មនុស្សក្មេងចាស់ប្រុសស្រីចំនួន៣០នាក់ បានដួលសន្លប់ជាបន្ដបន្ទាប់ ហើយត្រូវដឹកជញ្ជូនយកទៅសង្គ្រោះភ្លាមៗនៅឯមន្ទីរពេទ្យ បន្ទាប់ពីមានការធ្លាយឧស្ម័នអាម៉ូញ៉ាក់ចេញពីក្នុងរោងចក្រផលិតទឹកកកមួយកន្លែង នៅខណ្ឌ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មនុស្សក្មេងចាស់ប្រុសស្រីចំនួន៣០នាក់ បានដួលសន្លប់ជាបន្ដបន្ទាប់ ហើយត្រូវដឹកជញ្ជូនយកទៅសង្គ្រោះភ្លាមៗនៅឯមន្ទីរពេទ្យ បន្ទាប់ពីមានការធ្លាយឧស្ម័នអាម៉ូញ៉ាក់ចេញពីក្នុងរោងចក្រផលិតទឹកកកមួយកន្លែង នៅខណ្ឌឬស្សីកែវ បង្កឱ្យមានការភ្ញាក់ផ្អើលកាលពីវេលាម៉ោង៧និង១០នាទីយប់ ថ្ងៃទី១ ខែកញ្ញា ឆ្នាំ២០២៣ នៅត្រង់ចំណុចរោងចក្រផលិតទឹកកកយីហោ «ឈាង មួ» នៅតាមផ្លូវបេតុង ក្រុមទី៥ ស្ថិតក្នុងភូមិខ១ សង្កាត់ច្រាំងចំរេះទី២ ខណ្ឌឬស្សីកែវ ។
បើតាមប្រភពនៅនឹងកន្លែងកើតហេតុ បានអោយដឹងថា នៅមុនពេលកើតហេតុ គេឃើញរោងចក្រផលិតទឹកកកមួយកន្លែងយីហោ «ឈាង មួ» កំពុងដំណើរការផលិតទឹកកក ដោយមានកម្មករធ្វើការជាធម្មតា។ លុះមួយសន្ទុះក្រោយមក ក៏ស្រាប់តែមានការផ្ទុះធុងឧស្ម័នអាម៉ូញ៉ាក់ បណ្ដាលអោយសាយភាយក្លិនពេញតំបន់ក្បែរៗនោះ និងបង្កឱ្យមានប្រជាពលរដ្ឋដែលរស់នៅក្បែរនោះ ដួលសន្លប់ជាបន្តបន្ទាប់រហូតដល់៣០នាក់ឯណោះ។
ប្រភពដដែលបន្តថា ករណីផ្ទុះធុងឧស្ម័នអាម៉ូញ៉ាក់ចេញពីរោងចក្រផលិតទឹកកកខាងលើនេះ បានធ្វើឱ្យអ្នកដំណើរខ្លះ កំពុងតែជិះម៉ូតូតាមបណ្ដោយផ្លូវជាតិលេខ៥ សុខៗ ធុំក្លិនចំហាយឧស្ម័នខ្លាំងពេក ទ្រាំមិនបានផ្ដួលម៉ូតូចោល រួចរត់រកទីសុវត្ថិភាព និងអ្នកខ្លះទៀតហូរទឹកភ្នែកពិបាកដកដង្ហើម រហូតដួលសន្លប់តែម្ដងទៅ ។ ហើយជនរងគ្រោះខ្លះត្រូវបានសាច់ញាតិដឹកទៅសង្គ្រោះបន្ទាន់ ហើយខ្លះទៀតត្រូវរថយន្ដសង្គ្រោះមកដឹកយកទៅសង្គ្រោះភា្លមៗនៅឯមន្ទីរពេទ្យសម្ដេចឪ និងមន្ទីរពេទ្យកាល់ម៉ែត ។ ក្រោយពេលកើតហេតុ ក៏មានសមត្ថកិច្ច ក៏ដូចជាអជ្ញាធរមូលដ្ឋាន ចុះទៅធ្វើការអន្តរាគមន៍ និងបានបិទធុងឧស្ម័ននោះផងដែរ ។
បើតាមលោក ឯក ឃុនដឿន អភិបាលខណ្ឌឬស្សីកែវ បានប្រាប់អោយដឹងថា ក្រោយពីកើតហេតុភ្លាមៗ លោកបានដឹកនាំកម្លាំងគណៈបញ្ជាការឯកភាពខណ្ឌ ចុះអន្តរាគមន៍សម្របសម្រួលលើករណីនេះ និងមានការចូលរួមពីរថយន្ដសង្គ្រោះបន្ទាន់របស់មន្ទីរពេទ្យសម្ដេចឪ និងមន្ទីរពេទ្យកាល់ម៉ែត ព្រមទាំងរថយន្ដពន្លត់អគ្គិភ័យផងដែរ ដើម្បីរង់ចាំអន្តរាគមន៍ជួយពលរដ្ឋក្នុងករណីបន្ទាន់ណាមួយកើតឡើង។
លោក ឯក ឃុនដឿន អភិបាលខណ្ឌឬស្សីកែវ បានប្រាប់អោយដឹងបន្តទៀតថា លុះនៅព្រឹកថ្ងៃទី២ ខែកញ្ញា ឆ្នាំ២០២៣ លោក ឯក ឃុនដឿន អភិបាលខណ្ឌឬស្សីកែវ បានដឹកនាំមន្ត្រីជំនាញចុះធ្វើការពិនិត្យមើលទីតាំងរោងចក្រផលិតទឹកកកខាងលើ ក្រោយពីមានការបែកធ្លាយឧស្ម័នអាម៉ូញ៉ាក់ចេញមកក្រៅ បណ្តាលឲ្យមនុស្សចំនួន៣០នាក់រងរបួសផ្លូវដង្ហើម ហើយត្រូវបញ្ជូនទៅព្យាបាលនៅមន្ទីរពេទ្យកាល់ម៉ែត មន្ទីរពេទ្យសម្តេចឪ និងមន្ទីរពេទ្យគីឡូម៉ែត្រលេខ៦ ។ ចំណែកម្ចាស់ទីតាំងខាងលើនេះមានឈ្មោះ ឈាង ប៉ោ ភេទប្រុស អាយុ៥៦ឆ្នាំ ជនជាតិខ្មែរ មានទីលំនៅចំណុចកើតហេតុ។
លោកអភិបាលខណ្ឌឬស្សីកែវ បានប្រាប់ឲ្យដឹងថា ក្រោយមានការបែកធ្លាយឧស្ម័នអាម៉ូញ៉ាក់នៅក្នុងរោងចក្រផលិតទឹកកកខាងលើនេះ លោកក៏បានបញ្ជាឲ្យអាជ្ញាធរពាក់ព័ន្ធចុះធ្វើការផ្អាកទីតាំងរោងចក្រផលិតទឹកកកជាបណ្ដោះអាសន្ន ដើម្បីរង់ចាំអាជ្ញាធរពាក់ព័ន្ធចុះធ្វើការត្រួតពិនិត្យជាថ្មី និងជួយសង្គ្រោះប្រជាពលរដ្ឋជូនពួកគាត់ទៅមន្ទីរពេទ្យភ្លាមៗ។
លោកអភិបាលខណ្ឌឬស្សីកែវ បន្តទៀតថា ហើយនៅព្រឹកនេះដែរ អាជ្ញាធរបានចុះមកធ្វើកំណត់ហេតុអោយម្ចាស់ទីតាំងពង្រឹងសុវត្ថិភាព បច្ចេកទេសអោយបានខ្ពស់ និងមិនអោយមានបញ្ហាជាលើកទី២ទេ។ បើសិនជាមានបញ្ហាបែបនេះកើតឡើងម្តងទៀត អាជ្ញាធរនឹងសម្រេចបិទទីតាំងខាងលើនេះ ដោយអោយម្ចាស់រកទីតាំងថ្មី ដែលឆ្ងាយពីផ្ទះប្រជាពលរដ្ឋ ហើយការចំណាយថ្លៃព្យាបាលអាការៈផ្លូវដង្ហើមរបស់ប្រជាពលរដ្ឋ គឺម្ចាស់ទីតាំងជាអ្នកទទួលខុសត្រូវទាំងអស់៕
ចែករំលែកព័តមាននេះ