ខេត្តក្រចេះ ៖ ឈើប្រណីតខុសច្បាប់មានចំនួនរាប់សិបកំណាត់ ត្រូវបង្ក្រាបដោយក្រុមសមត្ថកិច្ចចម្រុះក្រោយពីការចុះឆែកទីតាំងស្ដុកឈើប្រណីតមួយនៅចំណុចព្រៃចំការខាងក្រោយភូមិព្រែកជីក ឃុំសោប ស្រុកព្រែកប្រសព្វ ត្រើយខាងលិចទន្លេមេគង្គ កាលពីថ្ងៃទី១២ ឧសភា
ខេត្តក្រចេះ ៖ ឈើប្រណីតខុសច្បាប់មានចំនួនរាប់សិបកំណាត់ ត្រូវបង្ក្រាបដោយក្រុមសមត្ថកិច្ចចម្រុះក្រោយពីការចុះឆែកទីតាំងស្ដុកឈើប្រណីតមួយនៅចំណុចព្រៃចំការខាងក្រោយភូមិព្រែកជីក ឃុំសោប ស្រុកព្រែកប្រសព្វ ត្រើយខាងលិចទន្លេមេគង្គ កាលពីថ្ងៃទី១២ ឧសភា ។
ឈើប្រណីតមានចំនួនរាប់សិបកំណាត់ដែលសមត្ថកិច្ចចម្រុះឆែកឆេររកឃើញនេះត្រូវរឹបអូសយកទាំងស្រុង ដោយក្នុងនោះមានឈើបេង៣៣៩ដុំ ស្មើនឹង១៣,៥៤៥ម៉ែត្រគូប ឈើធ្នង់ប្រមាណជាង១៨ម៉ែត្រគូប ឈើគ្រញូងចំនួន៧៤ដុំ ស្មើនឹង៤៧៧គីឡូក្រាម ព្រមទាំងមានឈើធ្នង់២៦ដុំ ស្មើនឹង៤,៨៧៤ម៉ែត្រគូប ឈើទាំងនេះឈ្មួញបានដឹកជញ្ជូនយកមកស្ដុកទុក ដើម្បីដឹកជញ្ជូនចេញតាមទូកទៅលក់បន្ដនៅចំណុចកំពង់រាំង ស្រុកតំបែរ ខេត្ដកំពង់ចាម ដើម្បីនាំទៅលក់បន្ដនៅច្រកព្រំដែនប្រទេសវៀតណាម ។
នេះជាប្រតិបត្ដិការលើកទីមួយសម្រាប់ការចុះបង្ក្រាបទីតាំងស្ដុកឈើដ៏ច្រើនបំផុតក្នុងទឹកដីស្រុកព្រែកប្រសព្វភាគខាងលិចទន្លេមេគង្គខេត្ដក្រចេះដែលកន្លងមកត្រូវបានគេដឹងថា តំបន់នេះត្រូវបានឈ្មួញធ្វើសកម្មភាពយ៉ាងក្ដៅគគុកតាម ទូក និងរូបភាពផ្សេងៗមួយចំនួនទៀតទៅលើការដឹកជញ្ជូនឈើគ្រប់ប្រភេទ ទាំងយប់ទាំងថ្ងៃ ហើយក៏មិនដែលឮថា មានអាជ្ញាធរមានសមត្ថកិច្ចណាមួយបង្ក្រាបបានដែរ គឺថែមទាំងបណ្ដែតបណ្ដោយឱ្យក្រុមឈ្មួញទាំងនោះដឹកជញ្ជូនដោយសេរីតាមទំនើងចិត្ដ។ ក្នុងសកម្មភាពបង្ក្រាបឈើយ៉ាងច្រើនមួយករណីនេះគឺមានការដឹកនាំផ្ទាល់ពីលោកញាណ សារ៉ោ អភិបាលរង លោកងិន ពេជ្រ ព្រះរាជអាជ្ញារងអមសាលាដំបូងខេត្ដ មន្ដ្រីខណ្ឌរដ្ឋបាលព្រៃឈើខេត្ដ និងកម្លាំងប៉ូលិសជាច្រើនរូបទៀត។
ទីតាំងស្ដុកឈើប្រណីតដ៏ធំមួយនេះ គឺស្ថិតក្នុងដែនរដ្ឋបាលសង្កាត់ព្រៃឈើជ្រោយបន្ទាយ ហើយឈើទាំងអស់នេះគេដឹងថា ពួកឈ្មួញបានជញ្ជូនតាមរទេះគោក្របីចេញពីព្រៃប្រមូលយកទៅស្ដុកទុកនៅក្រោយភូមិ និងមួយចំនួនទៀតក្រុមឈ្មួញយកទៅផ្ញើតាមផ្ទះប្រជាពលរដ្ឋនៅជិតខាងដោយឱ្យប្រាក់ឈ្នួល ហើយកន្លងមកគឺធ្លាប់បានដឹកចេញបន្ដជាញឹកញាប់ណាស់ តែមិនឃើញមានការបង្ក្រាប ។ ក្នុងប្រត្ដិបត្ដិការនោះ សមត្ថកិច្ចនៅមិនចាប់ខ្លួនម្ចាស់ឈើណាម្នាក់ទេ ប៉ុន្ដែសមត្ថកិច្ចបានបញ្ជាក់អះអាងថា ជនជាម្ចាស់ដែលបានរត់គេចខ្លួននេះគឺសមត្ថកិច្ចបានស្គាល់អត្ដសញ្ញាណហើយៗកំពុងតែតាមស្រាវជ្រាវ ។ ឈើទាំងអស់នេះគេដឹងថា មានចំនួនច្រើនម្ចាស់ ។ តាមអ្នកស្រុកឱ្យដឹងថា ក្រៅពីទីតាំងស្ដុកឈើដ៏ធំមួយដែលត្រូវបង្ក្រាបនេះ នៅមានទីតាំងស្ដុកឈើ និងការរកស៊ីដឹកជញ្ជូនឈើខុសច្បាប់ ជាពិសេសឈើប្រណីតជាច្រើនទីតាំងទៀតដែលគេមិនបានយកចិត្ដទុកដាក់ បង្ក្រាប ព្រោះវាជាឆ្នាំងបាយរបស់សមត្ថកិច្ច ៕
ចែករំលែកព័តមាននេះ