ADផ្ទាំងផ្សព្វផ្សាយពាណិជ្ជកម្ម

Picture

សាស្ត្រាចារ្យ យុន ធា​រ៉ា ស្នើ​អ្នក​សម្តែង​ចាប៉ី​គួរ​ហាត់​​ឧបករណ៍​បន្ថែម ដោយ​យក​ព្រឹទ្ធា​ចារ្យ​ភិ​រម្យ ប្រាជ្ញ ឈួ​ន​ ជាគំរូ

9 ខែ មុន
  • ភ្នំពេញ

សាស្ត្រាចារ្យ​ផ្នែក​ឧបករណ៍​ភ្លេងបុរាណ លោក យុន ធា​រ៉ា បាន​ធ្វើការ​សំណូមពរ​ដល់​លោកគ្រូ អ្នកគ្រូ និង​អ្នក​សម្តែង​ចាប៉ី​ទាំងអស់ គួរ​ហាត់​ឧបករណ៍​មួយ​នេះ​បន្ថែម​ឲ្យ​បាន​ល្អ ទើប​អាច​រំលេច​ឧបករណ៍​ចាប៉ី​នេះ​ឲ្យ​កាន់តែ​ល្បី ដោយ​យក​ព្រឹទ្ធាចារ្យ

រាជធានី​ភ្នំពេញ ៖ សាស្ត្រាចារ្យ​ផ្នែក​ឧបករណ៍​ភ្លេងបុរាណ លោក យុន ធា​រ៉ា បាន​ធ្វើការ​សំណូមពរ​ដល់​លោកគ្រូ អ្នកគ្រូ និង​អ្នក​សម្តែង​ចាប៉ី​ទាំងអស់ គួរ​ហាត់​ឧបករណ៍​មួយ​នេះ​បន្ថែម​ឲ្យ​បាន​ល្អ ទើប​អាច​រំលេច​ឧបករណ៍​ចាប៉ី​នេះ​ឲ្យ​កាន់តែ​ល្បី ដោយ​យក​ព្រឹទ្ធាចារ្យ ភិ​រម្យ ប្រាជ្ញ ឈួ​ន ធ្វើ​ជា​គំរូ​។

សាស្ត្រាចារ្យ​រូប​នេះ បាន​បញ្ជាក់​ថា ក្រៅពី​សំឡេង អត្ថរូប អត្ថរស និង​ចំណាប់ចុងចួន​រណ្តំ​ល្អ​ប្រសើរ​ហើយ គួរ​ហ្វឹកហាត់​សម្តែង​ឧបករណ៍​ចាប៉ី​ដង​វែង​នេះ​ឱ្យ​បាន​ល្អ​បន្ថែម ដោយ​មើលទៅ​លើ​ការ​លេង​របស់​លោក​ព្រឹទ្ធាចារ្យ ភិ​រម្យ ប្រាជ្ញ ឈួ​ន យ៉ាង​ហោច​ណាស់​ក៏​ប្រហាក់ប្រហែល​ឬ​ក្រោម​បន្តិច​ក៏​ល្អ ។

លោក យុន ធា​រ៉ា បាន​បង្ហោះ​សារ​នៅ​លើ​បណ្តាញ​សង្គម​ថា «​លោក​ព្រឹទ្ធាចារ្យ​ភិ​រម្យ ប្រាជ្ញ ឈួ​ន សម្តែង​ទោល​ចាប៉ី​ដង​វែង​មាន​៦​បទ (១-​ផាត់ជាយ ២-​សា​រោ​មេ ៣-​ផាត់ជាយក្លាយ ៤-​នរ​គ​រាជ ៥-​បំពេ និង​៦-​បង្គង​ក្អែក​) បន្តបន្ទាប់​គ្នា​មិន​ដាច់ (Nonstop) ល្អ​គ្មាន​២ នៅ​លើ​ពិភពលោក​យើង​នេះ​»​។

លោក​ថា «​សំណូមពរ​ខ្ញុំ​ចំពោះ​លោកគ្រូ អ្នកគ្រូ លោក លោកស្រី អ្នក​នាង កញ្ញា ដែល​ចេះ​សម្តែង​ចម្រៀង​​ចាប៉ី​ដង​វែង ក្រៅពី​សំឡេង អត្ថរូប អត្ថរស និង​ចំណាប់ចុងចួន​រណ្តំ (​ទាំង​ក្នុង​ល្បះ និង​ឆ្លង​ល្បះ​) ល្អ​ប្រសើរ​ហើយ សូម​មេត្តា​ហ្វឹកហាត់​សម្តែង​ឧបករណ៍​ចាប៉ី​ដង​វែង​នេះ​ឱ្យ​បាន​ល្អ​ផង បើ​មិន​បាន​ប្រហែល​លោក​ព្រឹទ្ធាចារ្យ ភិ​រម្យ ប្រាជ្ញ ឈួ​ន យ៉ាង​ហោច​ណាស់​ក៏​ប្រហាក់ប្រហែល ឬ​ក្រោម​គាត់​បន្តិចបន្តួច ទើប​អាច​រំលេច​ឧបករណ៍​ចាប៉ី​ឱ្យ​ល្បី​លើ​ពិភពលោក​បាន​។ បំណង​ល្អ​ក្នុង​ន័យ​ស្ថាបនា​»​។

បន្ថែម​ពីលើ​អ្វី​ដែល​បាន​បង្ហោះ​នេះ លោក​សាស្ត្រាចារ្យ យុន ធា​រ៉ា ក៏​បាន​អះអាង​បញ្ជាក់​ប្រាប់​កោះសន្តិភាព​តាម​សារ​អេ​ឡិច​ត្រូ​និ​ច​ផង​ដែរ​ថា «​អ្វី​ដែល​លោក​សំណូមពរ​នេះ គឺ​មាន​គោលបំណង​ចង់​ឲ្យ​សិល្បៈ​ផ្នែក​ចាប៉ី​ដង​វែង​នេះ​កាន់តែ​ល្អ និង​មាន​ភាព​ទាក់ទាញ​សម្រាប់​អ្នក​ទស្សនា​តែ​ប៉ុណ្ណោះ​»​។

លោក​បញ្ជាក់​ថា «​លោក​មិន​បាន​បន្ទោស​បង្អាប់​ទៅ​លើ​អ្នក​សម្តែង​សិល្បៈ​ចាប៉ី​ដង​វែង​ណា​ម្នាក់​ឡើយ ពោល​គឺ​លោក​គ្រាន់តែ​មាន​បំណង​ចង់​ឲ្យ​អ្នកលេង​ចាប៉ី​ដង​វែង​ទាំងអស់​គួរ​គិត​ពី​ការ​លេង​ឧបករណ៍​ចាប៉ី​ឲ្យ​បាន​ល្អ​ផង ពោល​គឺ​កុំ​គិតតែ​ពី​ការ​ច្រៀង​ពីរោះ និង​ការ​ចាប់​ចុង​ជួន​ល្អ​តែ​មួយ​មុខ​»​។

យ៉ាងណា លោក​បន្ថែម​ថា «​ករណី​នេះ វា​អាច​ពិបាក​ដែរ ព្រោះ​បើ​មានការ​តឹងតែង​ពេក​នោះ វា​នឹង​រឹតតែ​ពិបាក ដើម្បី​ទាក់ទាញ​ឲ្យ​អ្នក​មក​ហាត់រៀន ប៉ុន្តែ​យើង​ក៏​គួរតែ​គិត​ពី​បញ្ហា​នេះ​ដែរ ចំពោះ​អ្នក​ចង់​ចាប់​យក​សិល្បៈ​បុរាណ​ផ្នែក​មួយ​នេះ ដើម្បី​ឲ្យ​វា​កាន់តែ​ល្អ​ប្រសើរ​»​។

យ៉ាងណា បើ​តាម​លោក​សាស្ត្រាចារ្យ យុន ធា​រ៉ា ថា «​លោក​សូម​លើកទឹកចិត្ត​ចំពោះ​អ្នក​ហាត់រៀន​ចាប៉ី​ដង​វែង ដោយសារ​សិល្បៈ​នេះ អ្នក​សម្តែង​មិន​ពិបាក​ប្រមូលគ្នា​ច្រើន ហើយ​ប្រាក់​ចំណូល​ក៏​បាន​ច្រើន ប្រសិនបើ​យើង​ហាត់រៀន​បាន​ល្អ​តាម​ក្បួនខ្នាត និង​មើល​លំនាំ​តាម​ព្រឹទ្ធាចារ្យ​ជើង​ចាស់​ៗ»​។

ដោយឡែក​ពាក់ព័ន្ធ​បញ្ហា​ខាងលើ​នេះ អ្នកសិល្បៈ​ចាប៉ី​ដង​វែង គឺ​លោក សាន សុវណ្ណ​ឌឿ​ន បាន​យល់​ស្រប​ចំពោះ​ការ​លើក​ឡើង​របស់​លោក​ព្រឹទ្ធាចារ្យ យុន ធា​រ៉ា នា​ពេល​នេះ ប៉ុន្តែ​លោក​ក៏​បាន​ស្នើ​ឲ្យ​មាន​សាលារៀន​ត្រឹមត្រូវ​លើ​សិល្បៈ​បុរាណ​មួយ​នេះ​ផង​ដែរ​។

លោក​បាន​អះអាង​ប្រាប់​កោះសន្តិភាព​ឱ្យ​ដឹង​ថា «​ក្រសួង​វប្បធម៌ គួរ​មាន​សាលា​មួយ​បង្ហាត់​ចាប៉ី​ដង​វែង​ច្បាស់លាស់ ដោយ​យក​លំនាំ​តាម​លោក ប្រាជ្ញ ឈួ​ន មួយ​ផ្លូវ តាម​លោក គង់ ណៃ មួយ​ផ្លូវ និង​លោក នេ​ត ប៉េ​, លោក ម៉​ន ស៊ុន មួយ​ផ្លូវ​ជាដើម​។​ល​។​»​។

លោក​បញ្ជាក់​ថា «​បន្តិចទៀត ធនធាន​ចាស់​ៗ​ដែល​នៅ​សល់​អាច​នឹង​បាត់បង់​សមត្ថភាព​សម្តែង​ហើយ ដោយសារ​ពួក​គាត់​កាន់តែ​ចាស់​ទៅ​ៗ និង​កំពុង​មាន​ផ្ទុក​នូវ​ជំងឺ ហើយ​បើ​យើង​មិន​រក្សា​ពួក​គាត់​ឲ្យ​ហ្វឹកហាត់ និង​គ្មាន​កន្លែង​ឲ្យ​ពួក​គាត់​ហ្វឹកហាត់​នោះ លោក​ធានា​នឹង​អាច​បាត់បង់​»​។

បើ​តាម​លោក សាន សុវណ្ណ​ឌឿ​ន បញ្ជាក់​ទៀត​ថា សម្រាប់​រូប​លោក គឺ​លោក​ទទួលស្គាល់​ថា លោក​អាច​មាន​ជំនាញ​ក្នុង​ការ​ច្រៀង​ចាប់​ចុង​ជួន​ប៉ុណ្ណោះ ហើយ​សម្រាប់​ការ​លេង​ឧបករណ៍ គឺ​លោក​ធ្វើ​មិនសូវ​បាន​ល្អ​ឡើយ ប៉ុន្តែ​ប្រសិនបើ​មាន​សាលា​ហាត់រៀន​ត្រឹមត្រូវ​នោះ លោក​អាច​នឹង​ទៅ​រៀន​បន្ថែម​»​។ លោក​ថា «​សំខាន់​ការ​លើកទឹកចិត្ត ហើយ​លោក​ជឿ​ថា ប្រសិនបើ​យើង​ចេះ​ខ្លះ​ហើយ សម្រាប់​ការ​ហាត់រៀន​ឧ​បក​ណ៍​ភ្លេង​បន្ថែម​នោះ គឺ​នឹង​មិន​ពិបាក​ឡើយ​» ។

ចំណែក​លោក ពេ​ជ សា​រ៉ាត ប្រធាន​សហគមន៍​ចាប៉ី​អមតៈ ក៏​បាន​លើក​ឡើង​ដែរ​ថា «​បើ​យើង​ហាត់រៀន​យក​តាម​លំនាំ​លោក​ព្រឹទ្ធាចារ្យ ប្រាជ្ញ ឈួ​ន នោះ ប្រាកដ​ណាស់​គឺ​ការ​ប្រគំ​បទ​ភ្លេង និង​ការ​ច្រៀង​​មាន​បទ​ចំនួន​៦​បទ ដែល​ជា​បទ​គោល​នៃ​ចាប៉ី​ដូច​ការ​លើក​ឡើង​របស់​លោក​សាស្ត្រាចារ្យ យុន ធា​រ៉ា នេះ​»​។

លោក​បញ្ជាក់​ថា «​សម្រាប់​អ្នកលេង​ចាប៉ី​ដង​វែង​សម័យនេះ គឺ​មាន​ចំណង់​ចំណូលចិត្ត​ផ្សេង​ៗ​ពី​គ្នា ដោយ​អ្នកខ្លះ​លេង​យក​លំនាំ​តាម​របៀប​លោកតា ប្រាជ្ញ ឈួ​ន លោកតា គង់ ណៃ ឬ​លោកតា ពូថៅ​ដៃ ជាដើម​។​ល​។ ហើយ​ការ​លេង​តាម​លំនាំ​នេះ ក៏​អាស្រ័យ​ទៅ​លើ​ទស្សនិកជន​ដែល​គាត់​ចូល​ចិត្ត​លំនាំ​តាម​ព្រឹទ្ធាចារ្យ​ណា​ម្នាក់​ប៉ុណ្ណោះ​»​។

យ៉ាងណា​បើ​តាម​លោក ពេ​ជ សា​រ៉ាត ថា «​សម្រាប់​លោក ការ​ច្រៀង ប្រគំ​ចាប៉ី​ដង​វែង គឺ​លោក​ទទួលស្គាល់​ថា លោក​ព្រឹទ្ធាចារ្យ ប្រាជ្ញ ឈួ​ន គឺ​ពិតជា​ពីរោះ ផ្អែម​រណ្តំ ដែល​យើង​ជា​អ្នក​ហាត់រៀន​បន្តវេន​គួរ​យក​គំរូ​តាម និង​ប្រឹងប្រែង​ហាត់រៀន​ឲ្យ​ល្អ​ប្រសើរ​»៕

អត្ថបទសរសេរ ដោយ

កែសម្រួលដោយ