រថយន្តប្រភេទសាំយ៉ុងជាច្រើនគ្រឿង កំពុងតែសម្រុកចូលទៅដឹកឈើក្នុងភូមិសាស្ត្រកោះខ្ញែរ និងភូមិខ្សាច់លាវ ស្ថិតក្នុងឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ យ៉ាងគគ្រឹកគគ្រេង ចំណែកឯ
ខេត្តក្រចេះ ៖ រថយន្តប្រភេទសាំយ៉ុងជាច្រើនគ្រឿង កំពុងតែសម្រុកចូលទៅដឹកឈើក្នុងភូមិសាស្ត្រកោះខ្ញែរ និងភូមិខ្សាច់លាវ ស្ថិតក្នុងឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ យ៉ាងគគ្រឹកគគ្រេង ចំណែកឯសមត្ថកិច្ចនៅទីនោះ និងតាមដងផ្លូវ មិនខ្ចីបង្ក្រាប សង្ស័យជាឆ្នាំងបាយ។
នៅយប់ថ្ងៃទី១២ ខែកញ្ញា ឆ្នាំ២០២៣នេះ ក៏គេសង្កេតឃើញមានរថយន្តសាំយ៉ុងជាច្រើនគ្រឿងចូលដឹកឈើ ដែលទូកដឹកឈើយកមកទម្លាក់នៅមាត់កំពង់។ ហើយនៅយប់នោះ ក៏មានទូកចូលមកចំនួន២គ្រឿង ដែលជារបស់ឈ្មោះឃាង នៅកោះខ្ញែរ និងឈ្មោះលី ទម្លាក់នៅមាត់កំពង់នេះដែរ ដោយក្នុងមួយទូកផ្ទុកឈើចាប់ពី១០ម៉ែត្រគូប ទៅ១៥ម៉ែត្រគូបឯណោះ ស្ថិតក្នុងភូមិខ្សាច់លាវ ឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ។ ចំណែកនៅយប់ថ្ងៃទី១៣ ខែកញ្ញានេះវិញ ក៏មានរថយន្តសាំយ៉ុងចំនួន៨គ្រឿងផងដែរ។
បើតាមប្រភពពីប្រជាពលរដ្ឋរស់នៅក្នុងតំបន់កោះខ្ញែរ បានប្រាប់ឱ្យដឹងថា នៅក្នុងភូមិសាស្ត្រនោះ មានក្រុមដឹកឈើតាមទូកចេញពីព្រំប្រទល់ស្រុកសៀមបូក ខេត្តស្ទឹងត្រែង ប្រមាណជា៥ទៅ៦នាក់ ឆ្លងទន្លេតាមទូកនៅពេលយប់ រួចមកទម្លាក់នៅមាត់កំពង់កោះខ្ញែរ និងភូមិខ្សាច់លាវ ហើយក៏មានរថយន្តសាំយ៉ុងមកដឹកបន្ត។
ប្រភពដដែលបន្តថា ឯរថយន្តដែលចូលទៅដឹកនោះ គឺមានចំនួន៥ម្ចាស់ ដោយក្នុងមួយម្ចាស់មានរថយន្តសាំយ៉ុង៣គ្រឿងដឹកជញ្ជូនចេញពីស្រុកអូរគ្រៀង ឆ្ពោះទៅខេត្តត្បូងឃ្មុំ។ ហើយការដឹកជញ្ជូននេះ ភាគច្រើននៅវេលាម៉ោង១២យប់ រហូតដល់ម៉ោង៣ទៀបភ្លឺ ក្នុងនោះរួមមាន ៖ ឈ្មោះឆាយ, ឈ្មោះអូន, ឈ្មោះឆយ, ឈ្មោះបុល និងឈ្មោះស្រីល័ក្ខ។ ហើយសកម្មភាពទាំងនេះ គឺតែងតែដឹកជញ្ជូនជាប្រចាំរៀងរាល់យប់ ចំណែកសមត្ថកិច្ចគ្រប់លំដាប់ថ្នាក់ មិនមានការបង្ក្រាបនោះទេ។
ទាក់ទឹននឹងការដឹកជញ្ជូនឈើចេញពីតំបន់ភូមិសាស្ត្រខាងលើនោះ លោក កែវ ចំណាន់ រដ្ឋបាលព្រៃឈើអូរគ្រៀង និងប្រធានស្នាក់ការបរិស្ថានប្រចាំការនៅទីនោះ មិនអាចសុំការទំនាក់ទំនងបានទេ៕
ចែករំលែកព័តមាននេះ