រាជធានីភ្នំពេញ ៖ តារាកំប្លែងចាស់វស្សា លោក អ៊ូ បុណ្ណារ៉ាត់ ហៅនាយ ក្រឹម និងសមាគមសិល្បករខ្មែរ បានចេញមុខព្រមគ្នាដោយធ្វើការបដិសេធចោលទាំងស្រុងនូវព័ត៌មានដែលបានផ្សព្វផ្សាយពីមរណភាពរបស់តារារូបនេះ…
រាជធានីភ្នំពេញ ៖ តារាកំប្លែងចាស់វស្សា លោក អ៊ូ បុណ្ណារ៉ាត់ ហៅនាយ ក្រឹម និងសមាគមសិល្បករខ្មែរ បានចេញមុខព្រមគ្នាដោយធ្វើការបដិសេធចោលទាំងស្រុងនូវព័ត៌មានដែលបានផ្សព្វផ្សាយពីមរណភាពរបស់តារារូបនេះ ។
ការចេញមុខបដិសេធខាងលើនេះ បានធ្វើឡើងបន្ទាប់ពីមានផេកមួយបានធ្វើការបង្ហោះព័ត៌មានជាសាធារណៈថា តារាកំប្លែងនាយក្រឹមបានទទួលមរណភាពហើយ ដោយសារគាំងបេះដូង ។
ព័ត៌មានខាងលើនេះ បានធ្វើអោយមហាជន ជាពិសេស អ្នកគាំទ្រតារាកំប្លែងរូបនេះសម្តែងការភ្ញាក់ផ្អើលយ៉ាងខ្លាំងនឹងនាំគ្នាចូលទៅសួរនាំដោយផ្ទាល់ទៅកាន់នាយក្រឹម ដើម្បីចង់ដឹងព័ត៌មានពិត ឬមិនពិត ។
យ៉ាងណា ក្រោយផ្ទុះរឿងមួយនេះ នាយ ក្រឹម ក៏បានចេញមកបដិសេធចោលចំពោះព័ត៌មានមួយនេះ ដ្បិតលោកកំពុងនៅមានជីវិតនៅឡើយ ។ តាមរយៈវីដេអូខ្លីដែលបានបង្ហោះលើបណ្តាញសង្គម តារាកំប្លែងនាយ ក្រឹម បាននិយាយទាំងហួសចិត្តថា មានផេកមួយបានបង្ហោះថា លោកបានស្លាប់ដោយនេះ គឺពួកជ្រុលនិយមបានប្រមាថជីវិតរបស់លោក ។ យ៉ាងណាមិនអីទេ អ្នកឯងប្រមាថសូមទទួលយកខ្លួនឯងទៅ ហើយបច្ចុប្បន្នខ្ញុំកំពុងនៅសៀមរាប នាំកូនមកដើរលេងនៅទីនេះក្នុងឱកាសបុណ្យអុំទូក ។
លោកបញ្ជាក់ថា ចំពោះព័ត៌មានមួយនេះ មានបងប្អូនយើងច្រើនបានឆាតមកផឹករបស់លោកដើម្បីសួរនាំរឿងនេះ ដូច្នេះពេលនេះ លោកសូមអោយមហាជនកុំមានការភាន់ច្រឡំដ្បិតលោកនៅមានជីវិត និងកំពុងដើរលេងកំសាន្តនៅក្នុងខេត្តសៀមរាប ។ ដោយសម្រាប់ព័ត៌មានខាងលើនេះ សមាគមសិល្បករខ្មែរក៏បានចេញមុខបដិសេធចោលទាំងស្រុងផងដែរ និងស្នើអោយមហាជនក៏ធ្វើការចែកចាយនូវព័ត៌មានមិនពិតនេះនាំអោយមានការភាន់ច្រឡំ និងធ្វើអោយប៉ះពាល់កេរ្តិ៍ឈ្មោះរបស់អ្នកសិល្បៈខ្មែរ ។
សេចក្ដីជូនដំណឹងបានលើកឡើងថា សមាគមសិល្បករខ្មែរ មានកិត្តិយសសូមជម្រាបជូនសាធារណជន និងមិត្តអ្នកគាំទ្រសិល្បៈទាំងអស់ មេត្តាជ្រាបថា តារាកំប្លែងលោក អ៊ូ ប៊ុណ្ណារ៉ាត់ (ហៅនាយ ក្រឹម) ដែលជាទីប្រឹក្សាកិត្តិយសរបស់សមាគមសិល្បករខ្មែរ កំពុងមានសុខភាពល្អប្រក្រតីមិនបានជួបគ្រោះថ្នាក់ ឬបាត់បង់ជីវិត ដូចដែលមានការផ្សាយព័ត៌មានបែបអកុសលពីសំណាក់បុគ្គលមួយចំនួនឡើយ។
សមាគមសិល្បករខ្មែរ សូមប្រកាសបដិសេធព័ត៌មានមិនពិតនោះដោយផ្ទាល់ និងសូមអំពាវនាវដល់សាធារណជនកុំជឿតាម ឬចែកចាយព័ត៌មានមិនបានផ្ទៀងផ្ទាត់ ពីព្រោះអាចបង្កការភាន់ច្រឡំ និងប៉ះពាល់ដល់កេរ្តិ៍ឈ្មោះរបស់សិល្បករយើង។ សូមសាធារណជនទាំងអស់ មានការជឿទុកចិត្តលើព័ត៌មានផ្លូវការពីសាមីខ្លួន ក្រុមគ្រួសារ និងពីសមាគមសិល្បករខ្មែរប៉ុណ្ណោះ។ សមាគមសូមអរគុណចំពោះការយកចិត្តទុកដាក់ និងការគាំទ្រដល់សិល្បករ សិល្បការិនីកម្ពុជា ៕
ចែករំលែកព័តមាននេះ