ខេត្តកំពង់ចាម ៖ ផ្ទះបើកល្បែងបៀ និងអាប៉ោងដុះស្លែមួយ ស្ថិតនៅខាងក្រោយផ្សារអូររាំងឪ ក្នុងភូមិលេខ៤ខាងកើត ឃុំអំពិលតាពក ស្រុកអូររាំងឪ ត្រូវសមត្ថកិច្ចព្រហ្មទណ្ឌកម្រិតស្រាលខេត្តចុះបង្រ្កាប កាលពីវេលាម៉ោង១២ថ្ងៃត្រង់ទី១៣ ឧសភា ២០១១ ក្រោមការចូលរួមពីលោករៀល សុភិន ព្រះរាជអាជ្ញារងអមសាលាដំបូងខេត្ត
ខេត្តកំពង់ចាម ៖ ផ្ទះបើកល្បែងបៀ និងអាប៉ោងដុះស្លែមួយ ស្ថិតនៅខាងក្រោយផ្សារអូររាំងឪ ក្នុងភូមិលេខ៤ខាងកើត ឃុំអំពិលតាពក ស្រុកអូររាំងឪ ត្រូវសមត្ថកិច្ចព្រហ្មទណ្ឌកម្រិតស្រាលខេត្តចុះបង្រ្កាប កាលពីវេលាម៉ោង១២ថ្ងៃត្រង់ទី១៣ ឧសភា ២០១១ ក្រោមការចូលរួមពីលោករៀល សុភិន ព្រះរាជអាជ្ញារងអមសាលាដំបូងខេត្ត។ ការបង្ក្រាបនេះសមត្ថកិច្ចបានឃាត់ក្រុមអ្នកញៀនល្បែង និងម្ចាស់ផ្ទះសរុបចំនួន៦នាក់ និងជាង១០នាក់ទៀតនាំគ្នារត់ចេញតាមខាងក្រោយផ្ទះចោលម៉ូតូចំនួន៣គ្រឿង ។
លោកវរសេនីយ៍ត្រីចាន់ ហោ អនុប្រធានការិយាល័យកណ្តាលយុត្តិធម៌ខេត្តបានប្រាប់ឱ្យដឹងថា ដោយទទួលបានព័ត៌មានពីប្រជាពលរដ្ឋនៅមូលដ្ឋានថា ផ្ទះមួយបើកលេងល្បែងស៊ីសង (បៀប្រភេទអុងឌូ និងអាប៉ោង) ដែលមានទីតាំងនៅត្រង់ខាងក្រោយផ្សារអូររាំងឪ ជារៀងរាល់ថ្ងៃដូចជាមិនខ្លាចរអែងសមត្ថកិច្ចទាល់តែសោះនោះ ទើបលោកចាត់មន្រ្តីក្រោមឱវាទឱ្យទៅពិនិត្យមើល ក៏បានឃើញពិតមែន ។ តាមរយៈលោកលោកវរសេនីយ៏ឯកជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌ ក៏បានសុំគោលការណ៍ពីលោកឧត្តមសេនីយ៍ត្រីនួន សាមិន ស្នងការនគរបាលខេត្ត ដើម្បីមានវិធានការចុះបង្រ្កាបជាបន្ទាន់ ។
នៅថ្ងៃទី១៣ ឧសភា ប្រតិបត្តិការបង្ក្រាបផ្ទះល្បែងនេះមានការចូលរួមពីលោកព្រះរាជអាជ្ញារងអមសាលាដំបូងខេត្ត ហើយបានឃាត់មនុស្សចំនួន៦នាក់រួមមាន ១-ឈ្មោះ ថេន ប៊ុនធឿន ភេទប្រុស អាយុ២៤ឆ្នាំ រស់នៅភូមិជើងវត្ត ឃុំគងជ័យ ស្រុកអូររាំងឪ ២-ឈ្មោះថេង រតនា ភេទប្រុសអាយុ២៤ឆ្នាំ រស់នៅភូមិលេខ៤កើត ឃុំអំពិលតាពក ស្រុកអូររាំងឪ ៣-ឈ្មោះហាក់ គឹមស្រ៊ន់ ភេទប្រុស អាយុ២៨ឆ្នាំ រស់នៅភូមិលេខ៣ ឃុំអំពិលតាពក ៤-ឈ្មោះគឹម ឈន ភេទប្រុសអាយុ២៦ឆ្នាំ រស់នៅភូមិលេខ៥ ឃុំអំពិលតាពក ៥-ឈ្មោះអេង សារុន ភេទប្រុស អាយុ៥០ឆ្នាំ រស់នៅភូមិលេខ៤កើត ឃុំអំពិលតាពក និង៦-ឈ្មោះធូ អូន ភេទស្រី អាយុ៤៩ឆ្នាំ ជាម្ចាស់ផ្ទះ ។ សមត្ថកិច្ចដកហូតបានបៀ១ហ៊ូ កន្សែងក្រាលលេងបៀ១ ហាន់តោអាប៉ោង១ ចានបាញ់អាប៉ោង១ ផ្តិលគ្របអាប៉ោង១ ព្រមទាំងម៉ូតូចំនួន៣គ្រឿង ។
លោកវរសេនីយ៍ត្រីចាន់ ហោ បញ្ជាក់ថា ក្រុមអ្នកញៀនល្បែងតែងនាំគ្នាទៅលេងស្ទើរតែរាល់ថ្ងៃ ក្នុងនោះក៏មានអាណាព្យាបាលខ្លះទូរស័ព្ទមកកាន់រូបលោកឱ្យមានវិធានការ
បង្រ្កាបជាបន្ទាន់ ។ លោករៀល សុភិន ព្រះរាជអាជ្ញារងអមសាលាដំបូងខេត្តប្រាប់តាមទូរស័ព្ទឱ្យដឹងដែរថា ក្នុងចំណោមអ្នកលេងល្បែងទាំង៦នាក់មាន២នាក់ជាម្ចាស់ផ្ទះ (ឈ្មោះធូ អូន និងអេង សារុន) ត្រូវបានឃុំខ្លួននៅពន្ធនាគារខេត្តជាបណ្តោះអាសន្នរង់ចាំការស៊ើបអង្កេត ។ ដោយឡែកក្រុមអ្នកលេង៤នាក់ទៀតត្រូវបានកាត់ឱ្យជាប់ទោសក្នុងម្នាក់ៗរយៈពេល១៥ថ្ងៃ និងពិន័យជាប្រាក់ក្នុងម្នាក់ៗចំនួន១ម៉ឺនរៀល តែទោសនេះត្រូវបានព្យួរសាកល្បង ហើយអនុញ្ញាតឱ្យត្រឡប់ទៅផ្ទះវិញ ៕
ចែករំលែកព័តមាននេះ