ខេត្តស្វាយរៀង ៖ យ៉ាងហោចណាស់ មានក្មេងស្រីជំទង់៣នាក់ ដែលនាំគ្នាចុះហែលទឹកស្រះលេងបណ្តាលឱ្យលង់ទាំង៣នាក់ តែសំណាងល្អ ត្រូវបានអ្នកធ្វើដំណើរតាមផ្លូវបានឃើញក៏ឆោឡោ រួចក៏មានអ្នកចេះហែលទឹកចុះទៅជួយស្រង់ចេញពីក្នុងទឹកបានជាបន្តបន្ទាប់ ។ ទោះបីជាបែបណា ក្មេងស្រីម្នាក់មានស្ថានភាពធ្ងន់ធ្ងរត្រូវដឹកបញ្ជូនទៅ
ខេត្តស្វាយរៀង ៖ យ៉ាងហោចណាស់ មានក្មេងស្រីជំទង់៣នាក់ ដែលនាំគ្នាចុះហែលទឹកស្រះលេងបណ្តាលឱ្យលង់ទាំង៣នាក់ តែសំណាងល្អ ត្រូវបានអ្នកធ្វើដំណើរតាមផ្លូវបានឃើញក៏ឆោឡោ រួចក៏មានអ្នកចេះហែលទឹកចុះទៅជួយស្រង់ចេញពីក្នុងទឹកបានជាបន្តបន្ទាប់ ។ ទោះបីជាបែបណា ក្មេងស្រីម្នាក់មានស្ថានភាពធ្ងន់ធ្ងរត្រូវដឹកបញ្ជូនទៅកាន់មន្ទីរពេទ្យខេត្ត ដើម្បីសង្គ្រោះ រីឯ២នាក់ទៀតត្រូវឪពុកម្តាយយកទៅឆ្អើរភ្លើងនៅផ្ទះ និងបានធូរស្រាល ។
ករណីក្មេងស្រីលង់ទឹកនេះ លោកយាយម៉ៅ សារ៉ាត អាយុ៥០ឆ្នាំ នៅភូមិធ្មល់ សង្កាត់ចេក ក្រុងស្វាយរៀង បានប្រាប់កោះសន្តិភាពថា ហេតុការណ៍នេះកើតឡើងកាលពីថ្ងៃទី១៣ ឧសភា វេលាម៉ោង៤រសៀលនៅភូមិធ្មល់ សង្កាត់ចេក កុមារីរងគ្រោះទី១-ឈ្មោះសេង ស្រីម៉េង អាយុ១៣ឆ្នាំ មានស្ថានភាពធ្ងន់ធ្ងរ ដោយនាងលង់ទឹករយៈពេលយូរទំរាំ រាវរកឃើញស្រង់ចេញពីទឹកបាន ពេលនាងលង់រសាត់ទៅកណ្តាលស្រះទឹកជម្រៅប្រមាណជិត៤ម៉ែត្រ ធ្វើឱ្យឈ្លក់ទឹកសន្លប់បាត់ស្មារតី ទើបហៅរថយន្តសង្គ្រោះដឹកទៅកាន់មន្ទីរពេទ្យខេត្តជួយសង្គ្រោះ ទី២-ឈ្មោះសោម សីលា អាយុ១៣ឆ្នាំ ទី៣-ឈ្មោះម៉ែក ស៊ីដេត អាយុ១៤ឆ្នាំ នាងទាំង២នាក់ ត្រូវស្រង់បានមុន ហើយពេលរលាក់ទឹកចេញក៏បានដឹងខ្លួនឡើងវិញ ក៏ត្រូវឪពុកម្តាយដុតភ្លើងឆ្អើរនៅផ្ទះធូរស្រាល និងមិនបានបញ្ជូនមកមន្ទីរពេទ្យទេ ។
លោកយាយបន្តថា ចៅរបស់គាត់សេង ស្រីម៉េង និងមិត្តភក្តិរៀននៅអនុវិទ្យាល័យ ហ៊ុន សែន ចេក ហើយនៅថ្ងៃទី១៣ ឧសភា គឺជាថ្ងៃ ឈប់សម្រាកនាំគ្នាដើរលេង ក៏ចុះមុជទឹកក្នុងស្រះអ្នកភូមិដែលជីកតាមបណ្តោយថ្នល់ មានទទឹង១០ម៉ែត្រ បណ្តោយ៦០ម៉ែត្រ ជម្រៅប្រហែលជិត៤ម៉ែត្រ ។ ពេលក្មេងចុះមុជទឹកក៏រអិលជើងទៅកន្លែងជ្រៅ បណ្តាលឱ្យលង់តែម្តង ប៉ុន្តែដោយស្រះទឹកនេះនៅជិតផ្លូវខាងត្បូងផ្ទះអ្នកស្រុកមានអ្នកធ្វើដំណើរច្រើន ទើបគេប្រទះឃើញក៏ស្រែកឆោឡោឡើង ពេលនោះមានអ្នកភូមិចេះហែលទឹកចំនួន៥ ទៅ៦នាក់ចុះជួយស្រង់បានបន្តបន្ទាប់គ្នា តែដោយទឹកជ្រៅទើបរកមិនងាយឃើញ ។
ចៅស្រីរបស់គាត់រសាត់ទៅទឹកជ្រៅ ទើបបណ្តាលឱ្យមានស្ថានភាពធ្ងន់ធ្ងរជាងគេសន្លប់មិនដឹងខ្លួន ហើយក៏ប្រញាប់ដឹកតាមរថយន្ត សង្គ្រោះទៅកាន់មន្ទីរពេទ្យខេត្តដើម្បីសង្គ្រោះ។ មកដល់ថ្ងៃទី១៤ ឧសភា នេះគឺនាងបានធូរស្រាលហើយ ។ ក្មេងស្រីទាំង៣នាក់មិនចេះហែលទឹកទេ ពេលចុះទៅមុជទឹកលេងនៅខាងៗតែរអិលជើងចូលទឹកជ្រៅ ទើបលង់តែម្តង ៕
ចែករំលែកព័តមាននេះ