រាជធានីភ្នំពេញ ៖ ប្រទេសកម្ពុជាទទួលបានសិទ្ធិធ្វើជាម្ចាស់ផ្ទះរៀបចំការប្រកួតបាល់ទាត់វគ្គជំរុះក្នុងពូល «ក» AFC President’s Cup 2011 ។ ការប្រកួតមានរយៈពេល៣ថ្ងៃ គឺថ្ងៃទី ២១, ២៣ និង២៥ ខែឧសភា។ ក្នុងចំណោមបណ្តាប្រទេសចំនួន១២ដែលគេចាត់ទុកថា
រាជធានីភ្នំពេញ ៖ ប្រទេសកម្ពុជាទទួលបានសិទ្ធិធ្វើជាម្ចាស់ផ្ទះរៀបចំការប្រកួតបាល់ទាត់វគ្គជំរុះក្នុងពូល «ក» AFC President’s Cup 2011 ។ ការប្រកួតមានរយៈពេល៣ថ្ងៃ គឺថ្ងៃទី ២១, ២៣ និង២៥ ខែឧសភា។
ក្នុងចំណោមបណ្តាប្រទេសចំនួន១២ដែលគេចាត់ទុកថា ជាប្រទេសដែលកំពុងតែមានការអភិវឌ្ឍវិស័យកីឡាបាល់ទាត់នោះមានប្រទេសប៊ូថាន់ បង់ក្លាដេស កម្ពុជា ចិនតៃវ៉ាន់ គីជីស្ថាន ភូមា ណេប៉ាល់ ប៉ាគីស្ថាន ប៉ាឡេស្ទីន ស្រីលង្កា តាជីគីស្ថាន និងតួកម៉ានីស្ថាន។ ការប្រកួតនេះគឺមានបែងចែកជា៣ពូល ក្រៅពីពូល«ក» កម្ពុជាធ្វើជាម្ចាស់ផ្ទះ ពូល«ខ» ធ្វើនៅភូមា និងពូល«គ» ធ្វើនៅណេប៉ាល់។ តាមការឱ្យដឹងពីលោកខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជានេះជាលើកទី១ហើយដែលយើងមានភ័ព្វសំណាងបានធ្វើជាម្ចាស់ផ្ទះរៀបចំការប្រកួត។ ព្រឹត្តិការណ៍មួយនេះ គឺតម្រូវលើក្រុមដែលជាម្ចាស់ជើងឯកក្របខណ្ឌលីកប្រចាំប្រទេសនីមួយៗប៉ុណ្ណោះ។ ក្នុងពូល«ក» ដែលប្រកួតនៅកម្ពុជាមានក្រុមភ្នំពេញក្រោនរបស់កម្ពុជា ក្រុម Neftchi តំណាងឱ្យប្រទេសគីជីស្ថាន ក្រុម Abahani តំណាងឱ្យបង់ក្លាដេស និងDon Bosco តំណាងឱ្យស្រីលង្កា។ កាលបរិច្ឆេទនៃការប្រកួតជើងទី១ធ្វើនៅថ្ងៃទី២១ ខែឧសភា កម្ពុជាជួបស្រីលង្កា រីឯគីជីស្ថានជួបបង់ក្លាដេស។ ជើងទី២ធ្វើនៅថ្ងៃទី២៣ កម្ពុជាជួបបង់ក្លាដេស រីឯស្រីលង្កាជួបគីជីស្ថាន។ ជើងទី៣ ថ្ងៃទី២៥ ខែឧសភា កម្ពុជាជួបគីជីស្ថាន និងបង់ក្លាដេសជួបស្រីលង្កា។
លោករិទ្ធី សំណាង ប្រធានក្លឹបបាល់ទាត់ភ្នំពេញក្រោនអះអាងថា យ៉ាងហោចណាស់លោកត្រូវចំណាយថវិកាជាង១០ម៉ឺនដុល្លារដែរសំរាប់ព្រឹត្តិការណ៍មួយនេះ។ ប៉ុន្តែដើម្បីទប់ទល់ នឹងការចំណាយដ៏ច្រើនសន្ធឹកសន្ធាប់នេះរយៈពេល៣ថ្ងៃ អ្នកចូលទស្សនាត្រូវទិញសំបុត្រតែមិនជាថ្លៃពេកទេ។ កន្លែងទស្សនាក្នុងម្លប់សំបុត្រថ្លៃ១ដុល្លារ និងក្រៅពីនោះតែ១.០០០រៀលប៉ុណ្ណោះ ។
ក្នុងនាមសហព័ន្ធកីឡាបាល់ទាត់កម្ពុជាលោកខៀវ សាម៉េត បានបញ្ជាក់ថា ខាងសហព័ន្ធមានលទ្ធភាពជួយលើផ្នែកបច្ចេកទេស ក្រៅពីនោះគឺក្លឹបខ្លួនឯងជាអ្នករ៉ាប់រងទាំងអស់។លោកកោតសរសើរក្លឹបបាល់ទាត់ភ្នំពេញក្រោនដែលជាក្លឹបបាល់ទាត់មួយនាំមុខគេសព្វបែបយ៉ាងទាំងអស់តាំងពីធនធានកីឡាករ និងថវិកា។ ដូច្នេះដើម្បីជំរុញឱ្យព្រឹត្តិការណ៍នៃការប្រកួតរយៈពេល៣ថ្ងៃនេះមានភាពអធិកអធមបំផុតនោះ លោកសំណូមពរដល់បណ្តាញសារព័ត៌មានទាំងអស់ជួយផ្សព្វផ្សាយឱ្យបានទូលំទូលាយដើម្បីឱ្យមានអ្នកទស្សនាចូលរួមបានច្រើនក៏ដូចជាការលើកទឹកចិត្តដល់កីឡាករកម្ពុជាយើង។
ភ្នំពេញក្រោនដែលតំណាងឱ្យកម្ពុជាក្នុងការចូលរួមប្រកួត AFC President’s Cup លើកនេះ គឺជាម្ចាស់ជើងឯកថ្នាក់ជាតិ២០១០ បន្ទាប់ពីបានយកឈ្នះព្រះខ័នរាជ្យ ៤-៣ នៅវគ្គប្រកួតផ្តាច់ព្រ័ត្រ។ ចាប់តាំងពីបានចូលរួមប្រកួត AFC Presiden’s Cup ឆ្នាំ២០០៥ មកកម្ពុជាមិនធ្លាប់ទទួលបានតំណែងជាម្ចាស់ជើងឯកឡើយ តែក្រុមខេមរាកីឡាធ្លាប់បានឡើងទៅលេងនៅវគ្គពាក់កណ្តាលផ្តាច់ព្រ័ត្រនៅឆ្នាំ២០០៦។
បច្ចុប្បន្នក្លឹបភ្នំពេញក្រោនបានជ្រើសរើសយកលោក Bojan Hodak មកពីប្រទេសក្រូអាតជាគ្រូបង្វឹក។ លោកបានបញ្ជាក់ថា លោកនឹងខិតខំកែប្រែក្លឹបបាល់ទាត់ភ្នំពេញក្រោនឱ្យក្លាយជាក្រុមបាល់ទាត់ដែលមានភាពរីកចំរើនជាងគេនៅរយៈដ៏ខ្លីខាងមុខ។ សព្វថ្ងៃក្លឹបបាល់ទាត់ភ្នំពេញក្រោនកំពុងតែមានពិន្ទុនាំមុខគេក្នុងតារាងនៅក្នុងក្របខណ្ឌបាល់ទាត់មិត្តហ្វូនខេមបូឌាលីក២០១១ ៕
ចែករំលែកព័តមាននេះ