ភ្លើងឆេះផ្ទះ ម្នាក់ៗស្រឡាំងកាំង រត់ចេញរកគេជួយសង្គ្រោះប្អូនពិការ តែគួរឱ្យអនិច្ចា
- ភ្នំពេញ
រាជធានីភ្នំពេញ ៖ ពិតជាគួរឱ្យអាណោចអាធ័មណាស់ ខណៈដែលស្ត្រីជនពិការម្នាក់បានបាត់បង់ជីវិត
រាជធានីភ្នំពេញ ៖ ពិតជាគួរឱ្យអាណោចអាធ័មណាស់ ខណៈដែលស្ត្រីជាជនពិការម្នាក់បានបាត់បង់ជីវិតក្នុងហេតុការណ៍គ្រោះអគ្គីភ័យឆាបឆេះផ្ទះឈើលើថ្មក្រោម១ខ្នង បង្កអោយមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចេញរថយន្តពន្លត់អគ្គីភ័យអន្តរាគមន៍បាញ់ពន្លត់ កាលពីវេលាម៉ោង១និង៣០នាទីឈានចូលព្រឹកថ្ងៃទី៤ ខែកញ្ញា ឆ្នាំ២០២៣ នៅចំនុចផ្ទះអត់លេខ ផ្លូវបេតុងព្រៃស ភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ ។
ម្ចាស់ផ្ទះកើតហេតុខាងលើឈ្មោះ មុំ ថុន ភេទប្រុស អាយុ៥៧ឆ្នាំ មុខរបររត់កង់បី ស្នាក់នៅផ្ទះកើតហេតុខាងលើ ។ ចំណែកជនរងគ្រោះដែលបាត់បង់ជីវិតឈ្មោះ ម៉ៅ ផលជាតិ ភេទស្រី អាយុ៤៣ឆ្នាំ ជាជនពិការ ត្រូវជាប្អូនរបស់ម្ចាស់ផ្ទះ។ ដោយឡែកផ្ទះដែលត្រូវអគ្គីភ័យឆាបឆេះមានទំហំ៧ម៉ែត្រគុណនិង៨ម៉ែត្រ សង់អំពីឈើលើ ថ្មក្រោម។
តាមការៀបរាប់របស់ម្ចាស់ផ្ទះបានអោយដឹងថា មុនពេលកើតហេតុពួកគាត់និងក្រុមគ្រួសារបានចូលសំរានដូចសព្វដង ដោយពួកគាត់ខ្លះសំរាននៅខាងក្រោម ចំណែកស្ត្រីរងគ្រោះសំរាននៅខាងលើផ្ទះ ។ លុះមកដល់ម៉ោងកើតហេតុ ស្រាប់តែពួកគាត់ភ្ញាក់ពីដំណេកឃើញមានភ្លើងឆេះយ៉ាងសន្ធោសន្ធៅអស់ផ្ទះជាងពាក់កណ្ដាលទៅហើយ ពេលនោះពួកគាត់ស្រឡាំងកាំងអស់ ដោយរត់ចេញយកតែរួចខ្លួនតែប៉ុណ្ណោះ ហើយស្ត្រីដែលជាជនពិការត្រូវជាប្អូន គឺបានជាប់នៅខាងលើផ្ទះ ដោយមិនមានអ្នកអាចចូលទៅជួយបាននោះទេ ដោយសារតែភ្លើងឆេះសន្ធោសន្ធៅខ្លាំងពេក គឺបានត្រឹមតែស្រែកអោយគេឯងជួយ និងរាយការណ៍ជូនសមត្ថកិច្ចមូលដ្ឋានដើម្បីសុំជំនួយរថយន្ដបង្ការពន្លត់អគ្គិភ័យមកជួយអន្តរាគមន៍បាញ់ពន្លត់ ក្រែងសង្គ្រោះប្អូនស្រីរបស់គាត់បាន ។
ក្នុងហេតុការណ៍នេះដែរ បន្ទាប់ពីទទួលដំណឹងនេះហើយ រថយន្តពន្លត់អគ្គីភ័យបានចេញទៅដល់ចំនួន៤គ្រឿង ក្នុងនោះមានរថយន្តរបស់ការិយាល័យបង្ការនិងពន្លត់អគ្គីភ័យរបស់ស្នងការដ្ឋាននគរបាលរាជធានីភ្នំពេញចំនួន២គ្រឿង រថយន្តរបស់ក្រុមហ៊ុនស្រាបៀរចំនួន១គ្រឿង និងរថយន្តរបស់ក្រសួងមហាផ្ទៃមួយគ្រឿង និងបានសហការគ្នាបាញ់ពន្លត់អស់ទឹក២រថយន្ដ ស្មើនឹង៩ម៉ែត្រគូប ទើបធ្វើអោយភ្លើងរលត់ទៅវិញជាស្ថាពរនៅវេលាម៉ោង២និង៥៧នាទីឈានចូលព្រឹកថ្ងៃទី៤ កញ្ញា ។
ទោះជាយ៉ាងណា បន្ទាប់ពីខាងជំនាញបាញ់បាញ់ទឹកពន្លត់រួចរាល់ហើយ និងបានធ្វើការរុករកក៍ប្រទះឃើញស.ពស្ត្រីរងគ្រោះត្រូវភ្លើងឆាបឆេះ ខ្លោចអស់ទៅហើយ ។
ក្រោយពេលកើតហេតុ ក្នុងករណីនេះកម្លាំងជំនាញបានធ្វើការសន្និដ្ឋានថា ករណីនេះគឺបណ្ដាលមកពីឆ្លងចរន្តអគ្គិសនី ទើបបង្កអោយមានអគ្គីភ័យឆាបឆេះបែបនេះ ហើយធ្វើអោយខូចខាតផ្ទះក៍ដូចសំភារៈអស់ទាំងស្រុង និងបណ្តាលឱ្យស្ត្រីជនពិការម្នាក់ស្លា.ប់ក្នុងភ្នក់ភ្លើងយ៉ាងអាណោចអាធ័មផងដែរ ៕
ចែករំលែកព័តមាននេះ