ខេត្តបាត់ដំបង ៖ ទីតាំងទទូលទិញ លក់ និងទទូលបញ្ចាំ ឬបង់រំសល់ ទ្រព្យសម្បត្តិយ៉ាងតិចចំនួន០៦កន្លែងក្នុងចំណោមរាប់សិបកន្លែងនៅក្នុងក្រុងបាត់ដំបង ត្រូវបានចុះត្រូតពិនិត្យឆែកឆេរសួររកអាជ្ញាប័ណ្ណពាក់ព័ន្ធនឹងផ្លូវច្បាប់ដោយកម្លាំងចម្រុះរបស់គណៈបញ្ជាការកងឯកភាព ក្រុង និងខេត្ត…
ខេត្តបាត់ដំបង ៖ ទីតាំងទទូលទិញ លក់ និងទទូលបញ្ចាំ ឬបង់រំសល់ ទ្រព្យសម្បត្តិយ៉ាងតិចចំនួន០៦កន្លែងក្នុងចំណោមរាប់សិបកន្លែងនៅក្នុងក្រុងបាត់ដំបង ត្រូវបានចុះត្រូតពិនិត្យឆែកឆេរសួររកអាជ្ញាប័ណ្ណពាក់ព័ន្ធនឹងផ្លូវច្បាប់ដោយកម្លាំងចម្រុះរបស់គណៈបញ្ជាការកងឯកភាព ក្រុង និងខេត្ត កាលពីរសៀលថ្ងៃទី០៧ កញ្ញា តែក្នុងចំណោម០៦កន្លែងនេះ មានតែ០១កន្លែងប៉ុណ្ណោះ ដែលគេរកឃើញមានច្បាប់អនុញ្ញាត ខណៈទីតាំងទទូលទិញ លក់ និងបញ្ចាំដូចគ្នានេះរាប់សិបកន្លែងទៀត ត្រូវគេផ្ដល់សញ្ញាឲ្យបិទទ្វារមុនពេលកម្លាំងចម្រុះចុះត្រូតពិនិត្យ ។
របាយការណ៍សមត្ថកិច្ចបានឲ្យដឹងថា កិច្ចប្រតិបត្តិការណ៍របស់កម្លាំងចម្រុះនៃគណៈបញ្ជាការកងឯកភាព ក្រុង និង ខេត្ត ចុះត្រួតពិនិត្យទីតាំង ទទូលទិញ លក់ និងទទូលបញ្ចាំ ឬ បង់រំលស់ ទ្រព្យសម្បត្តិខាងលើនេះ ដឹកនាំដោយលោក ធូ ភា អភិបាលរងខេត្ត និងលោក ទុត វិនីត ព្រះរាជអាជ្ញារង អមសាលាដំបូងខេត្ត ។ គោលដៅដែលកម្លាំងចម្រុះខាងលើ ត្រូវចុះត្រូតពិនិត្យ និងឆែកឆេរសួរនាំជាលើកដំបូងនេះ គឺកន្លែងទទូលទិញ លក់ និងទទូលបញ្ចាំ ឬបង់រំលស់នៅក្នុងក្រុងបាត់ដំបង មុនពេលរៀបផែនការចុះទៅត្រូតពិនិត្យនៅតាមបណ្ដាស្រុកដទៃទៀត ។
នេះបើតាមលោក ធូ ភា អភិបាលរងខេត្តបានថ្លែងប្រាប់កោះសន្តិភាព នៅព្រឹកថ្ងៃទី០៨ កញ្ញា តាមទូរស័ព្ទ ។ លោកធូ ភា បានថ្លែងថា ការចុះត្រួតពិនិត្យ និងសួរនាំដល់ទីតាំងទទូលទិញ លក់ និង
ទទូលបញ្ចាំ បង់រំលស់ កាលពីរសៀលថ្ងៃទី០៧ កញ្ញា គឺក្រុមការងារធ្វើបានតែត្រឹម០៦កន្លែងប៉ុណ្ណោះ តែក្នុងចំណោម០៦កន្លែងនេះ យើងរកឃើញតែ០១កន្លែងប៉ុណ្ណោះ ដែលមានលិខិត្រអនុញ្ញាត ។ រីឯចំនួន០៥កន្លែងទៀតគ្មានច្បាប់ទេ តែកន្លែងខ្លះកំពុងដាក់ពាក្យស្នើសុំទៅមន្ទីរសេដ្ឋកិច្ចនិងហិរញ្ញវត្ថុខេត្ត។
ពាក់ព័ន្ធនឹងកិច្ចប្រតិបត្តិការនេះដែរ បើតាមលោកធូ ភា អភិបាលរងខេត្ត ដែលដឹកនាំធ្វើកិច្ចការនេះបានបញ្ជាក់ប្រាប់កោះសន្តិភាពថា ក្នុងចំណោម០៦ទីតាំងនេះ មាន០១ទីតាំងដែលមានយីហោ «សុខបាន» ស្ថិតនៅភូមិដំណាក់ហ្លូង សង្កាត់វត្តគរ ពុំទាន់មានច្បាប់អនុញាតទេ តែម្ចាស់ទីតាំងនេះ បានទទូលបញ្ចាំគ្រឿងចក្រនិងរថយន្ត ។ នៅពេលយើងត្រួតពិនិត្យឃើញថា អ្នកទទូលបញ្ចាំនិងម្ចាស់ទ្រព្យ សុទ្ធតែមានឯកសារបញ្ជាក់ត្រឹមត្រូវ តែយើងបានណែនាំឲ្យម្ចាស់ទីតាំង ត្រូវដាក់ពាក្យស្នើសុំច្បាប់ធ្វើអាជីវកម្មឲ្យបានត្រឹមត្រូវ ។
ដោយឡែក ចំនួន០១ទីតាំងទៀត ស្ថិតនៅភូមិទំនប់ សង្កាត់ក្ដុលដូវទាវ ដែលទីតាំងនេះមានទទូលទិញ លក់ និងទទូលបញ្ចាំទ្រព្យដែរ គឺគ្មានច្បាប់ គ្មានយីហោទេ ហើយត្រូវបានមន្ត្រីជំនាញ ឆែកឆេររកឃើញមានម៉ូតូចំនួន០៧គ្រឿង សង្ស័យទទូលទិញ ឬ ទទូលបញ្ចាំដោយមិនស្របច្បាប់ ហើយត្រូវបានដកហូតជាបណ្ដោះអាសន្ន ដើម្បីទុកឲ្យសមត្ថកិច្ចជំនាញ ត្រូតពិនិត្យ និងសួរនាំ ធ្វើការស្រាវជ្រាវតាមនីតិវិធី ។
រីឯប៉ុន្មានទីតាំងទៀត ដែលគ្មានច្បាប់អនុញ្ញាតដែរនោះ ពុំទាន់មានពាក់ព័ន្ធនឹងបទល្មើសអ្វីជាក់ស្ដែងទេ តែតម្រូវឲ្យម្ចាស់ទីតាំងត្រូវធ្វើពាក្យស្នើសុំច្បាប់ដូចគ្នា។ ពាក់ព័ន្ធនឹងហាងទទូលទិញ លក់ និង បញ្ចាំនេះ បើតាមប្រភពពីសមត្ថកិច្ចបានបង្ហើបឲ្យដឹងថា បើគ្រាន់តែនៅក្នុងក្រុងបាត់ដំបង មានទីតាំង ឬហាងទទូលទិញ លក់ និងទទូលបញ្ចាំ ម៉ូតូ ឡាន អចលនវត្ថុ អចលនទ្រព្យ និងរបស់របរមានតំលៃផ្សេងៗ មិនតិចជាង៣០កន្លែងឡើយ (នេះជារបាយការណ៍បឋម) ហើយភាគច្រើនគ្មានច្បាប់អនុញ្ញាតទេ។ ប្រភពដដែលបានប្រាប់ថា ទីតាំងខ្លះមានច្បាប់អនុញ្ញាត តែសកម្មភាពទទូលទិញ ឬទទូលបញ្ចាំបានប្រព្រឹត្តផ្ទុយទាំងស្រុងពីផ្លូវច្បាប់ ។ ពោល៖ ម្ចាស់ទីតាំងមិនបានគោរពតាមច្បាប់ទេ គឺមួយភាគធំនៅតែទទូលចោរកម្មដដែល ព្រោះពួកគេមានខ្នងសមត្ថកិច្ចនៅចាំការពារ ។
ដោយឡែក ទីតាំងជាច្រើនទៀតគ្មានច្បាប់ គ្មានយីហោ ហើយថែមទាំងប្រព្រឹត្តខុសច្បាប់។ ទទូលទិញ លក់ និង ទទូលបញ្ចាំ ទាំងរបស់ស្របច្បាប់ទាំងរបស់មិនស្របច្បាប់ ។ ទីតាំង ឬហាងគ្មានច្បាប់ទាំងនេះ កំពុងរីកដូចផ្សិតពាសពេញនៅក្នុងក្រុងបាត់ដំបងក្នុងបច្ចុប្បន្ននេះ ។ បើតាមប្រភពព័ត៌មានដែលច្បាស់ការបានបង្ហើបឲ្យដឹងថា ទីតាំង ឬហាងទទូលទិញ ទទូលបញ្ចាំ គ្មានច្បាប់មួយចំនួន ដែលកំពុងបើកទ្វារស្វាគមន៍អតិថិជនទាំងយប់ ទាំងថ្ងៃ នាសព្វថ្ងៃនេះ គឺសមត្ថកិច្ចជំនាញមួយចំនួន ជាអ្នកបើកផ្ទាល់ខ្លួនឯងតែម្ដង ហើយប្រព្រឹត្តបទល្មើសសុទ្ធសាធ ។
ដូច្នេះហើយ ទើបបទល្មើសចោរកម្មកើតឡើងម្ដងៗ ពេលខ្លះគេឃើញសមត្ថកិច្ចចាប់បានតែចោរលួច រីឯអ្នកទទូលទិញផលចោរកម្ម មិនដែលឃើញហៅមកសួរនាំ សូម្បីតែម្នាក់ ។ បើនិយាយពីកម្លាំងចម្រុះរបស់គណៈបញ្ជាការកងឯកភាពខេត្ត ដែលចុះឆែកឆេរត្រូតពិនិត្យមើលលិខិតស្នាមផ្លូវច្បាប់ នៅតាមទីតាំង ឬហាងទទូលទិញ លក់ ទទូលបញ្ចាំ ឬ បង់រំលស់ នៅក្នុងក្រុងបាត់ដំបង កាលពីរសៀលថ្ងៃទី ០៧ កញ្ញាវិញ គេសង្កេតឃើញមានទីតាំងជាច្រើន ត្រូវបានគេបិទទ្វារចាក់សោរ ដែលគេសង្ស័ងថា អាចមានអ្នកផ្ដល់សញ្ញាឲ្យបិទទ្វារជាមុន មុនពេលកម្លាំងចម្រុះចុះឆែកឆេរ ឬពិនិត្យឯកសារ ។
មិនតែប៉ុណ្ណោះ បើតាមមន្ត្រីខ្លះទៀតនិយាយថា មិនត្រិមតែគេស៊ីញ៉ូឲ្យម្ចាស់ហាង ឬម្ចាស់ទីតាំងល្មើសច្បាប់មួយចំនួនបិទទ្វារចាក់សោទេ គេថែមទាំងនាំកម្លាំងចម្រុះចុះពង្វាងទីតាំងប្រព្រឹត្តបទល្មើសធំៗ ហើយគេចង្អុលបង្ហាញឲ្យកម្លាំងចម្រុះចុះទៅត្រួតពិនិត្យតែទីតាំងណា គ្មានខ្សែ គ្មានខ្នង ដែលមិនធ្លាប់ និង ខកខានបង់សំណែនប្រចាំខែជូនសមត្ថកិច្ច ។
ប៉ុន្តែយ៉ាងណាក្ដី នៅក្នុងកិច្ចប្រតិបត្តិការចំពិនិត្យ ឬ ឆែកឆេររកច្បាប់ទម្លាប់នៅតាមទីតាំងហាងទិញ លក់ ទទូលបញ្ចាំ ឬ បង់រំលស់ ខាងលើនេះ បើតាមលោក ធូ ភា អភិបាលរងខេត្ត ដែលដឹកនាំបំពេញការងារនេះបានប្រាប់ថា នេះជាការចុះត្រូតពិនិត្យមើលអាជ្ញាប័ណ្ណបញ្ចាំទ្រព្យ ពិនិត្យអចលនទ្រព្យ និងភាពស្របច្បាប់ នៃការទទូលទិញ ឬ ទទូលបញ្ចាំទ្រព្យនៅតាមទីតាំងនានា នៅក្នុងក្រុងបាត់ដំបង។
បន្ថែមលើនេះ បើតាមលោកអភិបាលរងខេត្តបានសង្កត់ធ្ងន់ថា កិច្ចប្រតិបត្តិការនេះ គឺជាការស្វែងរកទីកន្លែងដែលទទូលផលចោរកម្ម ដែលជាការចូលរួមទប់ស្កាត់បទល្មើស ចោរលួច ចោរឆក់ ចោរប្លន់ និង បន្ថែមនូវការពង្រឹងសន្តិសុខ សណ្ដាប់ធ្នាប់នៅក្នុងមូលដ្ឋានផងដែរ ។
លោក ធូ ភា ក៏បានបញ្ជាក់ដែរថា ផែនការនេះ មិនមែនធ្វើតែនៅក្នុងក្រុងបាត់ដំបងទេ គឺត្រូវបានធ្វើឡើងទាំង១៣ស្រុក និងក្រុង ហើយបើរកឃើញថា មានទីតាំង ឬហាង ទទូលទិញ លក់ បញ្ចាំ ឬ បង់រំសល់មួយណា គ្មានច្បាប់អនុញាត ត្រូវណែនាំឲ្យម្ចាស់ទីតាំងដាក់ពាក្យស្នើសុំទៅកាន់មន្ទីរសេដ្ឋកិច្ចនិងហិរញវត្ថុខេត្ត ដើម្បីសុំអាជ្ញាប័ណ្ណធ្វើអាជីវកម្មស្របច្បាប់ មុនពេលចាត់វិធានការតាមច្បាប់ ក្នុងករណីម្ចាស់ទីតាំងមិនព្រមអនុវត្តច្បាប់ ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ