ខេត្តកណ្តាល ៖ ជនសង្ស័យម្នាក់ក្នុងចំណោមបក្សពួកពីរនាក់ជាប់ពាក់ព័ន្ធលួចគោ ពីរក្បាលបានត្រូវប៉ូលិសស្រុកស្អាងចាប់ខ្លួនកាលពីវេលាម៉ោង៣រសៀលថ្ងៃទី១២ ឧសភា ឆ្នាំ ២០១១ នៅភូមិព្រែកខ្សេវ ឃុំរកាខ្ពស់ ស្រុកស្អាង ខណៈជននេះ កំពុងស្រាយចំណងគោដែលលួចបានហើយយកមកលាក់ទុកនៅខាងក្រោយភូមិ
ខេត្តកណ្តាល ៖ ជនសង្ស័យម្នាក់ក្នុងចំណោមបក្សពួកពីរនាក់ជាប់ពាក់ព័ន្ធលួចគោ ពីរក្បាលបានត្រូវប៉ូលិសស្រុកស្អាងចាប់ខ្លួនកាលពីវេលាម៉ោង៣រសៀលថ្ងៃទី១២ ឧសភា ឆ្នាំ ២០១១ នៅភូមិព្រែកខ្សេវ ឃុំរកាខ្ពស់ ស្រុកស្អាង ខណៈជននេះ កំពុងស្រាយចំណងគោដែលលួចបានហើយយកមកលាក់ទុកនៅខាងក្រោយភូមិ ហើយម្ចាស់តាមដានរកឃើញ ។
តាមព័ត៌មានពីមន្ត្រីប៉ូលិសបានឱ្យដឹងថា ជនសង្ស័យដែលត្រូវបានចាប់ខ្លួននោះឈ្មោះអៀង បឿន ភេទប្រុស អាយុ៥៧ឆ្នាំ ជាកសិករ ចំណែកម្នាក់ទៀតឈ្មោះប៉ែន បាក់សែ ភេទប្រុស អាយុ៤៧ឆ្នាំ មុខរបរទិញ-លក់គោ អ្នកទាំងពីរនៅភូមិព្រែកខ្សេវ ឃុំរកាខ្ពស់ ស្រុកស្អាង ។ ចំណែកជនរងគ្រោះជាម្ចាស់គោឈ្មោះឡេង បឿន ភេទប្រុស អាយុ៣៥ឆ្នាំ នៅភូមិព្រែកត្រែង ឃុំសិត្បូ ស្រុកស្អាង ។
មន្ត្រីប៉ូលិសបានឱ្យដឹងថា កាលពីយប់ថ្ងៃទី១០ ឧសភា ម្ចាស់គោឈ្មោះឡេង បឿន បានចងគោរបស់ខ្លួននៅក្រោមផ្ទះ គឺមេគោមួយក្បាលផើម និងមេក្រមុំមួយក្បាលទៀត ហើយគោទាំងពីរក្បាលនោះត្រូវគេលួចស្រាយចំណងយកទៅបាត់នៅពេលយប់ ។ លុះដល់ព្រឹកឡើង ម្ចាស់គោបានតាមស្វែងរកគោរបស់ខ្លួនក្នុងភូមិសាស្ត្រស្រុកស្អាងរហូតមកដល់ថ្ងៃទី១២ ឧសភា ក៏បានប្រទះឃើញគោរបស់ខ្លួនទាំងពីរក្បាលចងនៅក្រោមដើមត្នោត ក្រោយភូមិព្រែកខ្សាវ ឃុំរកាខ្ពស់ នៅខាងក្រោយផ្ទះរបស់ឈ្មោះប៉ែន បាក់សែ ពេលនោះម្ចាស់គោមិនទៅដឹកគោនោះមកវិញភ្លាមៗទេ គឺទៅប្តឹងប៉ូលិស ហើយម្ចាស់គោបានលបសំងំចំាំឃ្លាំមើលរហូតដល់ម៉ោង៣រសៀល ក៏បានឃើញឈ្មោះអៀង បឿន ដើរមកស្រាយចំណងគោដឹកក៏ប្រាប់ប៉ូលិសឱ្យចាប់ខ្លួនតែម្តង ។
ក្រោយពីចាប់ខ្លួន ឈ្មោះអៀង បឿន បាននិយាយថា ខ្លួនមិនបានលួចគោនោះទេ គឺឈ្មោះប៉ែន បាក់សែ ជាអ្នកប្រើខ្លួនឱ្យមកដឹកគោនោះ ហើយកន្លងមកខ្លួនធ្លាប់ស៊ីឈ្នួលដឹកគោឱ្យឈ្មោះប៉ែន បាក់សែ ជាញឹកញាប់ដែរ ព្រោះជាអ្នកទិញ-លក់គោ ។ បច្ចុប្បន្នឈ្មោះប៉ែន បាក់សែ បានរត់គេចខ្លួន ចំណែកឈ្មោះអៀង បឿន ត្រូវប៉ូលិសកសាងសំណុំរឿង ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ