ខេត្តចំប៉ាសាក់-ឡាវ ៖ ឆ្លើយតបតាមការអញ្ជើញរបស់លោកសន សៃស៊ីផានដន់ អភិបាលខេត្តចំប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ លោកម៉ៅ ធនិន អភិបាលរងខេត្តស្ទឹងត្រែង នៃព្រះរាជាណាចក្រកម្ពុជា បានដឹកនាំគណៈប្រតិភូចូលរួមកិច្ចប្រជុំស្តីពីការអនុវត្តន៍កិច្ចព្រមព្រៀងសហប្រតិបត្តិការទ្វេភាគីកម្ពុជា-ឡាវរវាងខេត្ត
ខេត្តចំប៉ាសាក់-ឡាវ ៖ ឆ្លើយតបតាមការអញ្ជើញរបស់លោកសន សៃស៊ីផានដន់ អភិបាលខេត្តចំប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ លោកម៉ៅ ធនិន អភិបាលរងខេត្តស្ទឹងត្រែង នៃព្រះរាជាណាចក្រកម្ពុជា បានដឹកនាំគណៈប្រតិភូចូលរួមកិច្ចប្រជុំស្តីពីការអនុវត្តន៍កិច្ចព្រមព្រៀងសហប្រតិបត្តិការទ្វេភាគីកម្ពុជា-ឡាវរវាងខេត្តស្ទឹងត្រែង ប្រទេសកម្ពុជា និងខេត្តចំប៉ាសាក់ ប្រទេសឡាវ នាថ្ងៃទី១២ ឧសភា ២០១១ ក្នុងសណ្ឋាគារហ្គ្រែន ខេត្តចំប៉ាសាក់ នៃប្រទេសឡាវ។
តាមរបាយការណ៍របស់ក្រុមការងារប្រទេសទាំងពីរបានឱ្យដឹងថា ភាគីទាំងពីរអនុវត្តតាមកិច្ចព្រមព្រៀងសហប្រតិបត្តិការលើគ្រប់វិស័យ ពិសេសលើការការពារសន្តិសុខ សណ្តាប់ធ្នាប់តាមខ្សែបន្ទាត់ព្រំដែន កិច្ចសហការត្រួតពិនិត្យ និងទប់ស្កាត់គ្រឿងញៀន និងកិច្ចសហប្រតិបត្តិការលើវិស័យសេដ្ឋកិច្ចសង្គមកិច្ចបានយ៉ាងល្អប្រសើរ។
លោកសុំសាក់នីត ប៊ុតទិវង្ស អភិបាលរងខេត្តចំប៉ាសាក់ និងលោកម៉ៅ ធនិន អភិបាលរងខេត្តស្ទឹងត្រែង បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការរវាងខេត្តស្ទឹងត្រែង និងខេត្តចំប៉ាសាក់ ដែលបានរួមកម្លាំងសាមគ្គីគ្នាក្តាប់នូវសភាពការណ៍ ផ្លាស់ប្តូរបទពិសោធន៍បង្កើនការយោគយល់គ្នាទៅវិញទៅមក ក្នុងលំដាប់ថ្នាក់ខេត្ត និងខេត្ត និងជាការរួមចំណែកបង្កើតនូវទំនាក់ទំនងល្អរវាងខេត្ត និងប្រជាជនទាំងពីរឲ្យកាន់តែប្រសើរឡើងថែមទៀត។
លោកម៉ៅ ធនិន អភិបាលរងខេត្តស្ទឹងត្រែង បានលើកឡើងនូវទិសដៅក្នុងក្របខណ្ឌនៃកិច្ចសហប្រតិបត្តិការអភិវឌ្ឍន៍តំបន់ត្រីកោណ CLV តាមផែនការមេដែលចុះហត្ថលេខាដោយប្រមុខរដា្ឋភិបាលទាំងបីប្រទេស សំដៅបង្កើតទំនាក់ទំនងលើគ្រប់វិស័យឲ្យបានកាន់តែស្អិតរមួត ដើម្បីជំរុញការអភិវឌ្ឍតំបន់ត្រីកោណឲ្យមានការរីកចម្រើនជាងនេះទៅទៀត ។
លោកបានបន្ថែមថា អង្គប្រជុំបានជំរុញឲ្យភាគីទាំងពីរស្នើសុំទៅរដា្ឋភិបាលរៀងៗខ្លួន ដើម្បីស្នើសុំអនុញ្ញាតបង្កើតច្រកទ្វារទ្វេភាគី គឺ នៅអន្លង់មរកត ក្នុងឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង នៃព្រះរាជាណាចក្រកម្ពុជា ជាមួយច្រកទ្វារវឺនខាម ក្នុងស្រុកខូង ខេត្តចំប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ ឲ្យបានកាន់តែឆាប់រហ័សបំផុត។ ក្នុងឱកាសនោះ ភាគីកម្ពុជាបានលើកឡើងអំពីបញ្ហាប្រជាពលរដ្ឋខ្មែរដែលត្រូវទាហានការពារព្រំដែនឡាវចាប់ខ្លួនក្នុងទឹកដីឡាវ ហើយក៏មានការស្នើសុំឱ្យមានការដោះលែងមកវិញផងដែរ។
លោកស៊ី សួន អភិបាលស្រុកសៀមប៉ាង បានបញ្ជាក់នាល្ងាចថ្ងៃទី១៤ ឧសភា ប្រាប់កោះសន្តិភាពថា ក្នុងកិច្ចប្រជុំនេះមានការលើកឡើងពីកិច្ចសហប្រតិបត្តិការលើគ្រប់វិស័យ ដូចជា ការពារសន្តិសុខ សណ្តាប់ធ្នាប់តាមខ្សែបន្ទាត់ព្រំដែន វិស័យសេដ្ឋកិច្ច និងសង្គមកិច្ចជាដើម។ ក្នុងនោះដែរភាគីកម្ពុជា បានស្នើសុំភាគីនៃប្រទេសឡាវ ធ្វើការដោះលែងពលរដ្ឋខ្មែរដែលត្រូវទាហានការពារខ្សែបន្ទាត់ព្រំដែននៃប្រទេសឡាវ ចាប់ខ្លួនកន្លងមក ឲ្យបានវិលត្រឡប់មកទឹកដីកម្ពុជាវិញ ។ ពលរដ្ឋខ្មែរដែលត្រូវចាប់ខ្លួនក្នុងទឹកដីឡាវ មានចំនួន៤នាក់ រស់នៅស្រុកសៀមប៉ាង ដែល២នាក់ឃាត់ខ្លួននៅថ្ងៃទី៣០ មេសា និង២នាក់ទៀតឃាត់ខ្លួនកាលពីថ្ងៃទី២១ មីនា ២០១១ ។ ដោយមានការយោគយល់រវាងប្រទេសទាំងពីរ ពលរដ្ឋខ្មែររបស់យើងត្រូវបានភាគីឡាវដោះលែងឱ្យវិលត្រឡប់មកប្រទេសកម្ពុជាវិញដោយសុវត្ថិភាព៕
ចែករំលែកព័តមាននេះ