ខេត្តកំពង់ឆ្នាំង ៖ លោកពេញ វិបុល ព្រះរាជអាជ្ញាអមសាលាដំបូងខេត្ត កាលពីព្រឹកថ្ងៃទី១៤ ឧសភា បានដឹកនាំមន្ត្រីជំនាញជលផល ក្នុងនោះមានលោកកែវ ថាយ នាយខណ្ឌរដ្ឋបាលជលផលកំពង់ឆ្នាំង ព្រមទាំងមន្ត្រីផ្នែក និងសង្កាត់ជលផល ចុះត្រួតពិនិត្យទីតាំងភូមិសាស្ត្រព្រៃលិចទឹក នៅចំណុចព្រែកស្លាបគុក ខាងលិច បឹងដំរីសម្រុត ស្ថិតក្នុងឃុំ
ខេត្តកំពង់ឆ្នាំង ៖ លោកពេញ វិបុល ព្រះរាជអាជ្ញាអមសាលាដំបូងខេត្ត កាលពីព្រឹកថ្ងៃទី១៤ ឧសភា បានដឹកនាំមន្ត្រីជំនាញជលផល ក្នុងនោះមានលោកកែវ ថាយ នាយខណ្ឌរដ្ឋបាលជលផលកំពង់ឆ្នាំង ព្រមទាំងមន្ត្រីផ្នែក និងសង្កាត់ជលផល ចុះត្រួតពិនិត្យទីតាំងភូមិសាស្ត្រព្រៃលិចទឹក នៅចំណុចព្រែកស្លាបគុក ខាងលិច បឹងដំរីសម្រុត ស្ថិតក្នុងឃុំប្រឡាយមាស ស្រុកកំពង់លែង ដែលរងការកាប់បំផ្លាញពីជនខិលខូច។
លោកពេញ វិបុល មានប្រសាសន៍ថា ដោយយោងតាមសេចក្តីរាយការណ៍របស់មន្ត្រីជំនាញស្តីពីសកម្មភាពជនខិលខូចលួចកាប់ទន្ទ្រានព្រៃលិចទឹកដែលជាជម្រកត្រីពងកូននោះ ទើបថ្ងៃនេះលោកដឹកនាំមន្ត្រីជំនាញ និងក្រុមអ្នកសារព័ត៌មានមកឃើញផ្ទាល់ភ្នែកតែម្តង។ ការកាប់បំផ្លាញនៅចំណុចនេះមានប្រមាណជាង២ហិកតា គឺជាការកាប់បំផ្លាញព្រៃលិចទឹកដូចជាដើមរាំង ដើមចង្កែង ដែលខ្លះមានគល់ធំៗ ។ ការកាប់បំផ្លាញហើយដុតរានយកដីធ្វើចម្ការបែបនេះ ធ្វើឱ្យប៉ះពាល់ដល់ជម្រកត្រីពងកូន និងមួយផ្នែកទៀតបានបំផ្លាញជម្រកសត្វស្លាបទឹក និងសត្វល្មូនផងដែរ ។
លោកកែវ ថាយ នាយខណ្ឌរដ្ឋបាលជលផលកំពង់ឆ្នាំងបានថ្លែងថា តាមពិតពួកជនខិលខូចបានលបលួចមកកាប់ទន្ទ្រានព្រៃលិចទឹកនេះកាលពីប្រហែលមួយខែមុន ហើយកាលណោះមន្ត្រីជំនាញថ្នាក់ក្រោមបានដឹង និងបានធ្វើកំណត់ហេតុ គឺក្រុមជនល្មើសទាំងអស់មានគ្នា៦នាក់ ប៉ុន្តែយើងធ្វើកំណត់ហេតុបាន៤នាក់ ដោយពួកគាត់ទទួលស្គាល់ថា បានកាប់រានដីព្រៃលិចទឹកនៅចំណុចនោះមែន ឯពីរនាក់ទៀតយើងស្គាល់តែឈ្មោះមិនស្គាល់អាសយដ្ឋាន ម៉្លោះហើយរបាយការណ៍សំណុំរឿងរបស់មន្ត្រីជំនាញវាពុំទាន់ជុំទើបមិនទាន់បានរាយការណ៍ជូនទៅលោកព្រះរាជអាជ្ញាជាលាយលក្ខណ៍អក្សរតាមផ្លូវច្បាប់ ប៉ុន្តែគ្រាន់តែបានរាយការណ៍ដោយផ្ទាល់មាត់តាមទូរស័ព្ទមួយជំហានសិន ។
លោកកែវ ថាយ បន្តថា ជនសង្ស័យដែលបានកសាងសំណុំរឿង ហើយនឹងត្រៀមបញ្ជូនទៅតុលាការមាន ១-ឈ្មោះអ៊ឹម រ៉េត អាយុ៤០ឆ្នាំ ២-ឈ្មោះសុន សុភ័ស្ស អាយុ៣៩ឆ្នាំ ៣-ឈ្មោះលឹម ចន អាយុ២០ឆ្នាំ និង៤-ឈ្មោះគាន សំរេច អាយុ៣០ឆ្នាំ ទាំង៤នាក់ រស់នៅភូមិប្រឡាយមាស។ ពួកគាត់ទាំង៤នាក់សុទ្ធតែទទួលកំហុសថា ពិតជាបានកាប់ដីព្រៃលិចទឹកនៅចំណុចនោះមែន។ ដោយឡែក២នាក់ទៀតដែលមានតែឈ្មោះ ហើយមិនទាន់បានធ្វើកំណត់ហេតុ ព្រោះចេះតែគេចពីការកោះហៅគឺ ម្នាក់ឈ្មោះយឿង ស្រី និងម្នាក់ទៀតឈ្មោះវិន វី។ អ្នកទាំង៦នាក់បានកាប់ទន្ទ្រានដីព្រៃលិចទឹកមានទំហំ២,៨៩ហិកតា (តាមការសារភាពរបស់ពួកគាត់) ប៉ុន្តែតាមការវាស់វែងរបស់មន្ត្រីជំនាញ គឺ មានទំហំ២,២០ហិកតាប៉ុណ្ណោះ ។
លោកនាយខណ្ឌរដ្ឋបាលជលផលបានបន្តថា ជនទាំង៦នាក់ត្រូវបានធ្វើកំណត់ហេតុរួចរាល់អស់ហើយ និងត្រៀមបញ្ជូនទៅតុលាការចាត់ការតាមផ្លូវច្បាប់។ តាមប្រភពពីខាងក្រៅនិយាយថា ក្នុងចំណោមជនទាំង៦នាក់មានមួយចំនួនមិនខ្លាចសមត្ថកិច្ចជំនាញឡើយ ហើយការកាប់ទន្ទ្រានដីព្រៃលិចទឹកនោះ គឺមិនធ្វើដោយផ្ទាល់ដៃទេ គឺជួលគេឱ្យធ្វើ។ សង្ឃឹមថា ច្បាប់ពិតជាមិនអត់ឱនឱ្យអ្នកប្រព្រឹត្តបែបនេះទេ ដើម្បីជាគំរូកុំឱ្យមានជនខិលខូចធ្វើតាម៕
ចែករំលែកព័តមាននេះ