ខេត្តបាត់ដំបង ៖ រោងសិប្បកម្មផលិតធ្យូងអនាម័យ និងចំហុយឈើមួយកន្លែងត្រូវអគ្គិភ័យលេងត្របាក់អស់គ្មានសល់ កាលពីវេលាម៉ោងជាង១១យប់ថ្ងៃទី១២ កញ្ញា នៅចំណុចភូមិកំពង់ឆ្លង ឃុំឈើទាល ស្រុកបាណន់ ដែលគេសង្ស័យបណ្ដាលមកពីកាទុស្សេខ្សែភ្លើង…
ខេត្តបាត់ដំបង ៖ រោងសិប្បកម្មផលិតធ្យូងអនាម័យ និងចំហុយឈើមួយកន្លែងត្រូវអគ្គិភ័យលេងត្របាក់អស់គ្មានសល់ កាលពីវេលាម៉ោងជាង១១យប់ថ្ងៃទី១២ កញ្ញា នៅចំណុចភូមិកំពង់ឆ្លង ឃុំឈើទាល ស្រុកបាណន់ ដែលគេសង្ស័យបណ្ដាលមកពីកាទុស្សេខ្សែភ្លើង ខណៈដែលម្ចាស់មិនបានស្នាក់នៅ ។
នាយប៉ុស្ដិ៍នគរបាលឈើទាល លោក ស៊ីម ពិទូ បានឲ្យដឹងថា ម្ចាស់រោងសិប្បកម្មផលិតធ្យូងនោះឈ្មោះ គឹម អៀង ភេទប្រុស អាយុ៥៥ឆ្នាំ រស់នៅភូមិអូរតាគាំ២ សង្កាត់ទូលតាឯក ក្រុងបាត់ដំបង។ លោកប្រាប់ថា រោងសិប្បកម្មនោះធ្វើពីឈើប្រក់ស័ង្កសី ទំហំ១០ម៉x៣០ម៉ បំពាក់ម៉ាស៊ីន ឬម៉ូទ័រផលិតធ្យូង និងចំហុយឈើខ្នាតធំចំនួន០៤គ្រឿង ដែលមានតំលៃរាប់ម៉ឺនដុល្លារ ។
អគ្គិភ័យបានកើតឡើងនៅពេលម្ចាស់មិនបានស្នាក់នៅ ហើយអាចបណ្ដាលមកពីទុស្សេខ្សែចរន្តអគ្គិសនីភ្ជាប់ម៉ូទ័រ ទើបបង្កជាអគ្គិភ័យឆេះខ្ទេចខ្ទីរតែម្ដង ។ បើតាមសាក្សីបាននិយាយថា អគ្គិភ័យបានកើតឡើងជិតពាក់កណ្ដាលអធ្រាត្រទៅហើយ ។ អ្នកភូមិបានភ្ញាក់ផ្អើលពេលឃើញអណ្ដាតភ្លើងឆាបឆេះកាន់តែខ្លាំង ទើបអ្នកភូមិចេញជួយអន្តរាគមន៍ពន្លត់ តែម្ចាស់មិនបានស្នាក់នៅក្នុងរោងសិប្បកម្មទេ ។ លុះលោកមេភូមិទាក់ទងតាមទូរស័ព្ទ ទើបម្ចាស់ដឹងរឿងនេះ។
យោងតាមរបាយការណ៍បឋមមន្ត្រីមូលដ្ឋាន ដែលបានសួរនាំម្ចាស់សិប្បកម្មនេះ តុល្យការនៃការខូចខាត រួមមានរោងសិប្បកម្ម០១ខ្នង ប្រភេទឈើស្វាយចំនួន១០ម៉ែត្រគីប ម៉ាស៊ីនឬម៉ូទ័រផលិតធ្យូងចំនួន០៤គ្រឿង រួមនឹងសម្ភារផ្សេងៗមួយចំនួនទៀត ដែលគិតជាទឹកប្រាក់ខាតបង់អស់ជាង០៣ម៉ឺនដុល្លារ ។
លោក ស៊ីម ពិទូ មេប៉ុស្ដិ៍ឈើទាលបានបញ្ជាក់ដែរថា សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន០៤គ្រឿង បានបាញ់ទប់ស្កាត់មិនឲ្យមានការឆេះឆ្លងរាលដាលដល់លំនៅឋានពលរដ្ឋនៅក្បែរៗនោះ ខណៈរោងសិប្បកម្មឆេះសល់តែគ្រោងឆ្អឹង ។
ចែករំលែកព័តមាននេះ