បើទោះបីជាសត្វកណ្ដុរ គឺជាសត្វចង្រៃ ហើយអ្នកខ្លះមិនចូលចិត្តវា ថាជាសត្វគួរឱ្យខ្ពើមយ៉ាងណាក្តី ក៏ប៉ុន្តែសត្វកណ្ដុរ នៅតែជាចំណីអាហារយ៉ាងឆ្ងាញ់សម្រាប់ប្រជាពលរដ្ឋដែលជាអ្នកមានចំណូលចិត្តទទួលទានវាផងដែរ។ ដោយហេតុនេះ ធ្វើឱ្យមានទីផ្សារសាច់សត្វកណ្តុរ ក៏ដូចជា
ខេត្តកំពង់ឆ្នាំង ៖ បើទោះបីជាសត្វកណ្ដុរ គឺជាសត្វចង្រៃ ហើយអ្នកខ្លះមិនចូលចិត្តវា ថាជាសត្វគួរឱ្យខ្ពើមយ៉ាងណាក្តី ក៏ប៉ុន្តែសត្វកណ្ដុរ នៅតែជាចំណីអាហារយ៉ាងឆ្ងាញ់សម្រាប់ប្រជាពលរដ្ឋដែលជាអ្នកមានចំណូលចិត្តទទួលទានវាផងដែរ។ ដោយហេតុនេះ ធ្វើឱ្យមានទីផ្សារសាច់សត្វកណ្តុរ ក៏ដូចជាបង្កើនមុខរបរដល់អ្នកចម្ការ នៅក្នុងរដូវទឹកឡើង ដោយបានដាក់អង្គប់ និងប្រមាញ់សត្វកណ្ដុរតាមដើមឈើ ដើម្បីយកមកលក់ជារៀងរាល់ថ្ងៃ។
ជារៀងរាល់ព្រឹកព្រលឹម នាមាត់ទន្លេផ្សារក្រោម ម្ដុំដើមពោធិ៍ ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ហាក់បានក្លាយទៅជាទីផ្សារប្រមូលផ្ដុំទិញលក់សាច់សត្វកណ្តុរទៅហើយ នៅក្នុងរដូវទឹកឡើងរៀងរាល់ឆ្នាំ ក្រៅពីត្រី និងបន្លែ។ ហើយប្រជាពលរដ្ឋអ្នកស្រែចម្ការ បានចាប់សត្វកណ្ដុរ រួចពន្លាត់ស្បែកយ៉ាងស្អាត រួចយកមកលក់ឱ្យឈ្មួញចាំទទួលទិញដុំនៅទីនោះ។
បើតាមលោក នៅ ស្រៀង ដែលជាប្រជាពលរដ្ឋរស់នៅភូមិពាមឆ្កោក ឃុំពាមឆ្កោក ស្រុកជលគីរី ខណៈកំពុងតែចាប់សាច់សត្វកណ្តុររំលែកដាក់ថង់នៅលើកាណូតបាឡាស្មាច់ បានប្រាប់ឱ្យដឹងថា់ «ថ្ងៃនេះ គាត់ដាក់អង្គប់ និងឆ្លុះចាប់សត្វកណ្តុរបានជាង២០គីឡូក្រាម ក្នុង១យប់ លុះព្រឹកឡើង កា.ត់ក្បាល ពន្លាត់ស្បែកឱ្យស្អាត ទើបដឹកយកមកលក់នៅទីនេះ»។
លោក នៅ ស្រៀង បន្តថា «ការចាប់សត្វកណ្តុលនេះ មិនមែនមានតែគាត់ម្នាក់ឯងនោះទេ គឺមានច្រើនគ្នាណាស់។ ហើយអ្នកចម្ការនៅតាមដងទន្លេ សុទ្ធតែឆ្លៀតពេលចាប់សត្វកណ្តុរនេះ យកមកលក់ទាំងអស់គ្នា ព្រោះរដូវទឹកឡើង ចម្ការលិចទឹកអស់ មិនដឹងរកអី គឺមានតែចាប់កណ្តុរនេះ។ ការចាប់កណ្តុរ គឺប្រើវិធីដាក់អង្គប់ ដោយម្នាក់ៗមានចាប់ពី៣០០ ទៅ៤០០ អង្គប់ ហើយពេលដាក់អង្គប់នៅពេលយប់នោះ អ្នកខ្លះក៏ឆ្លៀតឆ្លុះចាប់តាមដើមឈើលិចទឹកដែលជាកន្លែងសម្ងំលាក់ខ្លួនរបស់សត្វកណ្តុរផងដែរ។ ដោយក្នុង១យប់ អ្នកចាប់សត្វកណ្តុរ អាចរកបានពី២០ទៅ៣០គីឡូក្រាម លុះពេលយកមកលក់ គឺបាន៥ទៅ៦ពាន់រៀលក្នុង១គីឡូក្រាម តម្លៃបោះដុំ តែបើលក់រាយវិញ ថ្លៃជាង កឺចាប់ពី៨ពាន់ទៅ១ម៉ឺនរៀលក្នុង១គីឡូក្រាម។ ចំពោះ ម៉ូយដែលទិញពីអ្នកចម្ការ បានទៅលក់នៅផ្សារឆ្នាំង ផ្សារលើ និងតាមផ្សារមួយចំនួនទៀត នៅក្នុងខេត្តកំពង់ឆ្នាំង»។
គួរបញ្ជាក់ផងដែរថា សត្វកណ្ដុរ ដែលរស់នៅលើខ្នងកោះ វាគឺជាសត្វចង្រៃ តែងតែស៊ីដំណាំចម្ការរបស់បងប្អូនប្រជាពលរដ្ឋ ដូចជា ៖ ដំណាំស្រូវប្រាំង, ដំណាំពោត, ល្ង, សណ្តែក និងដំណាំធុញជាតិផ្សេងទៀត ដែលធ្វើឱ្យកសិករអ្នកចាំចម្ការជួបការលំបាក ក្នុងការការពារពីសត្វចង្រៃមួយនេះ ។ ប៉ុន្តែនៅពេលដែលខែទឹកឡើងអស់ទីជម្រក សត្វទាំងនោះត្រូវបានគេចាប់ធ្វើជាចំណី ហាក់បានបង្កើនមុខរបរដល់អ្នកចម្ការ ដោយចាប់យកមកលក់ជារៀងរាល់ថ្ងៃផងដែរ ៕
ចែករំលែកព័តមាននេះ