បុរសជាជនជាតិឥណ្ឌូនេស៊ីចំនួន២នាក់ខ្ចីម៉ូតូជនរងគ្រោះជិះទៅផ្សារទឹកពុះ ហើយទុកម៉ូតូ រួចដើរចូលផ្សារ ប៉ុន្តែពេលចេញពីផ្សារវិញ ក៏ស្រាប់តែ
ខេត្តបន្ទាយមានជ័យ ៖ បុរសជាជនជាតិឥណ្ឌូនេស៊ីចំនួន២នាក់ខ្ចីម៉ូតូជនរងគ្រោះជិះទៅផ្សារទឹកពុះ ហើយទុកម៉ូតូ រួចដើរចូលផ្សារ ប៉ុន្តែពេលចេញពីផ្សារវិញ ក៏ស្រាប់តែត្រូវចោរលួ.ចម៉ូតូបាត់។ ប៉ុន្តែចុងក្រោយ ជនសង្ស័យក៏ត្រូវបានសមត្ថកិច្ចចាប់ខ្លួន រួចបញ្ជូនទៅកាន់សាលាដំបូងខេត្តបន្ទាយមានជ័យ កាលពីថ្ងៃទី១៧ ខែកញ្ញា ឆ្នាំ២០២៣នេះ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត បានប្រាប់ឱ្យដឹងថា ជនសង្ស័យដែលត្រូវឃាត់ខ្លួនខាងលើនេះមានឈ្មោះ ខៀវ ពិសិដ្ឋ ហៅដូង ភេទប្រុសអាយុ៣១ឆ្នាំ រស់នៅភូមិក្បាលកោះ សង្កាត់អូរជ្រៅ ក្រុងប៉ោយប៉ែត។
លោកបានបញ្ជាក់ថា ក្រោយពីទទួលពាក្យបណ្តឹងរបស់ឈ្មោះ មាស កុសល់ ហៅភុប រស់នៅភូមិ-ឃុំទួលពង្រ ស្រុកម៉ាឡៃថា កាលពីថ្ងៃទី១២ ខែកញ្ញា ឆ្នាំ២០២៣ នៅវេលាម៉ោង១១និង៣០នាទីយប់ មានជនជាតិឥណ្ឌូនេស៊ីចំនួន២នាក់បានខ្ចីម៉ូតូជនរងគ្រោះ ដើម្បីជិះទៅទិញអីវ៉ាន់នៅក្នុងផ្សារទឹកពុះ។ លុះពេលទៅដល់ផ្សារ ជនជាតិឥណ្ឌូនេស៊ីទាំង២នាក់ក៏បានទុកម៉ូតូ រួចដើរចូលទៅក្នុងផ្សារ ប៉ុន្តែនៅពេលត្រឡប់មកវិញ ក៏ស្រាប់តែបាត់ម៉ូតូតែម្ដង បន្ទាប់មកជនជាតិឥណ្ឌូនេស៊ីទាំង២នាក់នោះ ក៏បានជិះម៉ូតូឌុបមកប្រាប់ម្ចាស់ម៉ូតូវិញថា «ចោរលួ.ចម៉ូតូយកទៅបាត់ហើយ»។
លោកវរសេនីយ៍ត្រី នួន នីណារ៉ូ បានបញ្ជាក់ថា ក្រោយពីទទួលបណ្តឹងភ្លាម កម្លាំងជំនាញបានចុះធ្វើការស្រាវជ្រាវ រួចកំណត់មុខសញ្ញា រហូតឃាត់ខ្លួនជនសង្ស័យម្នាក់មានឈ្មោះ ខៀវ ពិសិដ្ឋ ហៅដូង និងយកបានម៉ូតូត្រឡប់មកវិញ ម៉ាកហុងដាឌ្រីម នៅថ្ងៃទី១៥ ខែកញ្ញា ឆ្នាំ២០២៣ ស្ថិតនៅក្នុងភូមិក្បាលកោះ សង្កាត់អូរជ្រៅ ក្រុងប៉ោយប៉ែត។
ក្រោយពេលចាប់ខ្លួន កម្លាំងជំនាញក៏បាននាំខ្លួនជនសង្ស័យយកមកសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការតាមច្បាប់នៅថ្ងៃទី១៧ ខែកញ្ញា ឆ្នាំ២០២៣នេះ៕
ចែករំលែកព័តមាននេះ