ខេត្តព្រះសីហនុ ៖ មនុស្សចំនួន០២នាក់នៅលើសាឡង់ដឹកខ្សាច់ដែលបានលិចក្នុងសមុទ្រខេត្តព្រះសីហនុត្រូវបានជួយសង្គ្រោះ ។ ការជួយសង្គ្រោះនោះ តាមបទបញ្ជាពីឯកឧត្តមឧត្ដមសេនីយ៍ឯកទូច ពលៈ ប្រធាននាយកដ្ឋាននគរបាលការពារព្រំដែនទឹក និងជាអគ្គលេខាធិការរងនៃគណៈកម្មាធិការជាតិ សន្តិសុខ លម្ហសមុទ្របានចាត់ តាំងកម្លាំងអង្គភាពបង្ក្រាបបទល្មើសលើផ្ទៃសមុទ្រ និងវរសេនាតូច លេខ២៤០ប្រចាំខេត្តព្រះសីហនុចេញអន្តរាគមន៍ផងដែរ ។
សាឡង់ដឹកខ្សាច់ដែលបានលិចនៅចំណុចនិយាមការលេខ 0°45’70.92”N 103°32’22.60”E នាវេលាម៉ោង០៨.១៥នាទីថ្ងៃទី ១៥ ខែកញ្ញា ឆ្នាំ២០២៣ ខាងលិចកោះដូង ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ។
លោកវរសេនីយ៍ឯក ម៉ូ មឿន មេបញ្ជាការបង្ក្រាបនៅលើផ្ទៃសមុទ្រប្រចាំការកោះព្រាបបានឲ្យដឹងថា មូលហេតុដែលសាឡង់នេះលិច ដោយសារមានភ្លៀងធ្លាក់ខ្លាំងខ្យល់បោកបក់ខ្លាំង និងរលកធំៗដែលសាឡង់មានបណ្ដោយប្រវែង៥៧ម៉ែត្រទទឹង១០.៤ម៉ែត្រ ពណ៌ទឹក ប៉ិច លេខសាឡង់ : AG-21190 មានផ្ទុកខ្សាច់ចំនួន៦០០ម៉ែត្រ គីប របស់ ក្រុមហ៊ុន Green Power ។
ជនរងគ្រោះដែលកម្លាំងអន្តរាគមន៍អង្គភាពបង្ក្រាបបទល្មើសលើផ្ទៃសមុទ្រ និងវរសេនាតូចលេខ២៤០ ប្រចាំខេត្តព្រះសីហនុ ជួយសង្គ្រោះ បានចំនួន០២នាក់នោះ ទី១.ឈ្មះ-ឡេ ហ៊ួយថាន់ ភេទប្រុស អាយុ ៤៨ឆ្នាំ ស្រុកកំណើត ក្រុងហ្គាំងធឺ ខេត្តគៀងយ៉ាងប្រទេសវៀតណាម ជាអ្នកបើកបរសាឡង់ ។ ទី២.ឈ្មោះ-ឡេ តាន់ហាយ ភេទប្រុស អាយុ៥១ឆ្នាំ ស្រុកកំណើត ក្រុងហ្គាំងធឺ ខេត្តគៀងយ៉ាង ប្រទេសវៀតណាម។
បច្ចុប្បន្ន ជនរងគ្រោះទាំង២នាក់នោះ សមត្ថកិច្ចយើងបានជួយសង្គ្រោះយកមកដល់អង្គភាពបង្ក្រាបបទល្មើសលើផ្ទៃសមុទ្រដោយសុវត្ថិភាពហើយ ៕
ចែករំលែកព័តមាននេះ