រាជធានីភ្នំពេញ ៖ ស្រា គឺជាសារជាតិពុលម្យ៉ាង ដែលត្រូវបានផលិតចេញពីម្សៅមេ ហើយត្រូវបានគេប្រើប្រាស់យ៉ាងទូលំទូលាយ ព្រោះវាជាសារជាតិដែលមានឥទ្ធិពលដល់ចិត្តសាស្ត្រ និងធ្វើឲ្យមានការផ្លាស់ប្តូរផ្នែកអារម្មណ៍ដល់អ្នកប្រើប្រាស់ទៀតផង ។ មានសំណួរបងប្អូនជាច្រើនតែងតែឆ្ងល់…
រាជធានីភ្នំពេញ ៖ ស្រា គឺជាសារជាតិពុលម្យ៉ាង ដែលត្រូវបានផលិតចេញពីម្សៅមេ ហើយត្រូវបានគេប្រើប្រាស់យ៉ាងទូលំទូលាយ ព្រោះវាជាសារជាតិដែលមានឥទ្ធិពលដល់ចិត្តសាស្ត្រ និងធ្វើឲ្យមានការផ្លាស់ប្តូរផ្នែកអារម្មណ៍ដល់អ្នកប្រើប្រាស់ទៀតផង ។ មានសំណួរបងប្អូនជាច្រើនតែងតែឆ្ងល់ និងសួរថា លោកគ្រូ តើយើងញាំប៊ីយេរប៉ុន្មានកំប៉ុងទើបសុខភាពល្អ ? ព្រោះមានអ្នកខ្លះថា ហូបប៊ីយេរមួយថ្ងៃ មួយកំប៉ុងសុខភាពល្អ និងអ្នកខ្លះទៀតថា មិនល្អឡើយ ។
ដើម្បីឲ្យអស់ចម្ងល់បងប្អូនយើងនូវសំណួរខាងលើនោះ វេជ្ជបណ្ឌិត និត ប៊ុនតុងយី ក៏បានបកស្រាយនៅក្នុងវីដេអូ នៅក្នុងហ្វេសប៊ុក កាលពីថ្ងៃទី១០ ខែកញ្ញានេះ ដែលមានរយៈពេល១នាទី និង៣៦វិនាទី ដោយបានបញ្ជាក់ថា ហើយចុះ អ្នកគិតថា ប៉ុន្មានកំប៉ុងទៅទើបមានសុខភាពល្អ ? ១កំប៉ុង ២កំប៉ុង ឬមួយយួរ ?
ទន្ទឹមនោះដែរ វេជ្ជបណ្ឌិត និត ប៊ុនតុងយី ក៏បានបញ្ជាក់ថាកាលពី៣ឆ្នាំមុននោះ ខ្ញុំបានណែនាំអ្នកទាំងអស់គ្នាថា មួយថ្ងៃញាំប៊ីយេរមួយកំប៉ុង អាចជួយសុខភាពរបស់យើងបានល្អ ។ ប៉ុន្តែអ្វីៗពេលនេះប្រែប្រួលហើយ ហើយចម្លើយរបស់ខ្ញុំថ្ងៃនេះអាចធ្វើឲ្យអ្នកទាំងអស់គ្នាមានការខកបំណង ។
វេជ្ជបណ្ឌិត និត ប៊ុនតុងយី ក៏បានបន្តថា ហេតុអីទៅ ? ពីព្រោះអង្គការសុខភាពពិភពលោក (World Health Organization) បានប្រកាសថា នៅឆ្នាំ២០២៣នេះបានប្រកាសថា កម្រិតនៃជាតិអាល់កុលប៉ុណ្ណាក៏ដោយ ក៏មិនអាចជួយឲ្យសុខភាពរបស់យើងនេះប្រសើរបានដែរ ហើយគេថាទៀត សូម្បីតែទឹកមួយដំណក់នៃជាតិអាល់កុល ក៏ជះឥទ្ធិពលដល់សុខភាពយើងដែរ ។
ជាមួយគ្នានោះដែរ វេជ្ជបណ្ឌិត និត ប៊ុនតុងយី ក៏បានបន្ថែមថា លើសពីហ្នឹង គេបានចាត់ថ្នាក់ជាតិអាល់កុល គឺជាសារធាតុមួយដែលអាចបង្កទៅជាជំងឺមហារីកដល់មនុស្ស អ៊ីចឹងសម្រាប់បងៗដែលកំពុងតែទទួលទានជាតិអាល់កុល ឬប៊ីយេរ ជាប្រចាំអាចសាកគិតឡើងវិញ ខ្ញុំអាចផ្តល់ជាព័ត៌មានជូនបងៗបានដឹង ហើយសម្រាប់ខ្ញុំក៏សូមណែនាំបងៗផងដែរ បើសិនជាកាត់បានកាត់ខ្លះទៅបងណា ។
សូមបញ្ជាក់ថា ៖ ជាញឹកញាប់ គេតែងមានការភ័ន្តច្រទ្បំថា សុរាជាសារជាតិដែលនាំឲ្យមានការភ្ញោច តែតាមពិតទៅសកម្មភាពទាំងនេះអាចកើតមាននៅពេលពួកគេពិសាវាក្នុងបរិមាណតិចប៉ុណ្ណោះ ដែលឥទ្ធិពលទាំងនោះមានដូចជា កាត់បន្ថយភាពតានតឹង ធ្វើឲ្យអារម្មណ៍ស្រាកស្រាន្ត និងសប្បាយរីករាយ ។ ហេតុផលទាំងនេះហើយដែលនាំឲ្យមនុស្សភាគច្រើនពិសាសុរាជាលក្ខណៈទូទៅក្នុងឱកាសណាមួយម្តងម្កាល ។ ផ្ទុយមកវិញ សុរា គឺជាសារជាតិមួយនាំឲ្យមានការចុះខ្សោយដល់មជ្ឈមណ្ឌលប្រព័ន្ធប្រសាទកណ្តាល ដែលឥទ្ធិពលទាំងនោះស្ទើរតែទាំងអស់ប៉ះពាល់ទៅលើកោសិកា និងប្រព័ន្ធប្រសាទទាំងមូល នៅពេលដែលគេបង្កើនកំហាប់សុរាទៅក្នុងសរីរាង្គ ៕
ចែករំលែកព័តមាននេះ