ករណីគប់កញ្ចក់រថយន្តអ្នកដំណើរមួយករណី បានកើតឡើងកាលពីវេលាម៉ោង១៩និង៥០នាទីយប់ ថ្ងៃទី១ ខែកញ្ញា ឆ្នាំ២០២៣ តាមបណ្តោយផ្លូវជាតិលេខ៣ ស្ថិតក្នុងភូមិសាស្ត្រភូមិព្រៃញឹក ឃុំខ្វាវ ស្រុកសំរោង ខេត្តតាកែវ ដែលបង្កឡើងដោយជនល្មើស
ខេត្តតាកែវ ៖ ក្រោយស្ងប់ស្ងាត់ករណីគប់កញ្ចក់រថយន្តអ្នកដំណើរតាមដងផ្លូវនៅក្នុងទឹកដីខេត្តតាកែវមួយរយៈ ពេលនេះបានកើតមានមួយករណីទៀតហើយនៅដើមខែកញ្ញានេះ។
តាមការបង្ហាញពីក្រុមការងារតាមដានព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តតាកែវ បានបញ្ជាក់ថា មានករណីគប់កញ្ចក់រថយន្តអ្នកដំណើរមួយករណី បានកើតឡើងកាលពីវេលាម៉ោង១៩និង៥០នាទីយប់ ថ្ងៃទី១ ខែកញ្ញា ឆ្នាំ២០២៣ តាមបណ្តោយផ្លូវជាតិលេខ៣ ស្ថិតក្នុងភូមិសាស្ត្រភូមិព្រៃញឹក ឃុំខ្វាវ ស្រុកសំរោង ខេត្តតាកែវ ដែលបង្កឡើងដោយជនល្មើសមិនស្គាល់អត្តសញ្ញាណមួយក្រុម មានគ្នា៤នាក់ ជិះម៉ូតូ២គ្រឿង បើកបរក្នុងទិសដៅពីជើងមកត្បូង។
ប្រភពដដែលបន្តថា ក្រុមជនល្មើសទាំងនោះបានធ្វើសកម្មភាពគប់ដុំថ្មទៅលើរថយន្តរបស់ជនរងគ្រោះម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខ ភ្នំពេញ3B-9147 បើកបរពីត្បូងទៅជើង បណ្តាលឱ្យត្រូវត្រង់កញ្ចក់ខាងមុខ ហើយបែកអំបែងត្រូវចំអ្នកបើរបរឈ្មោះ សុខ ពៅ ភេទប្រុស អាយុ៣៧ឆ្នាំ មានទីលំនៅភូមិឈ្មួញ សង្កាត់ដង្កោរ ខណ្ឌសែនសុខ រាជធានីភ្នំពេញ បណ្ដាលឱ្យរងបួសត្រង់ចិញ្ចើមខាងឆ្វេង និងត្រូវបញ្ជូនទៅព្យាបាលនៅមន្ទីរពេទ្យភ្លាមៗ។
ក្រោយពេលកើតមានករណីខាងលើនេះ កម្លាំងជំនាញអធិការដ្ឋាននគរបាលស្រុកសំរោង រួមជាមួយកម្លាំងប៉ុស្តិ៍រដ្ឋបាលខ្វាវ បានចុះទៅដល់កន្លែងកើតហេតុភ្លាមៗ ហើយប្រមូលព័ត៌មាន និងសហការជាមួយបណ្តាប៉ុស្តិ៍រដ្ឋបាល ពាក់ព័ន្ធទាំងខេត្តកំពង់ស្ពឺ និងខេត្តតាកែវ នៅតាមបណ្តោយផ្លូវជាតិលេខ៣ ប៉ុន្តែដោយសារទីតាំងកើតហេតុ ពុំមានកាមេរ៉ាសុវត្ថិភាព ទើបមិនអាចទាន់កំណត់មុខសញ្ញាណជនបង្កបាន។
លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ នៅព្រឹកថ្ងៃទី០២ ខែកញ្ញា ឆ្នាំ២០២៣នេះ ក៏បានបញ្ជាកម្លាំងការិយាល័យជំនាញ នៃស្នងការដ្ឋាននគរបាលខេត្តតាកែវ ចុះសហការជាមួយកម្លាំងអធិការដ្ឋាននគរបាលស្រុកសំរោង ស្រុកត្រាំកក់ ស្រុកបាទី និងកម្លាំងប៉ុស្តិ៍នគរបាលពាក់ព័ន្ធតាមបណ្តោយផ្លូវជាតិលេខ៣ ដើម្បីប្រមូលព័ត៌មាន ស្វែងរកជនបង្កយកមកផ្តន្ទាទោសតាមផ្លូវច្បាប់។
ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តតាកែវ ក៏សុំចិត្តប្រជាពលរដ្ឋសហការផ្តល់ព័ត៌មានមកកាន់ស្នងការដ្ឋាននគរបាលខេត្តតាកែវ តាមរយៈ messenger , Comment) នៅលើទំព័រ Facebook page និងតាមរយៈលេខទូរស័ព្ទប្រចាំបញ្ជា២៤ម៉ោងលើ២៤ម៉ោង (០៩៧ ៧៧៨ ០០០៥) របស់ស្នងការដ្ឋាននគរបាលខេត្តតាកែវ ដើម្បីឱ្យសមត្ថកិច្ចជំនាញមានចំណាត់ការស្រាវជ្រាវបង្ការ បង្ក្រាបបទល្មើសឱ្យបានទាន់ពេលវេលា និងទទួលយកនូវការរិះគន់ក្នុងន័យស្ថាបនា ដើម្បីចូលរួមបម្រើផលប្រយោជន៍ជូនប្រជាពលរដ្ឋ រក្សាសន្តិសុខ សណ្តាប់ធ្នាប់ និងសុវត្ថិភាពសង្គមជាតិ ៕
ចែករំលែកព័តមាននេះ