ហា ។
ទំនាស់រវាងម៉ូតូកង់បី២ក្រុមរឿងដណ្តើមម៉ូយគ្នា ឈានដល់រុញច្រានទ្រូង និងជេរប្រមាថអ្នកសារព័ត៌មានថែមទៀតនោះ ត្រូវបានដោះស្រាយបញ្ចប់ហើយ ដោយឱ្យសមាគមម៉ូតូកង់៣សុំទោសជាសាធារណៈ ក្រោមការសម្របសម្រួលពីសមត្ថកិច្ច ។
ក្រុមម៉ូតូកង់បីឯកជនបាននិយាយថា មូលហេតុដែលពួកគាត់ឈានដល់នាំគ្នាលើកម៉ូតូកង់បីក្រុមសមាគមសម្ព័ន្ធសេដ្ឋកិច្ច និងរ៉ឺម៉កសន្តិភាពក្រឡាប់ផ្ងារជើង ព្រោះតែក្រុមម៉ូតូកង់បីខាងសមាគមនេះ បានយកមកចតបិទផ្លូវមិនឱ្យចេញ-ចូល ហើយចោទថា មិនឱ្យភ្ញៀវជិះម៉ូតូកង់បីរបស់ក្រុមគេ តែវាជារឿងភ្ញៀវដែលយើងមិនអាចបង្ខំ ឬទាញដៃឱ្យមកជិះម៉ូតូកង់បីក្រុមឯកជនឡើយ ។
ចំណែកក្រុមម៉ូតូកង់បីបានបញ្ជាក់ថា មូលហេតុដែលពួកគាត់យកម៉ូតូកង់់បីបិទផ្លូវមិនឱ្យចេញ-ចូល ព្រោះតែខឹងនឹងក្រុមម៉ូតូកងបីម្ខាងទៀត មិនអនុញ្ញាតឱ្យក្រុមម៉ូតូកង់បីខាងសមាគចូលទៅចាប់ម៉ូយ នៅមុខអគារស្នាក់នៅរបស់ភ្ញៀវ ហើយទាំងកាងថា ក្រុមម៉ូតូឯកជនត្រូវបានម្ចាស់អគារជាអ្នកបង្កើត និងទទួលស្គាល់ រីឯម៉ូតូកង់បីផ្សេងទៀតមិនឱ្យចូល ទើបពួកគេខឹង និងយកម៉ូតូកង់បីបិទផ្លូវក្រុមម៉ូតូកង់បីឯកជន នាំគ្នាលើកក្រឡាប់ផ្ងារជើង ។
រីឯក្រុមអ្នកសារព័ត៌មានបានបញ្ជាក់ថា ក្រោយទទួលព័ត៌មាន បានដឹងមានក្រុមម៉ូតូកង់បីចំនួន២ក្រុមឈ្លោះប្រកែកគ្នា រហូតជិះម៉ូតូកងបីដេញកៀរគ្នាពេញផ្លូវ និងលើកក្រឡាប់ម៉ូតូកង់បីបណ្តាលឱ្យស្ទះចរាចរណ៍ បង្កប៉ះពាល់ដល់សណ្តាប់ធ្នាប់ ទើបអ្នកសារព័ត៌មាន៣អង្គភាពបានទៅថតរូប និងឡាយព័ត៌មាន មិនទាន់សួរព័ត៌មានបានគ្រប់ជ្រុងជ្រោយផង ស្រាប់តែម៉ូតូកង់បីខាងសមាគមមានប្រមាណជាង១០នាក់ មានម្នាក់ពាក់វ៉ែនតាខ្មៅមករុញច្រានទ្រូងអ្នកសារព័ត៌មានម្នាក់ក្នុងចំណោម៣នាក់ ហើយបានជេរប្រមាថមើលងាយ រហូតអ្នកសារព័ត៌មានបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលសង្កាត់អូរជ្រៅជួយរកយុត្តិធម៌ជូន ។
នៅរសៀលថ្ងៃទី១៥ ខែកញ្ញា ឆ្នាំ២០២៣ ឯកឧត្តម ប៉ាន់ ខែមប៊ុនថន នាយរងខុទ្ធកាល័យនាយករដ្ឋមន្ត្រី និងមន្ត្រីសមត្ថកិច្ចពាក់ព័ន្ធទៅដល់កន្លែងទំនាស់ ឯកឧត្តមសម្របសម្រួលថា ទំនាស់រវាងម៉ូតូកង់បីខាងសមាគម និងឯកជន គឺសុំឱ្យ១ក្រុម៨គ្រឿងចូលទៅដឹកនៅចំណុចអគារស្នាក់នៅរបស់ភ្ញៀវ បើសិនជាកើតមានបញ្ហាអសន្តិសុខសណ្តាប់ធ្នាប់ទៀត នឹងមានវិធានការតាមច្បាប់ ។
ដោយឡែកក្រុមម៉ូតូកង់បីខាងសមាគមដែលរុញច្រានទ្រូង និងជេរប្រមាថមើលងាយអ្នកសារព័ត៌មាន៣អង្គភាពនៅពេលចុះអនុវត្តការងារ បុគ្គលដែលប្រព្រឹត្តិមានម្នាក់ពាក់វែនតាខ្មៅ ត្រូវតែសុំទោសអ្នកសារព័ត៌មាននៅចំពោះមុខមហាជន ហើយត្រូវបានបញ្ចប់រឿង ៕
ចែករំលែកព័តមាននេះ