កាលពីថ្ងៃទី៥ កុម្ភៈ កន្លងមក ប្រជាជននៅក្នុងស្រុកសយដាវ ខេត្ដច័ន្ទបុរី ជាច្រើននាក់បានធ្វើដំណើរឆ្ពោះទៅចន្លោះគីឡូម៉ែត្រ លេខ៦១-៦២ តាមបណ្ដោយផ្លូវរវាងខេត្ដ ច័ន្ទបុរី-ស្រះកែវ ស្ថិតក្នុងឃុំសាយខាវ ស្រុក សយដាវ ប្រទេសថៃ ។ ក្នុងការធ្វើដំណើររបស់ប្រជាជនខាងលើមានអ្នកខ្លះយកផ្កា ធូប ទៀន រួមទាំងផ្លែឈើ និងទឹកក្រូចទៅក្រាបសំពះថ្វាយចំពោះខ្មោចពស់ថ្លាន់មានប្រវែងជិត៣ម៉ែត្រដែលងាប់ដោយដងខ្លួនព័ទ្ធជុំវិញដំបូកសំរាប់ជាការផ្សងសុំលាភសំណាង ។
កាសែតក្នុងស្រុកមួយរបស់ថៃបានឱ្យដឹងថា អ្នកស្រុកភាគច្រើននិយាយថា ការងាប់របស់ពស់នេះហាក់ដូចជាចំលែក ព្រោះខ្លួនវាព័ទ្ធជុំវិញដំបូក ឯអ្នកស្រុកខ្លះនិយាយថា ដំបូកខាងលើជាទីជំរករបស់ពស់ និងអ្នកខ្លះទៀតនិយាយថា ធ្លាប់ឃើញពស់ប្រភេទនេះនៅឯដំបូកខាងលើជាច្រើនលើក។ លោក សំរិទ្ធ ពុធស្រ៉ី ជាអ្នកលក់ដូរនៅផ្សារណាត់ និងជាអ្នកស្រុករស់នៅក្នុងឃុំសាយខាវ ស្រុកសយដាវបាននិយាយថា បុគ្គលិកការងារ៣នាក់នៅផ្ទះរបស់គាត់ធ្លាប់ជួបពស់នេះនៅមុនពេលវាងាប់ ខណៈដែលវាវារនៅលើដងផ្លូវ ។
លោកសំរិទ្ធ ពុធស្រ៉ី បានបន្ដថា កន្លងមកមុនពេលដែលពស់ងាប់ធ្លាប់កើតរឿងចំលែកៗជាច្រើនទៅលើបុគ្គលិកដែលគាត់ (សំរិទ្ធ ពុធស្រ៉ី) បញ្ជាឱ្យយកត្រាក់ទ័រទៅឈូសឆាយព្រៃឈើដើម្បីឱ្យមើលឃើញផ្សារណាត់នៅក្បែរព្រៃ និងធ្វើឱ្យត្រាក់ទ័របើកបរកិនទុយោទឹកក្នុងព្រៃបែក ។ ក្រៅពីនេះ ក៏មានរឿងរ៉ាវចំលែកៗកើតឡើងជាច្រើនលើក ដូចជាធ្វើឱ្យត្រាក់ទ័របែកកង់ រលត់ម៉ាស៊ីនដោយមិនដឹងមូលហេតុ ហើយជាចុងក្រោយ ខណៈឱ្យបុគ្គលិកយកកាំបិតទៅកាប់ឆ្ការព្រៃក៏ជួបនឹងខ្មោចពស់ខាងលើ ។
ចំណែកលោកយាយប៊ុនជុង ថងឡាង អាយុ៨៦ឆ្នាំ អ្នកស្រុកនៅភូមិប៉ាទុងឡាង ឃុំ សាយខាវ ខេត្ដច័ន្ទបុរី បានរៀបរាប់ក្រោយពីឃើញខ្មោចពស់ថា ការដែលពស់ងាប់ហើយរុំព័ទ្ធដងខ្លួននៅជុំវិញដំបូក គឺជារឿងចំលែក។ អ្នកបុរាណចាត់ទុកថា ជាប្រផ្នូលបញ្ជាក់ពីហេតុអាចកើតមានបញ្ហាអាកាសធាតុ ឬជាប្រផ្នូលបញ្ជាក់ថា ក្នុងតំបន់នេះអាកាសធាតុនឹងប្រែប្រួល ៕
ចែករំលែកព័តមាននេះ