ខេត្តព្រះសីហនុ ៖ ផ្ទះមួយខ្នងថ្មក្រោមឈើលើដែលស្ថិតនៅក្នុងក្រុមទី៣ ភូមិ៥ សង្កាត់លេខ៤ ក្រុងព្រះសីហនុ បានត្រូវអគ្គិភ័យលេបត្របាក់កាលពីព្រឹកថ្ងៃទី១៤ ឧសភា វេលាម៉ោង១០ ។ លោកឡុង ប៊ុនហាក់ អាយុ៤៨ឆ្នាំ ជាអ្នកចែកចាយស្រាបៀរអង្គរ ស្នាក់នៅក្បែរកន្លែងកើតហេតុបានឱ្យដឹងថា ផ្ទះដែលត្រូវភ្លើងឆេះនេះជាកម្មសិទ្ធិរបស់គាត់
ខេត្តព្រះសីហនុ ៖ ផ្ទះមួយខ្នងថ្មក្រោមឈើលើដែលស្ថិតនៅក្នុងក្រុមទី៣ ភូមិ៥ សង្កាត់លេខ៤ ក្រុងព្រះសីហនុ បានត្រូវអគ្គិភ័យលេបត្របាក់កាលពីព្រឹកថ្ងៃទី១៤ ឧសភា វេលាម៉ោង១០ ។ លោកឡុង ប៊ុនហាក់ អាយុ៤៨ឆ្នាំ ជាអ្នកចែកចាយស្រាបៀរអង្គរ ស្នាក់នៅក្បែរកន្លែងកើតហេតុបានឱ្យដឹងថា ផ្ទះដែលត្រូវភ្លើងឆេះនេះជាកម្មសិទ្ធិរបស់គាត់ តែគាត់បានជួលឱ្យជនបរទេសឈ្មោះ Thomas GnoGuet ជនជាតិបារាំង ស្នាក់នៅអស់រយៈពេល៣ឆ្នាំមកហើយ ។
យោងតាមជនបរទេសដែលស្នាក់នៅជាមួយលោក Thomas បានឱ្យដឹងថា សំភារដែលត្រូវភ្លើងឆេះមានដូចជាលិខិតឆ្លងដែន ទិដ្ឋាការប័ណ្ណឥណទាន ម៉ូតូ២គ្រឿងម៉ាកYAMAHA AX 250 ពណ៌ស១គ្រឿង និងម៉ាក HONDA C100 ពណ៌ក្រហម១គ្រឿង លុយ២០០ដុល្លារ និងសំភារប្រើប្រាស់មួយចំនួនទៀត ។
តាមសម្តីនារីឈ្មោះស៊ុម ដានី អាយុ២៣ឆ្នាំ ដែលត្រូវជាមិត្តស្រីរបស់ជនបរទេសឈ្មោះ MAE ERUS បានឱ្យដឹងថា នាងពុំដឹងពីមូលហេតុដែលបណ្តាលឱ្យកើតមានគ្រោះអគ្គិភ័យនេះទេ ។ ពេលកើតហេតុខាងលើរូបនាងកំពុងសម្រាកក្នុងបន្ទប់ជាន់លើជាមួយមិត្តប្រុស ហើយរូបនាងហាក់បីដូចជាថប់ដង្ដើមក៏ចេញមកក្រៅបន្ទប់ក្នុងគោលបំណងយកខ្យល់អាកាស ។ គ្រាន់តែឈានជើងចេញពីបន្ទប់បានមួយជំហានក៏បានឃើញអណ្តាតភ្លើងឆេះវាំងននមុខបន្ទប់រួចទៅហើយ ធ្វើឱ្យនាងតក់ស្លុតយ៉ាងខ្លាំងក៏ស្រែកហៅអ្នកនៅក្នុងផ្ទះកើតហេតុនេះដែលមានជនបរទេស៣នាក់និងស្រី្តខ្មែរ២នាក់ជួយ ធ្វើឱ្យពួកគេភ័យស្លន់ស្លោក៏នាំគ្នាស្ទុះរត់ចេញក្រៅផ្ទះ ដោយមិនមានសម្លៀកបំពាក់ត្រឹមត្រូវទេ ។
អណ្តាតភ្លើងត្រូវបានពន្លត់ឱ្យរលត់ជាស្ថាពរនៅម៉ោង១០និង៤៥នាទីព្រឹកថ្ងៃដដែល ដោយមានបញ្ជានិងដឹកនាំផ្ទាល់ពីលោកអ៊ី ថា អនុប្រធានការិយាល័យអគ្គិភ័យនិងលោកស្ប៉ោង ឈោក ប្រធានការិយាល័យអគ្គិភ័យនៃស្នងការដ្ឋាននគរបាលខេត្តព្រះសីហនុ។ លោកស្ប៉ោង ឈោក បានឱ្យដឹងថា យោងតាមការសន្និដ្ឋានជំហានដំបូង គ្រោះអគ្គិភ័យនេះកើតឡើងបណ្តាលមកពីភ្លើងធូបមូសដែលដុតចោលមុខបន្ទប់ ហើយធ្លាក់ភ្លើងលើពូកក៏ឆេះរាលដល់វាំងនន និងផ្ទះទាំងមូលតែម្តង ប៉ុន្តែសំណាងល្អពុំបង្កឱ្យឆេះរាលដាលដល់ផ្ទះអ្នកដទៃទេ ដោយសារកម្លាំងជំនាញរបស់លោកជួយទាន់ពេលវេលា ៕
ចែករំលែកព័តមាននេះ