ខេត្តកំពង់ស្ពឺ ៖ ស្នូរផ្ទុះគ្រាប់រញ្ជួយដីមួយធ្វើឱ្យអ្នកភូមិនិងអ្នកដំណើរភ័យស្លន់ស្លោរត់ក្រាបរកជម្រកការពារសុវត្ថិភាពគ្រប់ៗគ្នា ដើម្បីគេចពីគ្រាប់ផ្ទុះចេញពីលំនៅឋានមន្ត្រីស៊ីម៉ាក់ដែលស្តុកគ្រាប់ចាស់ៗ ប្រមូលបានពីគ្រប់មូលដ្ឋានក្នុងខេត្ត ដើម្បីដឹកយកទៅកម្ទេចចោល ។ ហេតុការណ៍ផ្ទុះគ្រាប់នេះ បានកើតឡើងកាលពី
ខេត្តកំពង់ស្ពឺ ៖ ស្នូរផ្ទុះគ្រាប់រញ្ជួយដីមួយធ្វើឱ្យអ្នកភូមិនិងអ្នកដំណើរភ័យស្លន់ស្លោរត់ក្រាបរកជម្រកការពារសុវត្ថិភាពគ្រប់ៗគ្នា ដើម្បីគេចពីគ្រាប់ផ្ទុះចេញពីលំនៅឋានមន្ត្រីស៊ីម៉ាក់ដែលស្តុកគ្រាប់ចាស់ៗ ប្រមូលបានពីគ្រប់មូលដ្ឋានក្នុងខេត្ត ដើម្បីដឹកយកទៅកម្ទេចចោល ។ ហេតុការណ៍ផ្ទុះគ្រាប់នេះ បានកើតឡើងកាលពីវេលាម៉ោង១០និង៥នាទីព្រឹកថ្ងៃទី១៤ ឧសភា នៅក្នុងលំនៅឋានរបស់លោកយឿន សុភាព ជាមន្ត្រីស៊ីម៉ាក់ និងបណ្តាលឱ្យស្លាប់មនុស្ស៣នាក់ សុទ្ធតែជាមន្ត្រីស៊ីម៉ាក់ផ្នែកបច្ចេកទេសកម្ទេចគ្រាប់ ។
លោកឧត្តមសេនីយ៍ត្រីម៉ែន ស៊ីប៊ន មេបញ្ជាការកងរាជអាវុធហត្ថខេត្ត ដែលដឹកនាំកម្លាំងចម្រុះទៅធ្វើការត្រួតពិនិត្យនៅព្រឹកនោះបានឱ្យដឹងថា ស្នូរគ្រាប់ផ្ទុះចេញពីផ្ទះរបស់លោកយឿន សុភាព ស្ថិតក្នុងភូមិមុខខេត្ត សង្កាត់រកាធំ ក្រុងច្បារមន ចម្ងាយប្រមាណ១០០ម៉ែត្រ ពីសាលាបឋមសិក្សាតាំងទន្លេ ក្នុងសង្កាត់សុពណ៌ទេព ក្រុងច្បារមន ។ នៅវេលាម៉ោង១០និង៥នាទីព្រឹកថ្ងៃនោះ គ្រាប់ធំតូចបានផ្ទុះបង្កភាពភ័យខ្លាចដល់ប្រជាពលរដ្ឋក្នុងភូមិក៏ដូចជាអ្នកធ្វើដំណើរតាមដងផ្លូវចូលទៅរមណីយដ្ឋានអំពែភ្នំ នាំគ្នាក្រាប និងរកកន្លែងការពារខ្លួនគ្រប់ៗគ្នា ដោយសារការផ្ទុះគ្រាប់នោះគឺបន្តបន្ទាប់គ្នាមិនដាច់ និងបណ្តាលឱ្យឆេះរោងស្តុកគ្រាប់យ៉ាងសន្ធោសន្ធៅ ។ ក្បាលអំបែងគ្រាប់ខ្លះបានហោះទៅធ្លាក់ឆ្ងាយៗពីកន្លែងកើតហេតុប្រមាណ៣០០ទៅ៤០០ម៉ែត្រ តែពុំបណ្តាលឱ្យមានមនុស្សរងគ្រោះថ្នាក់ទេ ។ ក្រោយពីស្ងប់ស្នូរគ្រាប់ផ្ទុះទើបរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តទៅដល់ហើយបាញ់ទឹកពន្លត់ភ្លើងដែលកំពុងឆេះនោះឱ្យរលត់បន្តិចម្តងៗរួចកម្លាំងសមត្ថកិច្ចចម្រុះក៏ចូលត្រួតពិនិត្យកន្លែងកើតហេតុ ។
តាមសេចក្តីរាយការណ៍បន្ទាន់នៅទីនោះ ត្រូវសមត្ថកិច្ចឱ្យដឹងថា គ្រាប់ចំនួនពី៦០ទៅ៧០គ្រាប់ ដែលក្រុមស៊ីម៉ាក់រៀបចំទុកត្រៀមដឹកចេញយកទៅកម្ទេចចោលបានផ្ទុះខណៈមន្ត្រីស៊ីម៉ាក់ទាំង៣នាក់មាន១-ឈ្មោះយឿន សុភាព អាយុ៤៧ឆ្នាំ ជាម្ចាស់ផ្ទះកើតហេតុ ២-ឈ្មោះសុខ ហ៊ីន អាយុ៤៦ឆ្នាំ និង៣-ឈ្មោះហឿន គឹមសៀ អាយុ៤៤ឆ្នាំ កំពុងតម្រៀបគ្រាប់ទុកក្នុងរណ្តៅបណ្តោះអាសន្ននៅរោងខាងក្រោយផ្ទះ ដែលមានជីកដីជម្រៅប្រមាណ១ម៉ែត្រ ។ តាមការសន្និដ្ឋានថា ការផ្ទុះនេះអាចបណ្តាលមកពីធ្វើឱ្យមានការប៉ះទង្គិចក្បាលគ្រាប់ ហើយនៅក្នុងហេតុការណ៍ដ៏កម្រនេះធ្វើឱ្យមន្ត្រីបច្ចេកទេសស៊ីម៉ាក់ម្នាក់ឆេះស្លាប់នៅកន្លែងកើតហេតុ និង២នាក់ទៀតនាំទៅមន្ទីរពេទ្យបង្អែកខេត្តកំពង់ស្ពឺ ដើម្បីសង្គ្រោះបន្ទាន់ ប៉ុន្តែក៏ស្លាប់ដែរ ។
មន្ត្រីសមត្ថកិច្ចបានធ្វើការសាកសួរភរិយាអ្នកស្លាប់នៅកន្លែងកើតហេតុនិងត្រូវបានឱ្យដឹងថា ខណៈគាត់កំពុងចម្អិនម្ហូបអាហារនៅផ្ទះបាយ ដែលមានចម្ងាយពីកន្លែងផ្ទុះគ្រាប់នោះប្រមាណ៥០ម៉ែត្រ ស្រាប់តែឮស្នូរផ្ទុះកក្រើកដីរង្គើផ្ទះ ពេលនោះគាត់ក៏ក្រាបហើយនឹកទៅដល់ប្តីគាត់ដែលមុននេះកំពុងតម្រៀបគ្រាប់ទុកដាក់ឱ្យល្អរង់ចាំដឹកទៅកម្ទេចចោល ។ ការផ្ទុះនេះក៏បង្កឱ្យមានជាអណ្តាតភ្លើងឆាបឆេះសន្ធោសន្ធៅឡើងដែរ ។ លុះពេលស្ងាត់ស្នូរផ្ទុះទើបរថយន្តពន្លត់អគ្គីភ័យមកដល់ធ្វើការបាញ់ទឹកពន្លត់ ចំណែកគាត់បានចេញពីផ្ទះបាយរត់ទៅកន្លែងកើតហេតុទើបដឹងថា ប្តីរបស់គាត់ស្លាប់ និងពីរនាក់ទៀតរបួសធ្ងន់បានដឹកទៅសង្គ្រោះបន្ទាន់ក្រោយមកក៏ស្លាប់ដែរ ។
មន្ត្រីបច្ចេកទេសកងរាជអាវុធហត្ថ និងនគរបាលខេត្តបានប្រាប់ថា គ្រាប់ដែលផ្ទុះនេះគឺជាប្រភេទ DK 87 មានចំនួន៧២គ្រាប់ ហើយបើតាមការផ្តល់ព័ត៌មានពីក្រុមស៊ីម៉ាក់គឺបានយកទៅរក្សាទុកនៅទីនេះនៅថ្ងៃទី១៣ ឧសភា ដោយយកមកពីបន្ទាយ ACO ។ ក្រោយពីការត្រួតពិនិត្យល្អិតល្អន់ពីសមត្ថកិច្ចចម្រុះដែលមានមន្ត្រីស៊ីម៉ាក់ផងដែរនោះ ក៏បានប្រគល់សពទាំង៣នាក់ឱ្យក្រុមគ្រួសារធ្វើបុណ្យតាមប្រពៃណី និងមានការឧបត្ថម្ភផ្ទាល់ពីនាយកបច្ចេកទេសនិងប្រធានស៊ីម៉ាក់ខេត្តកំពង់ស្ពឺ ដើម្បីចូលរួមមរណទុក្ខដ៏ក្រៀមក្រំនេះ ។
លោកឧត្តមសេនីយ៍ត្រីម៉ែន ស៊ីប៊ន បានមានប្រសាសន៍ថា ក្បាលគ្រាប់មួយចំនួនដែលពុំទាន់ផ្ទុះបានខ្ទាតចេញពីរណ្តៅនោះនៅរាយប៉ាយពេញដី ដែលទាមទារឱ្យមានការប្រមូលពីអ្នកបច្ចេកទេស និងហាមមិនឱ្យមានមនុស្សចេញចូលមកក្នុងកន្លែងកើតហេតុទេ លុះត្រាតែមានការប្រមូលក្បាលគ្រាប់ទាំងនេះឱ្យអស់សិន ៕
ចែករំលែកព័តមាននេះ