ភ្នំពេញ៖ នៅថ្ងៃទី៥ ខែកញ្ញា ឆ្នាំ២០២៣ នេះ លោកបណ្ឌិតច្បាប់ សាយ បូរី បានសម្រេច​ចូលរួម​ជីវភាពនយោបាយ​ជាមួយ​គណបក្ស​ប្រជាជនកម្ពុជា។ ឆ្លើយតបនឹងការសម្រេចចិត្តនេះ សម្តេចតេជោ ហ៊ុន សែន ប្រធានគណបក្ស​ប្រជាជនកម្ពុជា បានប្រកាសទទួលស្វាគមន៍​យ៉ាងកក់ក្តៅ ចំពោះលោកបណ្ឌិត សាយ បូរី​។

នៅលើហ្វេសប៊ុក នាយប់ថ្ងៃទី៥ ខែកញ្ញា ឆ្នាំ២០២៣ នេះ លោកបណ្ឌិតច្បាប់ សាយ បូរី អាយុ ៨៣ឆ្នាំ បានប្រកាសថា «ជូនជនរួមជាតិជាទីស្នេហា ! ខ្ញុំ សាយ បូរី បានលាលែងចេញពីគណបក្ស​លោកតា សឺន សាន តាំងពីឆ្នាំ១៩៩៥ មុននឹងមកបង្កើតគណ:មេធាវី ហើយក៏នៅបន្តឯករាជ្យ រហូត ដើម្បីបំរើជាតិខ្មែរ។ ខ្ញុំយល់ច្បាស់អំពីមនោគមវិជ្ជាដឹកនាំប្រទេសរបស់សម្តេចតេជោ ហ៊ុន សែន ដែលក្នុងខ្លឹមសារស៊ីជម្រៅ ត្រូវនឹងឧត្តមគតិរបស់ខ្ញុំទាំងស្រុង ជាពិសេស បានឃើញច្បាស់អំពីការឈានឡើងជាបន្តបន្ទាប់នៃការអភិវឌ្ឍប្រទេសជាតិ, កិត្យានុភាពជាតិ និងភាពសុខសាន្តរបស់ប្រជាជនកម្ពុជា ក្រោមដំបូលនៃសុខសន្តិភាព។ មួយជីវិតខ្ញុំ ជាអ្នកសិក្សាស្រាវជ្រាវ, ជាអ្នកបណ្តុះបណ្តាលបញ្ញវន្តនានាជាច្រើននាក់ និងជាអ្នកនយោបាយមួយរូប, ខ្ញុំមើលឃើញច្បាស់ថា ស្ថានភាពស្រុកទេសយើង មានលក្ខណៈល្អប្រសើរស្ទើរគ្រប់វិស័យ ហើយគ្រឹះនៃសុខសន្តិភាព ព្រមទាំងការរៀបចំការ​បន្តវេនដឹកនាំប្រទេស ដោយអ្នកជំនាន់ក្រោយ ដែលមានសម្តេចមហាបវរធិបតី ហ៊ុន ម៉ាណែត ដែលជាបញ្ញវន្តពោពេញទៅដោយសមត្ថភាព នឹងបន្តធ្វើឱ្យប្រទេសជាតិយើង កាន់តែមានការរីក​ចំរើន និងកិត្យានុភាពជាតិលើឆាកអន្តរជាតិ ហើយប្រជាជននឹងបន្តរស់នៅក្នុងភាព​សុខសាន្ត​ក្រោម​ដំបូលនៃសុខសន្តិភាព»។

លោកបណ្ឌិតច្បាប់ សាយ បូរី បន្ថែមថា «ខ្ញុំបានសម្រេចចិត្តដើរតាមមាគ៌ានៃគណបក្ស​ប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំគណបក្សដ៏ឆ្នើម និងជាមហាអគ្គមគ្គុទេសរបស់ជាតិ។ នៅព្រឹក​ថ្ងៃទី០៥ ខែកញ្ញា ឆ្នាំ២០២៣ នេះ ខ្ញុំបានផ្ញើសារគោរពស្នើសុំសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដើម្បីបង្ហាញទឹកចិត្តរបស់ខ្ញុំ ចង់សុំចូលជាសមាជិកនៃគណបក្សប្រជាជនកម្ពុជា រួមគ្នាបន្តដំណើរកសាងប្រទេសជាតិ ពីក្រោយអ្នកបន្តវេនទៅមុខ ឆ្ពោះទៅរកការរីកចម្រើន​របស់សង្គមឲ្យកាន់តែបានឆាប់រហ័ស។ ខ្ញុំសូមគោរពអរគុណ​សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានសម្រេចទទួលខ្ញុំភ្លាម ឲ្យចូលជាសមាជិករបស់​គណបក្សប្រជាជនកម្ពុជា នៅថ្ងៃនេះ។ ខ្មែររួមគ្នាជាធ្លុងមួយ ខ្មែរខ្លាំង និងបានសុខក្សេមក្សាន្ត​យូរអង្វែង ហើយស្រុកទេសនឹងរីកចម្រើនឆាប់រហ័ស»។

ភ្លាមនៅលើប្រព័ន្ធបណ្តាញសង្គមហ្វេសប៊ុក និងតេឡេក្រាម សម្តេចតេជោ ហ៊ុន សែន បានប្រកាសថា «ជាថ្មីម្តងទៀត ក្នុងនាមគណបក្សប្រជាជនកម្ពុជា ខ្ញុំសូមស្វាគមន៍យ៉ាង​កក់ក្តៅចំពោះឯកឧត្តម សាយ បូរី ដែលបានសម្រេចចិត្ត មកចូលរួមជីវភាពនយោបាយ​ជាមួយគណបក្សប្រជាជនកម្ពុជា។ តាមរយៈនៃការចូលរួមរបស់ឯកឧត្តម សាយ បូរី គណបក្សប្រជាជនកម្ពុជា នឹងទទួលបានបញ្ញាវ័ន ដែលជាទីគោរព និងធនធានមនុស្សដ៏កម្រ​បន្ថែមទៀត។ សូមជូនពរឯកឧត្តម សាយ បូរី និងក្រុមគ្រួសារ ជួបតែសេចក្តីសុខសេចក្តីចម្រើន»។

នៅយប់ថ្ងៃទី៥កញ្ញានេះ លោកបណ្ឌិត សាយ បូរី ក៏បានឆ្លើយតបតាមហ្វេសប៊ុកថា «ខ្ញុំសូមគោរពអរគុណសម្តេចតេជោ ហ៊ុន សែន និងគណបក្សប្រជាជនកម្ពុជា សា​ជាថ្មីម្តងទៀត ដែលបានស្វាគមន៍ខ្ញុំយ៉ាងកក់ក្តៅ និងសូមទទួលនូវពរដ៏ប្រសើរបស់សម្តេចតេជោ ប្រធាន ដោយគោរព និងដឹងគុណ»។

សូមរម្លឹកថា លោកបណ្ឌិត សាយ បូរី កើតនៅថ្ងៃទី២៩ ខែមករា ឆ្នាំ១៩៤០ បាន​រៀនចប់​ថ្នាក់បណ្ឌិតច្បាប់ ឯកទេសខាងវិទ្យាសាស្រ្តរដ្ឋបាល នៅសាលាទីក្រុងប៉ារីស ក្នុង​ឆ្នាំ១៩៧៤។ លោក​ទទួលបន្ទុកបង្រៀន​នៅមហាវិទ្យាល័យ និងសាកលវិទ្យាល័យនីតិសាស្ត្រ ឆ្នាំ១៩៧១ និងក្រោយសង្គ្រាម តាំងពីឆ្នាំ១៩៩៣ រហូតមក។

​​លោកបណ្ឌិត សាយ បូរី បានក្លាយជាមេធាវីពេញសិទ្ធិ នៅកម្ពុជា ចាប់តាំងពីឆ្នាំ១៩៩៥​​។ លោកបណ្ឌិត សាយ បូរី ធ្លាប់ជាឧត្តមប្រឹក្សាព្រះមហាវីរក្សត្រ នរោត្តម សីហនុ។ ជាអតីតសមាជិកក្រុមប្រឹក្សាធម្មនុញ្ញ។ ជាអតីតរដ្ឋមន្ត្រី និងជាអតីត​រដ្ឋលេខាធិការ។ ជាអតីតប្រធានស្ថាបនិកនៃគណៈមេធាវីនៃព្រះរាជាណាចក្រកម្ពុជា។

អំឡុងពេល​លោក កឹម សុខា ឡើងធ្វើជាអនុប្រធានទី១ នៃរដ្ឋសភា លោកបណ្ឌិត សាយ បូរី ត្រូវបានតែងតាំងជាទីប្រឹក្សាច្បាប់របស់លោកកឹមសុខា កាលពីឆ្នាំ២០១៥ ដល់ឆ្នាំ២០១៧​៕