រយៈពេលប៉ុន្មានសប្ដាហ៍មកនេះ មានភ្លៀងធ្លាក់យ៉ាងខ្លាំង មិនថានៅតំបន់ណាក៏ដោយ រហូតធ្វើឱ្យប្រជាជនមានការភ័យព្រួយចំពោះអាជីវកម្មរបស់ខ្លួន។ ស្របពេលមានភ្លៀងធ្លាក់ខ្លាំងពេក ក៏បានធ្វើឱ្យមានផលប៉ះពាល់មិនស្ទើរនោះទេដល់កសិករ ជាពិសេសគឺផ្កាម្លិះត្រូវខ្វះខាត ហើយធ្វើឱ្យតម្លៃ
ប្រទេសថៃ ៖ រយៈពេលប៉ុន្មានសប្ដាហ៍មកនេះ មានភ្លៀងធ្លាក់យ៉ាងខ្លាំង មិនថានៅតំបន់ណាក៏ដោយ រហូតធ្វើឱ្យប្រជាជនមានការភ័យព្រួយចំពោះអាជីវកម្មរបស់ខ្លួន។ ស្របពេលមានភ្លៀងធ្លាក់ខ្លាំងពេក ក៏បានធ្វើឱ្យមានផលប៉ះពាល់មិនស្ទើរនោះទេដល់កសិករ ជាពិសេសគឺផ្កាម្លិះត្រូវខ្វះខាត ហើយធ្វើឱ្យតម្លៃឡើងថ្លៃច្រើនដងដូចជាខេត្តនគររាជសីមា។ ពីព្រោះថា បើកាលណាមានភ្លៀងធ្លាក់ខ្លាំង គឺធ្វើឱ្យផ្កាម្លិះវាចាប់ផ្ដើមរលួយគ្មានសល់ និងមិនរីកតែម្ដង បណ្ដាលឱ្យខូចខាតយ៉ាងច្រើន ដូច្នេះកសិករជួបទុក្ខលំបាក ព្រោះតែផ្កាម្លិះខ្វះខាត ហើយដីផុសគ្មានជីវជាតិទៀត។ ចំណែកឯចំនួននៃការបញ្ជាទិញរបស់អតិថិជន ក៏កើនឡើង ធ្វើឱ្យរុញតម្លៃឡើងច្រើនដងផងដែរ។
ក្រោយពេលបានលឺនៅដំណឹងមួយនេះភ្លាម មិនបង្អង់យូរតទៅទៀត សារព័ត៌មានដ៏ល្បីរបស់ថៃ មានឈ្មោះ «Khaosod» ក៏ដូចជាបណ្ដាសារព័ត៌មានផ្សេងទៀត បាននាំគ្នាផ្សព្វផ្សាយប្រាប់ឱ្យដឹងនៅថ្ងៃទី១២ ខែកញ្ញា ឆ្នាំ២០២៣នេះថា អ្នកយកព័ត៌មានចុះទៅពិនិត្យដល់ទីតាំងដីដាំផ្កាម្លិះរបស់កសិករនៅតំបន់នឹងផ្ទាល់តែម្ដង ដើម្បីបានឃើញនៅដីដាំផ្កាម្លិះរបស់កសិករ ស្ថិតនៅឃុំប្រាសាទ ក្នុងស្រុកណនស៊ុង ខេត្តនគររាជសីមា ប្រទេសថៃ។
ប្រភពដដែលបន្តថា ពេលចុះទៅនោះ គេបានរកឃើញថា មានកសិករភាគច្រើនរងផលប៉ះពាល់គ្រប់ៗគ្នា ដោយសារភ្លៀងធ្លាក់ស្ទើរតែជារៀងរាល់ថ្ងៃ។ ហេតុដូចនេះហើយ ជាលទ្ធផល ផ្កាម្លិះត្រូវរលួយគ្រប់ស្ទង និងខូចខាតអស់ជាច្រើនផងដែរ។
បើតាមលោក Chamlong Khamnok មានអាយុ៨០ឆ្នាំ ត្រូវជាកសិករដាំផ្កាម្លិះនៅ Ban Hua Tham Nob ឃុំ Than Prasat ស្រុក Non Sung ដោយលោកបានចេញមុខមកផ្ដល់នៅបទសម្ភាស៍ឱ្យដឹងថា «គាត់ដាំផ្កាម្លិះលើផ្ទៃដីប្រហែល១រ៉ៃ ហើយចាប់ផ្តើមប្រមូលផ្កាម្លិះ២រដូវមកហើយ ដោយលោកបានកុម្ម៉ង់ប្រមូលផ្កាម្លិះតាមការបញ្ជាទិញពីហាងផ្កា»។
លោកបន្តថា «កាលពីមុន ផ្កាម្លិះអាចប្រមូលបានចាប់ពី៩ទៅ១២គីឡូក្រាមក្នុងមួយថ្ងៃ ប៉ុន្តែបន្ទាប់ពីតំបន់នេះ មានភ្លៀងធ្លាក់ច្រើនថ្ងៃជាប់ៗគ្នាមិនឈប់រួចមក គឺផ្កាម្លិះមិនបានរីកក្នុងរយៈពេល២ទៅ៣ថ្ងៃមកហើយ។ ហើយក្នុងមួយថ្ងៃ គាត់អាចប្រមូលផលបានតែ១គីឡូក្រាមប៉ុណ្ណោះ»។
លោក Chamlong Khamnok បន្តទៀតថា «ពីមុន ពួកគាត់ធ្លាប់លក់ផ្កាម្លិះក្នុងតម្លៃ២០០បាតក្នុងមួយគីឡូក្រាម ប៉ុន្តែក្នុងអំឡុងពេលនេះ ផ្កាម្លិះខ្វះខាត ហើយមានអតិថិជនកុម្ម៉ង់កាន់តែច្រើន ជាលទ្ធផល គឺតម្លៃផ្កាម្លិះបានឡើងថ្លៃច្រើនដង។ អញ្ចឹងហើយ បានជាធ្វើឱ្យបងប្អូនកសិករទាំងអស់ កំពុងតែមានការព្រួយបារម្ភយ៉ាងខ្លាំង ក្នុងការប្រមូលផលដាំផ្កាម្លិះរបស់ខ្លួនគ្រប់ៗគ្នា។
ដោយឃើញដូចនេះ ក៏មានអ្នកនិយមប្រើប្រាស់នៅក្នុងបណ្ដាញសង្គម Internet ទាំងប្រុសទាំងស្រីនាំគ្នាបញ្ចេញមតិថា «ខ្ញុំគិតថា ឆ្នាំនេះ មានភ្លៀងធ្លាក់ច្រើនជាងឆ្នាំមុន អញ្ចឹងហើយ បើសិនជាអាចឈប់សិនទៅក៏បានដែរ កាន់តែធ្វើកាន់តែខាតទ្វេរដង ដូច្នេះហើយវិធីដែលល្អបំផុត គួរតែឈប់សិនទៅ ចាំភ្លៀងធ្លាក់តិចៗវិញ ចាំបន្តអាជីវកម្ម និងទៅមុខទៀត»។
យ៉ាងណាមិញ បើយើងនាំគ្នាក្រឡេកមកមើលឃើញថា ចំពោះក្រុមគ្រួសារខាងលើនេះ គឺគាត់នឹងលក់វាដោយខ្លួនឯងនៅផ្សារ ក្នុងក្រុងនគររាជសីមា ហើយចងជាកម្រងផ្កាម្លិះលក់។ ប៉ុន្តែរយៈពេលប៉ុន្មានសប្ដាហ៍មកនេះ មេឃបង្អុលភ្លៀងធ្លាក់មកជាបន្តបន្ទាប់ ជាហេតុធ្វើឱ្យដើមផ្កាម្លិះស្ទើរតែគ្មានផ្កា ហើយផ្នែកចេញផ្កាលូតលាស់យឺតណាស់ ថែមទាំងរលួយស្អុយខ្ទេចគ្មានសល់ទៀត ហើយវាក៏បានប្រែទៅជាពណ៌ស្វាយផងដែរ ធ្វើឱ្យកសិកររងផលប៉ះពាល់យ៉ាងខ្លាំង ខណៈតម្លៃដើមផ្កាឡើងថ្លៃនៅលើទីផ្សារ៕ ដោយ ៖ សុភា ដានេត
ចែករំលែកព័តមាននេះ